MAK 3
3
Akut Akhatieng Thipa Apa
(Mit. 12:9-14; Luk. 6:6-11)
1Woiha lea ah senagoge sunga Jisuna lutta, akut akha tieng thipa apa akhong hana am meh. 2Adang ahre na chu Jisu ta maral pek ranga rou cholla anna, chuna tarang sharukka Sabbath ah Jisuna dampi ang mota makolla a nei ah wa weta anna am meh. 3Jisu na apa hatta rillea, “Amai tienga wa oh.” 4Hana mani kolla Jisu na sai ae, “Ani rouphun na Sabbath rungnie ah angei e am ma meh! Ahra tullu lu anoleh hrano tullu lu hana ringchang sanpi pana mo anoleh athatpa na mo?” Chutichun mani na sangne no weh. 5Jisu na mani alung hir ri weta alung sha ahul tunga anne chuna amo apa hatta rillea. “Nakut dokshukko” makut dokshuk pa chu, amatieng hekta ripta dam so weh. 6Hana pachu pharasi, ngei na awao ah shukka thing weta Herodija mee ngei ta ejongpa ah Jisu ta that ang mota waishi thouso.
Tuipi Hou Ah Wairul Rija
7Jisu akha chu arui na Galily tuipi hou tienga thingso weh akha chu wairul rija na Galily Judiah thou anu juija wa ae. 8Jerushalem, Judeja, Edomija akha chu Jordon ral tieng hai thou hana ter lea Sidon ahulla am malmashi ngeina Jisu tullu lim theija julla phao ae. 9Wairul rija tam hai sarukka Jisu na marui ngeita kung akha te adanga shi pi oh chuleh kei mani na nungjeil maijeil ang no weh. 10Jisu na ana eja ta dampi jarra reeshi leishi eja na mani tak tham pi rang amatienga julla wa ae. 11Hrano muihla don eja na amota rijuija mamai kunga tuveta hita au shukke, “Nangha Chungthieng spa che ae.”
12Chuti weta kamel atu ta ril shuk nea ranga manita rou thingpi.
Jisu Na Ahal Rui Asom Ani Ta Kok
(Mit. 10:1-14; Luk. 6:12-16)
13Jisuna mullon akha ah kalla thing weta madit mee ngeita kokka mani na kom makolla phao ae. 14Amo na asom anita hal so weh manita ahalsa rui ta bo so weh, “Apha chang honna kakolla am ha rang hana halsinge,” “Amo na mani ta rille ahra rousam ranga hla ange. 15Hana nangei na hrano muihla julne rang ane jaitha pha ange.”
16Hi ngei so weh ahalsa rui asom ani ha, Saimon (makolla Pitar ta kokha;) 17Zebedi asanaorel Jacob lea Johon. (Manui ta kom amona bornager hina takchu ruri sanao.) 18Andrew, Philip, Bartholomew, Mithew, Thomas, Alphaeus sanao Jacob, Thaddaeus, Simon, Zealot. 19Akha chu Judas Jisu ta jurpa Judas Escarot.
Jisu Akha Chu Belzebub
(Mit. 12:22-32; Luk. 11:14-23; 12:10)
20Woihapa Jisu na inn tienga lea chu woihakom wairul rija na rachun jarra arui ngei lea amona hrabakta bu bak tui in pha no ae. 21Mani innsung ngeina rouhi thei pachu, amota mant rang shuk so weh, maram chu mee ngeina hitta rillea, “Amo hi awet lut so weh!”
22Hana Jerushalem hai thou wa rouphun ocha ngeina hitta rilleh. “Amo hi Belzebul lut so weh! Chuna tarik ngei reng sarukka tarik ejata kom julla hou nea rang jaitha am ma ae.”
23Jisu na mani lim ta kokveta roumu shukka rilleh: “Alota saitan na saitan ta julla anga meh? 24Ejonga Rengram sunga anda hlakka hran hlak lea chu alota reng ram ha pallang meh. 25Ejonga innsung akha na shul hlakka ani shuklea chu inn sunga ha alota palne ang meh? 26Hana ejonga saitan rengran kom hran hlak lea chu shetta am nea ang no weh, mani ha tu wa mang shaijo weh.
27Aratpa inn sunga atu akha na lut weta madon neinun choi ah thing nea no ae, masha ah aratpa amota rui ah hup su no wa chu choi ah thingne no ae, chuna hup shu lea chu eheilim choi nea ae.
28“Keina adiek rou rilla aminge nangei pak lim kom silpi ange hana murra hrano nangei ril kom shilpi ange. 29Chuti weta atu jong pana atheing muihla changa hrano rou rillea chu etikom shilpi ang no weh; maram chu amo ha shil ngaitou pak ae so weh.” 30(Jisu na hi ril hi na maram chu mee ngei na, “Amo hi hrano muihla am ma meh.”)
Jisu Manu Akha Chu Ma-u-Mannao Ngei
31Jisu manu akha chu ma-u-manao ngei kom amunt na tunga awau ah ngirra amweta amota mani na mee akha hla ah kok lutpi ae. 32Makolla ongha am wairol rija na amota hita rillea. “Anno nanu lea na-u-nao na akha chu nashar ngeina awau wa nangta hakka am meh.”
33Amona sange, “Atu meh kanu akha chu ka-u-kanao ngei ha?” 34Chuna amona makolla ahul tunga ong ha am ngei ta an na hita rillea.
“Amo hina amha nangei ha kanu akha chu ka-u-kanao ae. 35Atu jongna Chungthieng adit ae mee ha kata ngei akha chu ko-ute ngei akha chu kanu ae.”
Currently Selected:
MAK 3: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
