MAK 13
13
Mokna Inn Treem Ranga Jisu Rou Ril
(Mit. 24:1-2; Luk. 21:5-6)
1Jisu na mokna inn haithou wa shukka, marui ngei kar hai thou wa akhana makolla rillea. “Anno ocha! alung takka sak inn hi eja ah ajon ahra ah meh!”
2Jisu na sange, “Alok inn hi nangna rijou che? Alung akha na akha phao ma ma-am na munt na amang nijo weh; allung lim denga hou ange.”
Awut Arel Akha Chu Aol Ana
(Mit. 24:3-14; Luk. 21:7-19)
3Jisu na mokna inn aral tienga olive mul la onga ma amlei ah, Pitar, Jacob, Johon akha chu Andrew mani theichak na wa weta chikka amota sai ae, 4“Kani ta rilpi oh, nalimpa hi ejongpa apha ah shuk kang mo? akha chu roulim hi shuk kang tienga ejongpa na muh shukkang meh?”
5Chuna mani ta Jisu na rillea: “Songjella am oh, atu akha na nangei ta lam danga kai no su oh. 6Kaminga mee atam pa na phao weta rillange, kei inge amoha; hana mani na mee ejata alou lamdanga rui ange. 7Hana nangei na ral akha chu ral rasha thei pha juija hlawai no oh. Hajongpa lim ha shuk kange, chuti weta atreem na ha chu ano ae. 8Jaty akha na Jaty akha ta anda ange, akha chu reng ram akha na reng ram chunga ral shul ange. Hana ram munt eja ah lingnu nok ka akha chu butang jutang eja kom shuk kange nalim hi aol ana athou na sa ae.
9“Chuna sarukka theija singa ammo, mee ngei na nangei ta ulien changei mai ah rui shukkange akha chu Synagoge eja ah ruija thingweta kasarukka areng eja maija akha chu ram ron ane eja mai kunga ngir range maram chu ahra rou manita ril sharukka. 10Chuna ahra rou ha masha ah jaty chang honna rou ril thingo. 11Ejonga nangeita mant na chang an jui ja nangei lung tiersickka erillangmo weta ephao olno oh. Apha hana narillang ha, hata rillo, naha natrong shuk ano ae, muihla athieng sa ae. 12Uleh nao sunga kom ulehnao athit phao ranga jur hlakkange, akha chu mapana asanao ngeita unga ngei nakom nungei pa ngei ta ngei num no ah akha chu manita that phao thatange. 13Meelim na kasarukka nangei ta rinum mangno ae, chuti weta atu jongpana na atreem ni phao ngirra am amota chu sanpi ange.
Ehekta Atri Alao
(Mit. 24:15-28; Luk. 21:20-24)
14“Nangei na ri ang chou ae ‘Ehekta atri alao amunt’ ma-an mang no na amunt na ngirra ma am ha” (apa ngei na lunghal theisu oh) “Apha hana chu Jehudiah am mani chu mulbunga thing su oh. 15Chuna atu akha na ko inn chunga thou wa tumma jung weta inn sunga ejongpa anei adon latum no su oh. 16Hana akha nakom loutai hai thou wa linglut la lea no su oh. 17Hajongpa rungnie hana chu naoron na am nnupinu akha chu naosan don na am nu taranga eja ah jaishi pe ja meh. 18Chungthieng ta nie oh hijongpa ngei hi phalbitiem ma shuk no range. 19Rouram chu Chungthieng na shak aleiram hina sunga athou haithou akha chu atun phao sunga sumpsuk shuk nothe akha chu shukkang lou hajongpa aol rungnie ae. 20Chuti weta Jisu na jung rungnie tanna bong pi phur noleh, muihla akha phao sanpi pha angno ae. Chuti weta mahal sha ngei sarukka, mani ta mahal jarra amona rungnie kom bongpi so ae.
21“Hana jui apha ah atujong akha na nangei ta rillange, ‘Anno, Khrista hina am meh!’ ano lea, ‘anno, ko na am meh!’ ta rilhalkom ngoiring no oh. 22Rouram chu Khrista alou Messiya akha chu chung dieklou rouphu ngei shukkange. Mani na anealah akha chu angakpi ae weta Chungthieng ahalsha nangei ta alau tienga lamkai ange. 23Chuna hrabakta songjella am mo! keina nangei kolla rou limpa hi rou shukma apha ah rilsu sange.
Meesanao Pana Jung Ang
(Mit. 24:29-31; Luk. 21:25-28)
24“Hana jui rungnie ah chu aol ana hana nutienga nienu na kom thiema akha chu hlawar na kom mawar pe ang no ae. 25Arshi ngei nakom wan haithou wa tulla amange, akha chu wan ramma am lim pa kom lingpi ange. 26Hana apha ah chu malmashi ngeina ri ange meesanao pana sumphai sunga arat jaitha akha chu ahung ajai phu ah jungange. 27Chuna arengpu na ma wanrui ngeita hla weta aky inly ah mahalsa ngei akha chu aleiram atreem na haithou wa wanram atreem na phao ah am ngeita hom manga.
Theichang Kunga Achu Na
(Mit. 24:32-35; Luk. 21:29-33)
28“Nangeina theichang kung hai thou wa rou dangpha oh: abak adon shukka hang juija abu anao mel rijuija ashao apha nei so weh ta nangei dang hekta. 29Chu phao sungakom, nalimpana shukka wak juija atun chu leima nei ah wa weta dang che hana apha hi atun chu sung karpha am so ae. 30Angei thei oh, hilimpa hi atun na ringa am meelim na thit matienga shuk kange. 31Awan alei kom treem ange, chuti weta ka trongshan che etikka ko treem ang no ae.
Atuna Akha Na Ko Rungnie Ha Anolea Apha Dang No Ae
(Mit. 24:36-44)
32“Rungnie ha anolea apha ha atu akha na dang no ae, wan na wanrui nakom asanaopa na kom dang no ae mapa na chakna dange. 33Hakka am akha chu songjello, maram chu nang na apha ha phao ang ha dang no ae. 34Na hi, hihekti ae apa akha na ma inn houphurra thing weta mashuk ngeita ma ae, ma ae rang tullu lim rilphurra shongkar hakpa ta hakka am rang rilla tairam ma thingso ae. 35Adongthei ah am mo, maram chu inn mitpu pa na etikka lea ang mo nangei na dang no weh, na hi nietlak ano lea janjai ano lea hu warrang tieng ano lea nie shuk juija kom ngei ae. 36Ejonga amo na amacha ah maphao jui ja, amo na nang ha jalla am tukhlak no su oh 37keina nangta ril hi, keina meelim ta kom rillinge; adong thei oh!”
Currently Selected:
MAK 13: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
