MATTHEW 14

Tui Inhlutpa John Athina

(Mk 6.14–29; Lk 9.7–9)

1Khava lai Galilee vaikarônpa Herod khan, Jesu chungchâng ṭong inhri kha aleithei jo. 2Ama’n aṭōnpui karônhei hneng, “Ama hi Tui Inhlutpa John kha akathia inphut akahringsōt khet kae. Khava jâra, hiva ṭōn-inlak tlotorna ratha anei kae,” ati.

3 # Lk 3.19,20 Ajârchu Herod in John kha hiva mak hma khan aleisura thirhrui vâng akhit a aleikhum kae. Hivahi asōpuipa Philip lômnu, Herodias jâra kae. 4#Lev 18.16; 20.21Ajârchu pha khat a John in Herod hneng, “Herodias kha nanuhmei naman chang sik hi dân dikmak,” aleitipek a kae. 5Herod in athat hnōm, tâk Jehudi mipuihei aleiṭit hei, ajârchu anmani’n John kha sânkathem inkhat kae tia anleilo.

6Herod inte ninga rehōia Herodias sanu kha mipui hma hong kalâm. Herod kha katlai hranghra, 7khana amanu hneng le’ntep a, “Nang in nader eng rakip kha kapek sik che, kei intep eng,” aleiti.

8Anu mansena dungjuia ama’n, “John lu kha thleng inkhat chunga hinahin tûntak apek roh!” ati.

9Rengpa kha amalung inrim jo, tâk ahmelâk rakip hei hmaikunga a’ntepsa achang jâra akadernu lungdo mathlungna sik ṭong amasō jo. 10Khava jâra kurkhum shunga John lu avamantan jo hei. 11Thleng inkhat chunga John lu kha anheichoia nuhngâknu hneng anhongpek jo, nuhngâk khan anu hneng achoi jo. 12John sonlehei kahong heia, akalōng kha anvaloa, anvahre jo; Jesu hneng kahong heia thang anhongkōi jo.

Jesu’n Mipui Katam tak Avei hei

(Mk 6.30–44; Lk 9.10–17; Jn 6.1–14)

13Jesu’n hiva ṭong hi athei pha, khava hmun a inphut kadai hngera abing rōk a omtheina inkhat ting rakōnga kasesōt jo. Mipui he’n kha antheia, ankhōpui andahlona ram chârna ting ama anjui jo. 14Jesu khan rakōnga inphut heikasōksōt a, mipui katamtak hei kha ahmu hei pha, anchunga alungsetna hongkasip jo, khana akanahei aleimandam jo hei.

15Khava ninga khōhleia asonlehei ahnenga kahong heia, “Apha hi kathlengrei jo, khana ahmun hi mi om makna kae. Mipuihei kha manse jo hei roh, anmani khōheia sehei sona sâk sik va’ncho jo hei rasoh,” anti.

16Jesu’n anhnenga ati, “Anmani sena sik rangei mak. Nangni’n sâk sik heikhat pe hei ruh!”

17Anmani’n anmasôn, “Eini’n hinna nineiseng chu buhlom pheng 5 leh nga 2 rōk kae.”

18Jesu’n, “Khan chu hin kahnenga heichoi ruh,” ati. 19Ama’n mipuihei kha phi chunga ani’n-ongna sik ṭong apek hei; khava sōa ama’n buhlom 5 leh nga 2 kha aloa, marvânting a-ena Pathen manpâkna aneia kae. Ama’n buhlom kha har akhōia asonlehei apek hei, asonle he’n mipuihei hneng anleisem pek jo hei. 20Mi rakip in ansâk a kakhop et hei. Khava sōa sonle he’n a’nhlei aharhei kha hrai 12 kasip anhrut. 21Akasahei kha nuhmei leh naipang inveiloa, mi 5,000 kapō hei kae.

Jesu Tui chunga Akalôn

(Mk 6.45–52; Jn 6.15–21)

22Khava sōa Jesu’n mipuihei kha atirsōt lai hei, asonlehei kha rakōng inkhat a amanhlut heia dîr rekhat ting hmadet a anleisena sik amantluk hei. 23Mipuihei kha atirsōt sō jo hei, derna kanei sik a abinga hmebung inkhat a kake jo. Khōhlei ahong tlung jo pha, Jesu kha abing rōk a khan leika-om; 24hiva pha hin rakōng khachu dîrlaia kahlatak a leika-om, tui in-nông khan akanok lele, ajârchu thli kahrâng khan asuk lelea kae.

25Jîngkâr pung 3 leh 6 kâra Jesu asonlehei hneng kahong, tui chunga heikalôn. 26Tui chunga ama’n ke ahei choi kha anhmua anmani ṭit inper jo hei. “Rathla kaṭhamak kae!” antia kaṭi heia kapeng jo hei.

27Khava phatak a Jesu kaṭonga anhnenga ati, “Kangama om ruh! Kei eng kae. Ṭimak ruh!”

28Khava sōa Peter in kaṭongsōt a, “Rōngpu, nangkhet nachang inchu, kei nahnenga tui chunga hin kahongna sik ṭong eipe roh,” ati.

29Jesu’n amasôn, “Hong roh!” Khana Peter rakōng chunga inphut kaṭuma Jesu hnengting tui chunga lôn aphut jo. 30Tâk thlipui kha ahmu pha ama kaṭi jo, khana tui shunga kahlut inphut jo. “Rōngpu ahuk roh!” tia alei-ôn.

31Khava phatak a Jesu’n akut vâng amatua khana ahnenga, “Heituk a taksenna katlôm che mo! Heisa mo namalung a’nkei chio che?” ati.

32An-inhnia rakōnga kahlut jo hei, khana thli kha kabâng jo. 33Rakōng chunga ka-om sonlehei khan Jesu ankamuk jo. “Kadiktak a nang Pathen Sapa che kae!” antia ka-ông jo hei.

Jesu’n Gennesaret a Akana Amandam

(Mk 6.53–56)

34Anmani’n dîr kha anhei rakansōt a, Gennesaret ram kachâra hei kake hei, 35khanna khan mihe’n Jesu kha anleimanhret. Khan chu ram shung pumpuia khan mi antira, mikana rakip Jesu hnenga anheiṭhōi jo hei, 36Akana he’n apōnhmor bek ansitna sik ahnenga anngek a kae; khana apōnhmor katôn rakip leikadam hei.

Currently Selected:

MATTHEW 14: KOMRBSI

Highlight

Copy