MAK 5

Jisu na Hlawang Mantsha Spa Akha Ta Dampina

(Mit. 8:28-34; Luk. 8:26-39)

1Manina Gerasinie ram tienga tuipi lalla wa so weh. 2Kungsunga thou Jisu na shuk juija hrano muilha lut mee akhana hlankung hai thou wa wa-a arengpu ta tukhlak so weh. 3Na mee hi hlankung sunga hata ringa am mee ae hana atu akha na amota mant na shi nea no weh. 4Amota apha chang honna leh-ah Leh-ah akut akae thirling rui ah huppa shihalko chatpi,atu akhana ko amota lhem neno-ae. 5Suon jan nei no wa hlan kung bunga au-wa akha chu athei chaka matakka alung seou weh.

6Aram la hai thou wa Jisu ta mari juija ma am na tan na wa weta arengpa maitienga ahuk hrun ae. 7Amona ringa ou-ae, “Loktekti Chungthieng spa Jisu, nangle kei isuk lhak meh?” Chungthieng minga keina nangta nie ah am minge, keita aol pha pi no oh!” 8(amona hi rilna chu, “Hrano muihla nang apa kol hai thou wa shukko Jisu na ril!”)

9Hana Jisu na sai, “Naming alo ti meh?” Apa hana sange kaming chu kanilim “ti chu kani hi tammunge.” 10Hana Jisuta leh-ah leh-ah kani ta, na ram sung hai thou julla hla pi no oh ta nie ae.

11Aneite Mullon tlanga wok abom akra rak jonga am meh. 12Mani na Jisu kolla hlam meh kanita na wok ngei karra hla pi oh. Hana mani sunga kani na lut tukkae. 13Arengpu na ngaipi ah hrano muihla ngei ha shuk weta wok sunga lut so weh nahana am wok ngei chu lasing ani ae. Mani na tuikung ral ahai thou wa mani ha tolla lup so ae.

14Wok shelpa ngei na rou lim hi mani hu sunga tanna thing weta suipa chu meelim na shukka am hata alo ti mo ta anphao ae. 15Jisu kolla mani wakjuija chu hlawang chunga rol apa ha manina ripha so hra bakta apun adir jon weta onga am ri weta mani na atie ae. 16Hrano triek na choija am apana alo ta hati ah sa, akha chu wok ngei kolla shuk ri pha sa mee ngei na manita hrabakta suipi ae.

17Chuna mani ram sung hai thou thing rang ril lea.

18Hana Jisu na kung sunga lutpachu hrano triek chung apana manutienga jui tol rang nie ae. “Nang hitta thing ha tikkae.”

19Chuti weta Jisu na manu jui rang ngei pi no ae, “Chuna hutta Jisu na amota rillea na inntienga lea weta nani inn sung ngeita rillo Arengpu na natarang tullu lu pi akha chu eja tam malungshit pi ha.”

20Chunapa chu amona ma inn tienga lea weta hulok asom ma Jisu na aloti tullu mataranga ae pi mo ti ha. amona sui ae marou thei pha meelim na angak tul shuk kae.

Jairus Sanaonu Akha Chu Jisu Punkin Tham Nameinu

(Mit. 9:18-26; Luk. 8:40-56)

21Jisuna woihapa tuipilen kunga aral lalsu wa wak juija wairul rijana amota bom ma am meh tuipilen ralla. 22Hana senagoge sunga rouril nea karsung Jairas kom tunga Jisu mel maripha jui ah makae kunga moksho ae. 23Akha chu alung thienga ril lungshi pi oh, keita, “Kasanaonu ha thi anga ana ah am so weh. Chuna nangna lungshi ngei ah wa weta nakut na machunga shi lea chu dam ange.”

24Chunapachu Jisu na amo hitta thingha so ae hanapa chu wairul rija na Jisu manu jui ah thing so weh, hana chu mee eja na numa shihakti so weh.

25Hana kum asom ani athee chak tulla am ana nameinu akha am meh. 26Namei nu ha maipa eya na an halkom lella tieng dam no tekka adon anei eja kom thangso ae adam mang hutta hella tieng na tek so weh naha, naha. 27Hativeta amona Jisu hina rou mathei juija wairul riha nutienga wa weta arengpu punkiengte thamso. 28Matham na rouram chu hita halleh. Amona, “Keina mapun kiengte chak halkom tham lea chu kei dam mange.”

29Apha hana makka mapum ma shuk athee ha shuk nijo weta matakna dangpha ah aol madong eja ha dam so ae. 30Jisu na makolla haithou wa jatha akha shukka thingso ti matakna dangpha pa chu nutienga wairul rija amna haileh weta hita sai ae, “Atuna kapun kieng tham meh?”

31Marui ngei na hita sange. “Wairul rija na nungjel mangjel kar sunga atuna keita thamma meh ta alota sai ah che?”

32Chutiweta Jisu na atun na tham nu ta berra ann ae. 33Namei nu na dangpha so shukka am lim hi, chuna arengpu kae kunga atri akha chu hirra tu weta makolla adiek rou lim rilso ae. 34Arengpu na, nameinu ta rillea, “Ka sanaonu nangoiring jarra adam pha so che. Na ol nanat hai thou wa dam jou oh daija thing jou oh.”

35Rouhi Jisu na tronga amleija Jairus inn hai thou wa rouron mee na wa weta amota rillea, “Nasanao nu ha thiso ae, ejaranga ocha ta ollang pi ah che?”

36Jisuna mani ril thei no hongsa ae weta makolla rilso, “Ngoi chak ngoiringo ekom atri no oh.” 37Pitar akha chu Jacob hina uleh nao Johon chak ano wa atu akhata Jisu amohitta thingha no weh. 38Manina Jairus inn sunga tung so weh hana mee ngei na tappa ae rang dangno wa am Jisu na ripha so. 39Mani am na Jisu na lut weta rilleh. “Ejaranga nangei lungolla erang dangtheino wa chou? Na unga hi athi ano sa ae inn na sha ae.”

40Chuti weta mani na Jisu ta nuiso ae amo na mani lim pa ta awao wa julla hla weta unga hana manu mapa akha chu manutieng jui marui inthum chak unga am na lutso ae. 41Arengpu na unga kut choiweta woithum rillea. “Talitha koum!” (hina rilna chu ngakte oh thou jou ta keina rilla aminge!)

42Apha hana makka ngir thou weta ahul tunga rol so. (Nangak te ha akum asom ani shu so weh.) Nahi mani lim na angak shukkae. 43Hana arengpu na mani kolla rou akha rille nahi atu akhana dangno su oh. Hana mabak ma-in rang ahre te pe oh.

Currently Selected:

MAK 5: CHOTBSI

Highlight

Copy