MAK 12

Darkha Innkul Roumushuk

(Mit. 21:33-46; Luk. 20:9-19)

1Hana Jisu na manita roumushuk changa ril thouso; “Apa akhana darkha innkul akha ah ahul tunga numtuk weta, Darkha tui som rang alei hur chao ae akha chu taiten kang shaphur ae, drakha mahun ha shella haophur ra inn hla weta rama adanga thingso ae. 2Chuna mapha pha ah wakjui chu drakha eenkul sunga ara hom manga amo na masuukta innkulla tullu lu ang meengei hla so ae. 3Chuti weta mani na amota mant na phitta kut rukka lehpi so. 4Hana amona adang asuuk mani am na hla pa kom; mani na asuukpata aluwa phitta kuipi weta atri pi ah ajak tukka lea so ae. 5Chutiphao sunga amona adang hla songe hana akha hatakom mani na that so ae. amona adang atram ta kom phitta adang ta chu manina hla so ae. 6Mahla lou akha chu am songe, ‘ha chu ehakta makolla malungshit sanao ae, amona chetta ngoiring asanaopa chu mani na ajak atri ange ta atreem na ah hla so ae.’ 7Chuti weta mahunna am ngei mani akha lea akha na hitta ril hlakka. ‘Hi so weh mahun mitpu sanao pa, chuna wa oh anina amota that ei oh, hana mapha phung shuk eja ani na chang ei oh!’ 8Chuna mani na amota mant na that weta, darkha mahun au-wau ah denga hou so ae.”

9“Drakha mahun amitpu na ejongpa tullu lu ang sha?” “Amona mahun na phao weta mahunna tullu lu mee ngeita that ta mahun ha mee adang ta pe hou ang no meh. 10Nangei na jiek shi ha dang sho chau ae?

‘Inn sha ngei na ngei no weh alung ta

housa naha mak hana lella hratek ti change.

11Nalim pa hi arengpu lu tullu chak sa ae akha chu

nahi ani mitta chu angakpi akha ae!’ ”

12Chuna Jihudy lamkai ngei na Jisu ta mant ranga anna rollea, ti chu Jisu na manita roumu shukka rilsha rukka ae chuti weta wairul rija ta atri jarra; Jisu ta hou phur weta mani na thingso ae.

Shel Pekranga Sai Rou

(Mit. 22:15-22; Luk. 20:20-26)

13Anutieng chu Jisu rou ril nu juija amota mant ranga Phraisi ngei lea Herod ralmee ngeita Jisu kolla hla so ae. 14Mani na makolla wa weta ril, “Ocha, nang chu adiek rou ril che ae kanina dang unge nangchu eichang eivoi nei no ae rou ram chu nangna atu ta kom an no ah Chungthieng adiek rou hi diekka takpi ae, chuna kanita rillo, Kaisar rengpa kolla sum pekhi rouphun na ngei no wa meh? kani na manita pe ang mo pe ang no meh?”

15Chuti weta Jisu na ahra sa rou dangpha ah, “Eje ranga keita chang mant ranga do ah chao? Dinaris choi ah wa oh an tikkae ta” Jisu na ril.

16Chuna mani na sumnoi choija phao pa chu Jisu na mani ta sai. “Nahina chunga jiekka shi mel rung hi atu meh?” “Kaisar’s” ae ta mani na sange.

17Manita Jisu na ril, “Kaisar pha phung shuk na Kaisar ta pe oh. Hana Chungthieng ta hakom Chungthieng na chang su oh.” Hana mani na Jisu ta angak shukkae.

Athi Haithou Wa Ringthou Na Sai Rou

(Mit. 22:23-33; Luk. 20:27-40)

18Athi ringthou am no ae ta rou ril Sedukise ahre ngeina Jisu kolla phao weta rou sai ae. 19“Mani na sai Ocha, Mousi na kani taranga hita jiekka shi phur ae: ‘Ejonga uleh nao ngei karak sunga mata na asanao pokno lutta thija anamei ta houphur lea chu anao pa na arong nu ta anamei shakka nei weta mata pa taranga asanao don ngei ae.’ 20Uleh nao apa chak sari am phur ae; ulien tek ti pa na namei nei weta asanao don nolutta thi so ae. 21Hana ani sunapa na arongnu ta nei ser juija amo hakom asanao am no lutta thi so weh, hahekta inthum suna pakom thiso ae. 22Routakka mani uleh nao sari mak na asanao akha phao am no lutta atreem na chu namei nu ha kom thi so ae. 23Ringthouni rungni ah chu namei nu ha mani kar sunga atu namei chang ang meh? rouram chu uleh nao sari makna amota nei hao phur sou chu?”

24Jisu na manita sange, “Nangei na jieksha rou akha chu Chungthieng hina ane jaitha ha dang no chao, hina taranga nangei na lal no wa chao? 25Chuna athi sa ngei na ringthouni chu mani na nuhla pamhla am mang no ae; hana mani chu wanram ma wanrui ngei hek ti ange. 26Hana athi sa ngeina ringthouna rouram ma Mosi abai sunga jiekka shi hi pa no the ah che, aponbil maitung sunga, Chungthieng na amota alota rilsha, ‘Kei inge, Abraham hina Chungthieng, Isak hina Chungthieng, akha chu Jacob hina Chungthieng.’ 27Chungthieng chu athi ngei Chungthieng no ae, aringei Chungthieng sa ae nangei na ripta lalla am so chau ae.”

Loktekti Rakit Rou

(Mit. 22:34-40; Luk. 10:25-28)

28Rouphun ocha ngei kar sunga ngeitu hlak ha Jisu na thei pha ah mani ta hrabakta sang pi so ae, “Rakit lim karrakka hoipa na chungtekti mo ae?”

29Jisu na sangso, “Chungtekti akha ha hiso weh: Isarel ngei oh theijo, ani Chungthieng rengpu hi arengpu akha chakkae. 30Hana narengpu Chungthieng ta nalunglimpa hana namuihla limpa akha chu nahal limpa hana narat nathei limpa na lungshi ang nga ae. 31Ani sunapana na inn-ning tul tieng ta natak mak hekta lungshi oh, chuna hita hella loktekti rakit am no ae.”

32Mee hana sange, ehekta hraso weh, “Ocha! Chungthieng akha chakkae naril rou ha adiek takka atu adang am no ae. 33Thin lung limpa akha chu dangthei limpa hana muihla limpa akha chu jaitha limpa akha chu inning tultieng ta matakmak hek ta lungshi hina hella mei ah holla pek akha chu rithoi liem pa karra chungtek kae.”

34Chuna amona lungsin shukka sang Jisu na ri weta amota hita rillea, “Nanghi Chungthieng rengram hai thu aram lah ah am no che ae.” Hana nutieng hai thou wa atu akha na Jisu ta sai nijo weh.

Messiya Maram Ma Sai Rou

(Mit. 22:41-46; Luk. 20:41-44)

35Mokna inn sunga Jisu na chupi takpi ah am leija amo na sai, “Alota rouphun ocha ngei na Khrista hi David sanao ae ta rilla meh? 36David matak makna muihla athieng na rou thienga tronge:

‘Arengpu na karengpu ta rillea:

nangta anda mee ha nakae tro ma

liem ma kachangtienga ongo.’

37David matakmakna amota ‘Arengpu’; kokkae alo ta chu amo na masanao pa chang ang meh?”

Jisu Na Rouphun Ocha Ngeita Hin

(Mit. 23:1-36; Luk. 20:45-47)

Hana mee eja na marou ril ha ariem ma ngei num meh. 38Areng Jisu na manita chupi ae, amona ril, “Sonjello rouphun ocha ngei ha linglul achulpa hanum ma ha weta mee ngei na rachon na ah ajak atri pi num meh. 39Hana synagogue sunga bu don na ah kom ajak atri mee chang nummeh. 40Mani na Arongei inn sunga ahra sha ah manita ru ranga shotta nie ae. Mani na mamaral atripi makhai pha ange.”

Arongnu Dorra Pek Na

(Luk. 21:1-4)

41Jisu na mokna inn sunga ong weta malmashi ngei na alo ta dorra pe mota anna amlei ah achong areng ngei na atam dorra hou phur ripha so ae. 42Chuti weta arong nu na chu sum noi ani te ha chu thall houphurre. 43Jisu na marui ngeita makolla kokweta ril, “Keina adiek rou nangei kolla rillinge ha chu na arong nu na houphur hina malmashi adang ta lella houphur so ae. 44Mani na pekka am chu mani chong reng chunga pe sa ae, chuti weta na arong nu na mapek chu masara chunga maring ranga shi eheilim pa pe so ae.”

Currently Selected:

MAK 12: CHOTBSI

Highlight

Copy