LUK 7
7
Jisu Na Rom Offisar Suukta Dampi Na
(Mit. 8:5-13)
1Jisu na nalimpa hi malmashi ngei kolla rilsu nutienga amona kapharnahum tienga thingso. 2Rom offisar na ehekta lungshit suuk akha thi ang makhai ana ah amunt hana am. 3Rom offisar na Jisu hina rou theijuiya Jihudi ulien chang ngei ta suuk akha dampi phao ranga jongpi hla so. 4Mani na Jisu kolla tungjuiya lung thienga ril, “Na spa hita sanna matik cha ae. 5Amo na kani lim ta ehekta lungshi ae, akha chu amo mak na kani taranga synagogue kom sapi ae.”
6Jisu na mani hitta thing ha juiya mani inn leima nei ah wakjuiya offisar hana atonpi ngei ta Jisu kolla hla weta rou rilpi, “Arengpu oh, nangna katrongsan sarrukka kakolla olla na wak kang ha kei ephao matik cha mee nonge. 7Chuna hijong sarukka kei phao sunga kom nakolla wa matik cha mee nonge chuna dam jou oh ti narou ril te chak na kom kasuuk ha dam mange. 8Keikom ane angam spa akha inge chuna ralmee kathuiya shi ah akha ta na thingo ril lea thing, hana akha tana wa oh ta rilleh wa! ta am ming, hana kor ngei ta kom hi ae oh ta rilleh hata mani na ae sa ae.”
9Jisuna rou hi theijuiya amona angak shukka amai wul weta manutieng jui wairul riha ta ril, “Keina nangei maikunga rilla aminge hiyongpa amona mangoiring hi Israel sunga phao rino songe!” 10Rouron na rol suuk na mani offisar inn lam maleh juiya asuukha dam ma am tukhlakso.
Jisu Na Arongnu Sanaopa Ta Ringthoupi Na
11Jisu ranga Nain ti hulok akha ah arui ngei hit akha chu ehekta tam wairol riha ngei hitta thing. 12Amona mani hulok innlamhar matung juiya athi rui se meelim ta riso. Athi spa ha chu arongnu na spa akha chak don sa ae. Chuna ehekta tam wairul riha na mamutieng juija am. 13Arengpu manu mel rijuiya alung sunga ringrei ngei thei ah amo na ril, “Trap no oh,” 14Jisu na wa weta khu ha tham pa chu khu ronna am ngei kom ngirso. Chuna Jisu na ril, “Oh rungthar thou oh.” 15Athi spa ha ongthou weta rou ril thou so. Chuna Jisu na manu ta pe so.
16Mani hana am makhai na atri ah akha chu Chungthieng ta riemma domso, “Ehekta arat athei rouphupa akha ani karra shukso ae!” Mani na ril. Chungthieng ha mamee ngei ta sanpi rang jungso ae.
17Na Jisu hina rou hi mani inn ningkolla akha chu ram lim ma thangso.
Johon Baptias Pa Rouron
(Mit. 11:2-19)
18Johon arui ngei na hina rouram ma makolla ril juija, amona mani karra mantei ta kokka, 19Arengpa kolla amo na rousai ranga hla, “Johon na ril jung ang so ae ti ril mee ha nanga mah, ano lea kani na atujong akha ta hak kang meh?”
20Mani na Jisu kolla pha juija mani na ril, “Johon na nakolla kanita rou sai thingo ta hla ae maril mee ha nang ah cha meh, anoleh kani na atujong akha ta hakka am mang meh.”
21Hana lei apha hana makka Jisu na malmashi ngei rai eja ta dampiah akha chu hrano muihla eja ta julla mitcho eja ta ri pi ae. 22Jisu na Johon hla rouron ngei ta sanga hla so. “Nangei na lea weta Johon kolla nangei mitta ri akha chu theipha mitcho na rine akae tik mee na thing hana atripi rai eja ta dampi akur set ngei na theipha athi sa na ringthou akhu chu sara ringei kolla routhar sam hina rou lim hi rillo. 23Keita ephao lung chingna nongei chu eja ah jaihra meh!”
24Johon rouron ngeina thingsu waitakka Jisu na Johon rouram ma wairul riha ngei kolla rouril, “Ramrukka nangei na shukka thingjuija echu ripha ang chao? Thirang rang juija linga am ha mo ae? 25Hana nangei na ejongpa ri enge ta thinga chau? Anal pun sunga? Hajong punchoi dirchoi ngei chu reng hun am mange! 26Nangei na ri ha kakolla rillo? rouphupa? adiek takkae, nangei ri ha rouphupa ta helleh richou ae, 27Johon hi ae jiekka shi rou hana ril: ‘Chungthieng na ril, kei na nangei taranga lampi sattang ha matienga karou ron akha hla ange.’ ” 28Chuna keina nangei kolla rillinge, “Mee ngei na don sanao lim karra Johon ta hella alok am no ae chutichun Chungthieng reng ramma chu sintekti amona nakolhai thou wa loktekti ange.”
29Chuna makolla rou thei lim na hana chunga khasana hrai ngei na Chungthieng na adit tullu lu ah Johon kolla baptias ae. 30Chuti weta Pharisis akha chu roukung hina ocha ngeina Chungthieng ahal ha ngei num no ah Johon kolla baptias ae no ae.
31Jisu na ril, “Atreem no ae atunrija mee ngei hi kei na atu ngei kolla an hlakkang mo? mani hi ejongpa ehekti mo nu? 32Mani hi unga ngei Kaithil hou wa onga am ngei hek ti ae, abom akha na au hlakka abom akha ta kanina nangei taranga lunghungna ariem na hungrasam tum unge chuti weta nangei na lam no chau! Kani na mee thit na laa sa unge chuti weta nangei na trap num no chau! 33Johon Baptias na phao weta bak no ae akha chu darkha tui kom in no ae chuti weta nangei na, ‘Amo hi dijabol lut so ae ta ril chau!’ 34Meesanaopa na phao ah bakka inna amjuija kom nangei na rilleh, ‘Anno spa hi! karam peicha ae, hana khasana hrai ngei tonpi ae akha chu adanga phaija ta mee ae ta hal chao!’ 35Chungthieng lungsin lungwar lasil meelim ta chu adiek ha ri pi ae.”
Jisu Na Simon Pharisis Inn Na
36Jisu ta Pharisis na amo hitta bu bakha ranga kokka, Jisu na inn hana thing weta bakha so. 37Hana hulokka ehekta pakchella ringa am snu akha am, snu hana Jisu Khrista Pharisis inn sunga bakka am meh ta mathei juija alabastar ariem ahoi siktui choija phao. 38Jisu kae kung nungtienga ngir weta mitui shukka tappa akae chunga mittui lim ha tulla hana amo na asam takka ru-wa hou wa mani ta chuppa ariem ahoi tui hana mani chunga sungpi so. 39Pharisis na nahi rijuija mathei chakka amona ril.
“Ejonga na malmashi hi adiek takka rouphupa ah lea chu amota tonga am snu hi atu meh ti danga ngei ae; amona pakchella ringa snu na ae hikom dangpha ngai ae!”
40Jisu na rou ril shuk so, “Simon, keina nakolla ejongpa ril numinge.”
“Ocha oh,” amona ril, “Keita rilpi oh,”
41“Apha akha ah spa ani na sumpuk ranga achongpu kolla niek,” Jisu na ril thou so. “Akha na rijanga don na akha na som nga pu so. 42Ani makna manui puk sum ding nea no wa chutihal kom mitpu na chu animak ta map ae pi so ae chuleh chu manui ani sunga atu na hella lungshi tekkang mo?”
43Simon na sange, “Keina ejonga sanga taleh chu,” “Sum tam tekti don pa ta kok pipa ha ae.”
Jisu na, “Na ril hamak ha rou takkae.” 44Chuna Jisu na snu am na tienga hai lea weta Simon ta ril, “Hi snu ri so che? Nangei inn na kaphao hi nang na chu kakae sillang tui pe no che, chuti weta snu hina chu hitta silranga amit tui tulla hana asam takka kakae chunga amittui ru wa hou ae. 45Nangna chu keita ariem lam tuk phao ae num no lei ja amona keita atreem am no makhai kakae ting chung chop chan no ae. 46Nangna chu kalu tai rang churphone siktui pe no che, chuti weta snu hina chu kakae limpa kom ariem hoi siktui ah tuipi. 47Chuna sarukka keina nangei kolla rillinge hija tam snu lungsit na mapak eja tam kom silpi so ae chuna atujon na atom te lungshi lea chu mapak kom atom te chak silpi ange.”
48Chuna snu ta Jisu na ril, “Napak lim ko silpi ange.”
49Hana ong tolla am ahre na mani thei chakka ril, “Nahi atu mo nu, amona pak phao silpi nea ae?”
50Chuti weta Jisu na snu ha ta ril, “Nangoiring jarra nang chu sanpi pha so ae chuna adai ah thingjou oh.”
Currently Selected:
LUK 7: CHOTBSI
Highlight
Share
Copy
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
