MAK 14

Jisu Ta That Rang Routuhlak

(Mit. 26:1-5; Luk. 22:1-2; Jhn. 11:45-53)

1Atun hi lanpina reen akha chu achol tolno budol reen rungnie nani matienga. Hana chungtekti thiempu akha chu rouphun ocha ngei na Jisu ta mant na that ranga huisar anna rol. 2“Chuti weta reen sunga manita thang so ti no rang ae no ei oh ta mani na rillea.”

Bethany Ah Jisu Ta Sirik Not Na

(Mit. 26:6-13; Jhn. 12:1-8)

3Raichi Simon ta danghlak apa inn Bethany ram ma Jisu na bakka ma-amlei ah nameinu akha na ehakta amant tam alabaster ariem hoi tui na shihakti um ha kuipi weta Jisu lu chunga shopi so ae. 4Chuti weta mani amna kar sunga am tol ahre na lungsha ah mani thei chakka hita rilhlakke, “Ejeranga riemhoi sirik areempa ah hou meh? 5Na ariemhoi sirik hina riha som nga hella jurveta apha sum hana sara ngeita pe anga ae ta!” mani na nameinu ta lungsa ah ril.

6Jisuna rillea, “Ma lu tullu ha ae shu oh eko trongno oh, ejeranga namei hata nangei na lung olpi ah chau? namei nu na kataranga ehakta ahra tullu lu pi so ae. 7Sara ngei ha apha chang honna nangei hitta am ha ange hana nangei dit apha hana nujuija nangei na san na ngei ae. Chuti weta kei chu apha chang honna nangei hitta am ha ang nonge. 8Namei nu hana mane ha ae so ae. Namei nu ha katak chung ariem hoi sirik sopi hi keita ui ranga mahalla dang pi ah ae. 9Atun keina adiek rou rilinge simlei chung hoi ram ma ahra rou ril juija namei nu hana ma ae hikom rillo, namei hata angei thei ranga ae kom ril ranga ae.”

Judas Na Jisuta Sonloh

(Mit. 26:14-16; Luk. 22:3-6)

10Asom ani sunga Judas Eskirot na thiempu ngei chungtekti kolla Jisu manikolla sonloh thingso ae. 11Mani na rou hi thei juija ariem ma amota sum pe ange ta saro ei so ae. Chuna amo na ejongpa tancha ah manita pe ang mo ae ta anna rollea.

Jisu Na Lanpina Bu Arui Ngei Hitta Bakha Na

(Mit. 26:17-25; Luk. 22:7-14,21-23; Jhn. 13:21-30)

12Achol tolno budol reen ahalpa rungnie ah, lanpina kelmo hi that ae chuna Jisu kolla arui ngei na sai ae, “Hoija mun na nangna kanita thing weta lanthukna bakrang innrang amunt sem ang meh?”

13Chuna Amo na manui ani ta hla weta manuita ril, “Hulok hana lutto, hana apa akha na tapot choi weta tui choi am akha tuhlak kange, manu tieng juijo. 14Hana malutna inn hana mitpu kolla sai oh: ‘Ka ocha na rilleh, keina karui ngei hitta lan thukna budon ha hoi peak ka mo ae?’ 15Amo na pot cheilim shu hap ti semsa chung tekti ka alok nangei ta ri pi ange, hana nangei na tamasha ae oh ani taranga.”

16Arui na houphur weta hulok hana thingso akha chu Jisu na manui ta ril makha tuk hlaka manui na amunt hana lanthukna bakrang tama ae so.

17Nani nietakka chu Jisu na arui asom ani hitta tungso ae. 18Manina solhakna doukanga bakha inn ha am lei ah amo na ril, “Keina adiek rou nangei kolla rillinge, nangei kar sunga akha na keita jur ange amo ha chu keihitta bakha aminge.”

19Arui ngei na lung olla apha hana makka mani akha na akha nutienga akha na arengpu ta sai, kei mo ae?”

20Amo na sange, “Nahi asom ani sunga ae, amo hachu kei hitta buhu akha chakka bakha am meh. 21Meesanaopa chu mataranga jiekka shi hana nujuija thing ange. Chuti weta apa atu mo nu meesanao pa ta jurra hou mee chu aol ae nu! Amo ha chu don phur no lea mataranga hella hra ange.”

Atreem Na Reng Budon

(Mit. 26:26-30; Luk. 22:14-20; 1 Kor. 11:23-25)

22Mani na bakka amlei ah, Jisu na budol dom weta jaihra ni ah akha chu ther weta arui ngeita peweta ril, “Lah oh na hi katak kae.”

23Hana tuidon lah weta jaihra nie ah manita samso, akha chu manina inn so. 24Jisu na manita ril, “Nahi nangei lim taranga saro eisa kathee san tolpi ae. 25Keina adiek rou nangei kolla rillinge, Chungthieng athar rengram ma tungmalim chu keina nangei hitta drakkha ra tui een ha pha ang nijo weh.”

26Mani na laasa weta chulphoi mulbunga thingso ae.

Pitar Ngai No Na Ah Jisu Na Rouma Ril

(Mit. 26:31-35; Luk. 22:31-34; Jhn. 13:36-38)

27Jisu na manita ril, “Nangei lim pa ahlem ma tul ange nahi jieksa so ae; ‘Chungthieng na kelmo rungei ta thattange, hana kelmo ngeina adang adang hran nange,’ 28chuti weta karingthou juija keina nangei matienga Galily ah thing ange.”

29Pitar na rilsuk chu, “Manilim na ahlem kutchunga tulhalkom, kei chu tullang nonge!”

30Hana Jisu na sange, “Keina nakolla adiek rou rillinge, oh ae awoni jantienga arhongpa na woini hung matienga keita nangna woithum ngai num mang no che ae.”

31Chuti weta Pitar na lea ah lea ah ril, “Ejonga keina nang hitta thit ha phao sunga kom keina nangta ngainum no ae ang nonge!”

Hahekta adangei nakom hahekta mani na rillea.

Gethsemany Ah Jisu Na Niekna

(Mit. 26:36-46; Luk. 22:39-46)

32Gethsemany amuntna manina thinge, akha chu Jisu na marui ngei ta ril. “Hina hakko kanieklei pha sunga.” 33Arengpu na Pitar, Jacob, akha chu Johon ta rui weta amo na lung olla solhla nea nijo weh. 34Jisu na mani ta ril, “Ka muihla hi aol na lella wa ah kathit rang pha olsinge. Hina am hakkou oh, akha chu dong ratto.”

35Aram ahuite lella thing weta, alei chunga tu ah amona ngeileh chu apha hi kakol hai thou lal pi oh ta nie ae. 36“Abba, Pathieng,” amo na ril, “Eheilim hi nakolla chu ngainoti am no ae. Chuna kakol hai thou wa tuidon hi lapi oh. Chuti weta kahal ano lutta nahal changpi oh.”

37Hana amo na arui ngei am na maleh pa chu jalhappa am tuk hlakso ae. “Simon, Pitar ta koka ril, nang jalla am ma chou? apha atan te phao dongthei ah am nea no chou?” 38Amona manita ril, “Dongthei ah nie ah ta lea chu ahlem na nangta nea ang no ae. Muihla na chu di halkom pum na chu nea no ae.”

39Woiha pakom amo na niek ranga thing shil so, amona chap mana ah ril shil. 40Woihapa maleh sirjuija mani jalla am tuhlak kae ti chu mani mit hi ehekta rit so. Chuna manina amo ta ejongpa rillang mo dangthei nijo weh.

41Woithum sunapa maleh chu manita amona rillea. “Atun phao sunga inn num ma solhla ah am chao? ngaiso ae, apha ha wa so ae an no. Meesanaopa ha pakchel ngei kut chunga jur so ae. 42Thoujou oh, ani na thingsai oh. Ann oh keita jur ang pa ha hi so ae!”

Jisu Ta Mant Na

(Mit. 26:47-56; Luk. 22:47-53; Jhn. 18:3-12)

43Amo na tronga amlei apha hana makka asom ani sunga Judah hi rouphun ocha ngei lea chungtek ti thiempu ngei akha chu ulien chang na hla wairul rija karra champsai akha molsum choija waso ae. 44Arengpu ta jurpa na mani ta amel dang ranga rou takka rillea. “Keina abe kachup apa ha ae huppo akha chu amota nangei na hrabakta hakka ruija thingo.”

45Jisu kolla mathinga Judas na rillea, “Rabbi!” hana amo na chup ae. 46Hana mani na maituk hakka Jisu ta mant weta hupso ae. 47Mani karra aneite ngirra am akha ma champsai sat weta achunga donga am thiempu ngei rui akha hana akur tan so ae. 48Jisu na rillea, “Kei hi aruthei ngei lamkai hekta, nangei na champsai akha chu molsum tolla keita mant ranga phao chau? 49Rungnie chang honna keina nangei hitta mokna inn sunga chupi takpi ka-am lei chu nangei na mant no chao. Chuti weta nahi jieksa rou ha shukpi ranga ae.”

50Marui lim na amota houphurveta tan hap so ae.

51Rungthar akha na mapun mani salla matakka mukka punpai pai weta Jisu nutieng jui ja wakpa chu amota mani na mant rang ae so ae. 52Chuti weta amona anutienga apun houphurra punsalla tan na thingso ae.

Ulien Changei Bomtulna Ah Jisu Ta Rou Ril

(Mit. 26:57-68; Luk. 22:54-55,63-71; Jhn. 18:13-14,19-24)

53Manina Jisu ta rui ah thiempu ngei, alok ashai hana chungtekti thiempu ngei lim akha chu rouphun ocha ngei hitta bom tulhaso. 54Aram alah takka Pitar kom manujuija wa ah chungtekti thiempu ngei rui shanga ulien chang ngei karra sermei am na onga am tollea. 55Chungtekti thiempu ngei akha chu ulien chang ngei na Jisu hi thi ah ngei ae ta adiek rou jonge chuti weta mani na ephao tukno ae. 56Mani leima tam na Jisu chunga dieklou rou rillea chuti weta mani rou lim kom adang adang so ae.

57Hana mani ahre na ngir thou weta Jisu chunga dieklou rou ril shukkae. 58“Keina malmashi na shak mokna inn hi hri weta rungnie nathum sunga malmashi na kutta shaklou inn akha sa nea ange ta kani maril theipha unge.” 59Chutiphao sunga mani rou hi adang adang songe.

60Hana chungtekti thiempu na mani maikunga ngir thou weta Jisu ta rou sai, “Nangna kani rou hi sangpi ang nijo che? na malmashi ngei na nachunga rou rilla am hi?”

61Chuti weta Jisu chu hata ephau sang no lutta dai diekta am meh woihapa chungtekti thiempu na rou sai ae. “Nanghi jaihra Chungthieng sanao Messiya ah che?”

62Jisu na rillea “Kei inge,” “Akha chu meesanaopa na ene-ne akha hana changtieng nakka ong weta thangwan hai thou wa sumphai karra jung ha ri ange.”

63Chungtekti thiempu na maling lut therra ril so, “Hina chunga anina ejeranga makolla rou sai ang am meh?” 64“Nangei na Chungthieng ta hija sathi ril hi, ejong nalung hal the chou?”

Mani lim na amo chu thi ah matik cha ae ta rillea.

65Hana mani na achel amota shakka thouso, akha chu amai hump ma kut chumma phetta rillea, “Atu na nangta phet mo ae!” hana amota songkar hak ngeina bang nga amota rui thing so ae.

Pitar Na Jisu Ta Ngaino

(Mit. 26:69-75; Luk. 22:56-62; Jhn. 18:15-18,25-27)

66Pitar na innthui hana am lei ah thiempu hina rui nangak akha ma am na wa so ae. 67Nangak hana Pitar na sarmei onga amna nei ah wa weta amota, nangak na ril. “Nangkom Nazarate ta Jisu hitta am mee no meh.”

68Chuti weta amona ngainum no wa rillea, “Naril rou hana ephao dang nonge akha chu lunghal kom thei nonge.” Amo na ril weta inn lutna tienga shukka thingso ae. Hana arhongpa na hung so weh.

69Rui nangak hana woihapa amota ripa chu ngirra ahul tunga am ngei ta ril. “Na mee hi kom manu jui mee ngei karra akha ae.” 70Woihapa kom amona ngainum no ae. Apha atan te waitakka chu aneite ah ngirra am ngeina Pitar ta rillea, “Nanghi routakka mani karra akha ange, rouram chu nang hi Galily mee ae.”

71Amo na matak mathei chakka sarkou thou wa akha chu saro ei weta “Kei na dang nonge na apa hina rou ah tronghlak hi.”

72Apha hana makka arhongpana woini hungso ae. Hana Pitar na Jisu na matarang ril phur ha angei thei so ae, “Arhongpa na woini hungma tienga nangna keita woithum ngai ang no che ae.” Chuna madang pha juija alung tonga trap thouso ae.

Currently Selected:

MAK 14: CHOTBSI

Highlight

Copy