LUK 8

Jisu Hitta Rolha Snu

1Apha atante nutienga Jisu na hulokka akha chu husunga thing weta Chungthieng rengram tarang routhar sui ah rolla, arui asom ani nakom amo hitta thing ha ae. 2Hana hrano muihla na jetta rol dampha akha chu rai eja dampha snu ahre akha chu dijabol sari makol hai thou wa julla hla snu Mary (Madalini ta kok) kom tol lea. 3Reng Herod’s hlou ronna am offisar Chuza namei Joanna, akha chu Susana, hana namei adang ahre mani thei chakka am adon hana Jisu akha chu arui ngei ta sanna am meh.

Muchi Wurna Panteem

(Mit. 13:1-9; Mak. 4:1-9)

4Jisu am na atreem am no wa phao ae hulokka matheng mathenga chuna wairul riha na bomtul juija Jisu na napanteem hi ril:

5“Apha akha ah spa akha na muchi hita mawor juija, hita loupukka mathe juija ahre na lampi ah kae to na ah tulla awa na sar so.

6Ahre na alung abom chunga tulla ajiek adon shukka tau ah hange chuti weta alei atam am no jarra charra thingso. 7Ahre na chu aling abom sunga tulso. Mani ha tau wa hang halkom hata suon na thi so. 8Chuna muchi ahre chu ahra lei ah tulla muchi akha na amal riha ra ae.”

Nahi ril weta Jisu na atreem na change, “Akur am lim pa na thei su oh!”

Panteem Hina Adien

(Mit. 13:10-17; Mak. 4:10-12)

9Arui ngei na Jisu ta sai panteem hina adien, chu e meh. 10Jisu na sange, “Chungthieng rengram hina athup rou hi nangei kolla pe so ae panteem hina, nangeina an halkom rine no, ngai halkom lungkim thei no.

Jisuna Muchi Worna Panteem Hina Adien Dangpi Na

(Mit. 13:18-23; Mak. 4:13-20)

11“Panteem hina ril na adien chu, muchi chu Chungthieng trongsan ae. 12Lampi jai ja tul muchi hina dangna chu, rou thei chu thei weta hra no na phao wa mani lung sunga sanpi phana akha chu mani ngoiringa am rou ru wa thing ha ae.

13Alung chunga tul muchi hina dangna chu rouril ha theiveta ariemma la weta apha atante tarang chakka ngoiring, hana chang an juija chu manina dangne no ae rou ram chu atro thukka tou no sou chu. 14Aling abom sunga tau muchi dangna chu, rou ril thei chu theiveta mani achong areng rang taranga akha chu mani ringchang ahoi adi taranga olla hal chuna manina ephao ara lei pha no ngei ae muchi na tau weta alingna jetta ra nea no ae. 15Ahra alei chunga tau dangna chu rouril theiveta mani lung sunga ril juija mani na ara ra malim phao wa dongne ha ae.

Tai Thuija Awar Na

(Mak. 2:21-25)

16“Atu akha na awar ta hlum ma tai thuija akha chu kotkang thuija si no ae, hana si ang hutta adoi na chunga si ae, chuleh chu meelim pana mawar ha ri weta inn sunga lut nea ae.

17“Chuna thuppa si ang ephao am no ae, hana dang ang no ephao am no ae.

18“Chuna sarukka nangei na cheksilla am mo. Rouram chu atu jongpa kolla ma am chunga lella happange, hana atu jongpa ephao am no mee makolla am ahre te phao choija thing ange.”

Jisu Manu Lea Manao Ngei

(Mit. 12:46-50; Mak. 3:31-35)

19Jisu ma nu lea manao ngei na makolla phao weta wairul riha kar sunga mani na lut nea no am ma, 20Mani kar sunga akha na Jisu ta ril, “Nanu lea nanao ngeina mangta ri num ma awao wa ngirra am meh.”

21Jisu na mani limpa ta ril, “Kanu akha chu ka-u-kanao ngei chu Chungthieng rouril theiveta jui ngei ha ae.”

Jisu Na Tuijul Ta Solhlapi Na

(Mit. 8:23-27; Mak. 4:35-41)

22Nahani akha ah Jisu na arui ngei hitta kung sunga lutveta manita ril, “Ani na tuikunghi lalveta kotiengpa aralla thing ei oh,” chuna mani na thing thou so. 23Hita mani kung thou wa thing juija Jisu jalnum ma en so, edang dangno wa akal thirang akha tui kunga ranga thou wa kung ha chu tui sunga luppang thou so. Chuna mani lim pahi ati pi asih akha am so. 24Arui ngei na Jisu am na wa weta hranga ril, “Arengpu oh, Arengpu, oh! Ani hi thi ang ae am so!”

Jisu na thou weta akal thirang tuijal ta trongsan ril, chuna thirang ha daija solhla so. 25Hana Jisu marui ngeita ril, “Hoi meh nangei ngoiring?”

Manina atri angak shukka mani masel rilhlak so, “Nahi ehekti spa monu? Matrongsan hi thirang tuijul na kom maril jui ae!”

Jisu Na Dijabol Am Meeta Dampi Na

(Mit. 8:28-34; Mak. 5:1-20)

26Chuna Jisu lea marui ngeina thou wa Gerasy Galily ral ha tienga tungso. 27Jisu na kangpal hana tungleh dijabol na jetta am spa akha hana hu wa am akha tukhlakso. Na spa hi apha sotta apun ani salla inn na am no wa hlanbung chunga akha chu mulla rolla am meh. 28Amona Jisu mel rijuija sanrol shukka aou, weta mathei chakka Jisu kae kunga tu weta hita aou, “Lok tekti Chungthieng sanaou Jisu! Keita nangna ejongpa dija che meh? Keita aol ana pe no oh ta nija aminge!” 29Chuna Jisu na spa kol hai thou wa hrano muihla julla hou ranga trongsan pepi. Hrano muihla hana apha atampa mant na shi ae chuna mee ngei na amota thirui ja amo ta thingno ranga ren na shi halkom makolla am hrano muihla na chat pi weta ram rukka rui ja thing ae.

30Jisu na amo ta sai, “Naming alo ti meh?” “Ka ming chu Mob ae,” amona sang, rouram chu dijabol atam pa na kakol la am ae. 31Hana dijabol majam na Jisu kolla kani hi atreem nei no kum ma jalla hla pi no oh ta nie ae. 32Hana ningkol mullon akha ah voksella pa na sella am na ah dijabol na kani hi vok ngei sunga lut tuk kae ta Jisu kolla niek pa chu Jisu na hana lutto ta mani ta lutpiso. 33Mani na spa kol hai thou shukka thing weta vok sunga lutso. Chuna vok limpana ahai rakotta tanna jungveta tuikung sunga lutso.

34Voksella am pana shukka am riveta hulokka enkul ae ja am mee ngei kolla rou hi thangpi so. 35Malmashi ngei na kom shukka am hi an phao wa Jisu kolla mani wakjuija, dijabol na ruija rol spa ha Jisu kae kunga apun ani tolla akha chu hrabak ta ma am rijuija mani limna leima ti so. 36Spa hana damma am ri meelimna alota dijabol na ruija rol mee na damma meh ti ha takso. 37Chuna ramtienga am meelim pana atri hei sulla Jisu ta mani karra am no ranga julla Jisu na kung sunga lutta manita phella thingso. 38Dijabolna hla phur spa hana Jisu ta hita nie. “Kei nang hitta thing ha tik kae”

chuti weta Jisu na amo ta hita rilla hla. 39“Na inn lam tienga lea weta Chungthieng na nangta alota ae mo ti ha ril thingo.”

Spa hana hulokka thing, thing weta Jisu na makolla alo ta ae mo sui thingso.

Jairus Sanaonu Akha Chu Jisu Linglut Tong Snu

(Mit. 9:18-26; Mak. 5:21-43)

40Jisu na adang tuirel kangpal tungjuija malmashi ngei na amota ariem lam tuk ke, rou ram chu mani na amo ta hakka am sarukka ae. 41Hana Jairus ti spa tunga amo na Jisu ma inn na tung ranga Jisu kae kunga athei chakka tuveta nie ae. Amo chu mani ram sunga synagegue ka offisar akha ae. 42Rouram chu akum asom ani chak su lim ti asanao nu akha ha thija am jarra, Jisu na amo hita thing ha ah malmashi ahulla am lim pana makolla bomtul so. 43Mani kar sunga kum asom ani leima olla athi shukka anna am snu akha kom tol lea. Madon manei lim pa kom doctor kolla pethinga adam am no ae. 44Snu hana wairul riha nungtienga wa weta Jisu linglut ahou wa tonga hana apha makka athi shuk chan so. 45“Atu na kei ta tonga mo ae ta Jisu na sai?” Meelimpana ngei nun no ae, Pitar na ril, “Arengpu mee ngeina ahul tunga nokolla am meh.” 46Chuti weta Jisu na ril, “Atu na mo akha na keita tonga kakolhai thou wa jaitha shukka thingso ae.” 47Namei nu ha thuppa ngei ang ni jo weta halla leima hirra mathei chak Jisu kae kunga tu wa hana am meelim maikunga amona rilsukkae, alo sarukka amona tonga mo, hana alota amona woiha chaka damma mo ril ae. 48Jisuna namei ta ril, “Kasanao nu oh, nangoiring jarra nangna dam so che, chuna daija thing jou oh.” 49Jisu na rou hi rilla ma am leija offisar in hai thou wa rou choija phao ae, “Nasanaonu ha thi so ae, Jairus kolla ril.” Chuna arengpu ta olpi no sa oh. 50Chuti weta Jisu na Jairus kolla rilla am theipha ah ril, “Ephao atri no oh, ngoichak ngoiringo amo ha hra ange.” 51Jisu na inn ha matung juija amona atu akha phao manutieng juija lutpi no ae, Pitar, Johon, Jacob akha chu unga hana manu mapa ano wa. 52Hana am lim pana unga hana taranga olla tappa Jisu na ril, “Tap no oh; unga ha athi ano ae eenna am ma ae!” 53Manina Jisu ta nuiso ae, rou ram chu manina unga ha thi sa so ae ta dange!” 54Chuti weta Jisu na makutta namei sanao te ta kai ah kal weta kok, “Thou oh kasanao!” 55Namei sanao te ringchang woiha lea ah ringthou wa Jisuna manita ejongpa bakpiranga trongsan ril. 56Manu mapa na angak shukka chutihalkom Jisu na manieta shukka am hi atu akha kolla ril no ranga trongsan pe.

Currently Selected:

LUK 8: CHOTBSI

Highlight

Copy