MAK 4
4
Muchi Wurna Roumushuk
(Mit. 13:1-9; Luk. 8:4-8)
1Woihapa kom Jisu na Galily tuipilen hou ah chupi thou so weh. Amunt hana rachon na am wairol rija na ahul tunga am sarukka amona kung chunga, ong weta tuipilen hou tienga lutweta meelimna tui hao wa ngir ae. 2Amona roumushuk eja manita chupi, hana manita ril:
3“Thei oh ngai jou oh, apha akha ah apa akha na muchi wur juija. 4Mawor mochi ha lampi ah tul ngei chu awana bak so weh, 5Ahrena lungkhrok chunga tul ngei na alei atam am nojarra ranga tou wa shukkae. 6Chuti weta semni na dingjui ja chu charra thing ae rouram chu ato thukka am no ae. 7Muchi ahre na aling bom sunga tul ae tou wa shuk halkom aling jamna siem ma ara ra nea no ae. 8Chutichun adang muchi na chu ahra wara lei am na tulla ara atam ra nea ah ahre na som thum som ruk akha ko riha phao ra nea ae.”
9Chuna Jisu na ril, “Atu jungpa athei rang kur, am ngei na thei su oh.”
Roumushuk Hina Maram
(Mit. 13:10-17; Luk. 8:9-10)
10Amona mathei chak am lei apha asom ani akha chu adang amota hulla am ngei na roumushuk phurakta rou amota sai. 11Manita hita rillea, “Chungthieng reng maram sunga athuk rou lim nangei ta pe jek so weh, chuti weta awao wa am ngei taranga roumushuk hi pe sa ae. 12Chuna
‘Mani na an na,
an na ri ang no weh;
akha chu theija theija,
lung hal shuk no ae,
mani mai hai lea weta ejonga mani na rithei lungtul thei phur lea chu Chungthieng am na mai hai ah lea ange,
hana amona kom sanpi ange nge.’ ”
Jisu Na Muchi Wor Na Roumushuk Phurakta Ril
(Mit. 13:18-23; Luk. 8:11-15)
13Hana Jisu na manita sai ae, “Roumushuk hi nangei na lunghal thei no chao? Alota chu roumushuk hi nangei na lunghal thei ang chao? 14Muchi wurpana Chungthieng rou ha wurphur ae. 15Malmashi ahre chu lampi ah tul muchi rou hekta mani na theipha sulen mani kolla saitan na phao weta muchi wur rou ha choija thinge. 16Hahekta Chungthieng rou ha aranga ariem ma lasil ngei ha lungkhrok chunga muchi tul jong pa ae. 17Chuti weta ato am no jarra asot dong nea no wa apha atante nutienga ahra trongsan hina taranga aol ana anoleh ajet am juija dong nea no wa hla hou ae. 18Hana ahre na aling jam ma tul na rou ha thei chu theiweta. 19Ringchanga lung olla neinun sungkeng taranga hung thei ah akha chu adang adit eja am ma rou lim ariem chang pi ae. 20Adang ahra wor lei chunga tul muchi na thei shu takka ariem ma lapiweta ara atam shukpi akha chu saruk som thum sum ruk chakno wa riha phao ara ra ae.”
Tai Burrashi Dewankari
(Luk. 8:16-18)
21Jisu na hita rillea, “Atujong akha na dewankari ha taibur sunga anoleh kulthuija shi ranga mo? nahana hutta nangei na dau kang chunga doi no wa meh? 22Chuna thuppa shi ang eko am no ae hana thuppa shi ang aru rou ekom am no ae. Wurra shilim pa kom hong shukkange. 23Atujong akur am amona rou hi thei shu oh.”
24Woihakom lea sirra rillea arengpuna nathei sha ha hrabakta hallo, “Meeta nawul na ah nangta kom wul lange lella kom wullange. 25Atu jongpa don na am amota chu madon chunga ta lella donpi ange hana don thei no amota chu madon thei te phao la ah hao ange.”
Tou Wa Hang Hina Roumushuk
26Jisu na hitta rillea, “Chungthieng reng ram chu hihek ti ange apa akha na alei chunga muchi wur jongpa ae. 27Tantienga amo na jalla am hal enthou wa thou hal muchi lim pa chu tou ah hange. Chuphao shunga amona alota shukmo dangpha no ae. 28Nalimpa hi alei na mathei chakka ajiek adon masha ah shuk weta hana asui chumma anutieng chu ara ra ae. 29Hana ara amin jai ja chu apa ha na kuite choija pot thou ae. Maram chu aham rang apha ha tung so weh.
Antam Muh Hina Roumushuk
(Mit. 13:31-32,34; Luk. 13:18-19)
30“Anina Chungthieng rengram hi, ehekti, ae ta rillang meh?” “Anoleh ejongpa roumushuk ka dangpi ang sha? 31Na ha chu hihek ti ae sin takti maru na alei chunga nawur juija. 32Amu ngei lim karra amo na tou ah hang juija loktekti changa abak tamma wanjaija awana kom a bu sha ah sholhlak na nei ae.”
33Jisu na mee ngei kolla rouril ae, hijongpa adang adang roumushuk ka, mani lung hal thei runga. 34Amo na manita roumushuk hi tolno wa manita rilno ae chuti weta marui ngei hitta chak amjui ja chu hrabakta tong let pi ae.
Jisu Na Ru Thirang Phaibu Ta Daipina
(Mit. 8:23-27; Luk. 8:22-25)
35Nani nie nietak wakjuija marui ngeita amona rilleh, “Anina ralha lalla thingsai oh.” 36Chuna wairul rija ta hran phur weta amona chunga am na kung chak no wa adang kung ahre am hana manina amo hitta rui ah thing haso. 37Hana idang dangno ajap ahai hanga tuijulna kunga lutta wa ah tuina kung shi ah waso ae. 38Chuti weta Jisu chu kung dopa mul neiya alu dau ah jalla ame. Chunapa chu arui ngei na amota hrangveta rilleh. “Ocha ani thi-anga aeya am hi nang chu dang no-ache?”
39Amona thou weta, thirangta Roupe-ae, “Dai oh! Tuiyul tako rille nemmo!” Chuna pa chu thirang ko daisowe akha chu tuiyulko nem so weh. 40Arengpu na marui ngeita hitta rilleh. “Ejaranga alo haja atie ah chuo? atun phao sunga nangoiring am no the chau?”
41Chuna mani thei chakka hita rillhakke, “Atu pamonu nahi?” thirang na kom tuijul na kom marou jui ae!”
Currently Selected:
MAK 4: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
