LUK 6

Sabbath Rungnie Hina Sai Rou

(Mit. 12:1-8; Mak. 2:23-28)

1Sabbath rungnie ah Jisu na sangloupok ajaija samma mathing juija, marui ngei na sang sui mal la mani kutta hlik weta chip thou so. 2Pharisis ngei na sai, alo sarukka ani rou kungna sabbath rungnie ah ngei no tullu lu ah chao?

3Jisu na manita ril, “Nangeina pa no ah chao David na ae marui ngei hitta wantam juija amo e-ae sha? 4Amona Chungthieng inn sunga thing weta Chungthieng taranga pekkashi budol la weta bakka, amo hitta am ha malmashi ngei ta kom bakpi. Nahi routakka chu thiempu na chak bak phung shuk sa ae atu akhana bak ngei no ae.”

5Hana Jisu na ril, “Meesanaopa na Sabbath rungnie hina arengpu ae.”

Akut Akhatieng Athi Sha Spa

(Mit. 12:9-14; Mak. 3:1-6)

6Nahani Sabbath rungnie adang akha ah kom Jisu na Synagogue ka thing weta chupi takpi ae hana spa akha aban changtieng athi sa akha amphur ae. 7Pharisis ngei lea roukung ocha ahre ngeina Jisu ta maral pekranga ejongpa aral tullu lu ang mo ta Jisu kolla nei ah wa ah amona sabbath rungnie ah ana ta dampi ah am. 8Jisu na mani lunghal dangpha ah spa hata ril. “Ngir thou weta maitienga wa oh.” Spa hana ngir thou weta hana ngir wa so. 9Jisu na manita sai, “Keina nangei kolla dangnum minge: Roukung na anita alo ta sabbath rungnie rou ril meh? San thingo ti mo ano lea amang ata shukpi oh ti meh? almashi ringchang ta sanpi oh ti mo ano lea tuipi oh ti sa?” 10Amo na mani makhai ta ahul tunga an weta spa hata ril, “Naban dokko,” chuna amo na maban dokka makut ha hra so ae.

11Chuna mani lung shukka mani thei chakka Jisu kolla ejongpa tullu lu ang mo ta ngeituhlak thou so.

Jisu Na Arui Asom Anita Halna

(Mit. 10:1-4; Mak. 3:13-19)

12Hana lei apha ah Jisu na mullon na kalla hang weta jantieng chuppa Chungthieng kolla nie. 13Hu wara sanutienga Jisu na marui ngeita makolla kolweta asom ani halla amona manita ming bo. 14Saimon (Pitar ta amona boso.) Hana manao Andrew; Jacob akha chu Johon, Phelip akha chu Bartholomew. 15Mathew Thomas, Alphaeus sanao Jacob akha chu Saimon (Patriot ta makok). 16Jacob sanao Judas akha chu Judas Iscariot Jisu ta jurpa.

Jisu Na Machupi Akha Chu Madampi

(Mit. 4:23-25)

17Jisu na mullon hai thou hal-rouron ngei hitta tumma majung juija manutieng jui wairul riha eja ngei hitta ngir na amunt ahra akha ah ngir so. Judiah Jerushalem Tyre Sidon akha chu hulok ramtieng haithou wa wairul riha bomtulle. 18Mani na phao rou ram chu rou ngei ranga akha chu mani rai eja lim ha hratpi dampi ranga. Hana hrano muihla na jetta am malmashi eja kom phao ah dam pi ae. 19Chuna malmashi limpana Jisu ta tham ranga julla, hina rouram chu Jisu jaitha na shukka mani rai ha dampi so.

Ariem Lea Aol

(Mit. 5:1-12)

20Jisu na marui ngeita an weta ril,

“Sara ngei ha jaihra ae;

rouram chu Chungthieng rengram ha nata ae!

21Atun na wontam pha ngei ha jaihra ae;

rouram chu nangeita won hopi ange!

“Atun na atap ngei ha jaihra ae rouram chu;

nangei ta ariem pi ange!

22“Ariem mang chu nang ae malmashi ngeina nangta atir, nangta ngaino, nangta hrano thuchu, hana nangta hrano mee ae ta ril ange, hi makhei hi meesanaopa sharukka ae. 23Malmashi ngei oh! hajong rungnie pha juija ariem ma lammo, rouram chu thangwan na napha rang ae-na mant ehekta lokka am meh, Papu ngei na hijongpa hi thiempu ngeita kom ae ah hou phur ae.

24“Chuti weta eja ah atri pi mo nu nang atun na achongpu ngei;

nangei na atunna napha num pha so che!

25“Eja ah atri pi nang atun na won hop;

nang wontam ah theng ange che ae!

“Eja ah atri pi mo nu nang atun nui ah am ngei;

trappa aol pha ang che ae!

26“Malmashi lim na nangta ahra rou rilla am hi eya ah ringrei pi ae nang ha; rouram chu hihekta mani mapi mapu ngei na kom diek no thiempu ngei ta ae phur ae.

Anda Ngeita Lungshitna

(Mit. 5:38-48; 7:12)

27“Chuna atujong karil ngei am ngei kolla rilla aminge: nangta anda meeta lungshi oh, nangta anda mee taranga ahra tullu lu oh, 28nangta sarkou ngei kolla jaihra pe oh, nangta utshitno ngei taranga nie pi oh. 29Ejonga nabe akha tienga beng lea chu akha tienga hata amona beng su oh; Ejonga atujong akha na nata coat choi lea chu nalinglut kom choi ngal su oh. 30Nakolla atujong akhana ejongpa akha nie phao lea chu pe ah hla oh. Akha chu atujong akha na nakol hai thou ejongpa pot akha choija thing lea, aleh pi rang rou ril no oh. 31Malmashi ngei ta nakolla na ae pi num hekta, manita nangna kom hahekta ae jo.

32“Ejonga nangta lungshi mee tachak nangna lungshi ta lea alo ta nangna jaihra pha ang che? 33Akha chu ejonga nakolla ahra tullu lu mee tarang chak ahra ae ta lea chu alo sha rukka nangna jaihra pha ang che? hachu pak chel ngeina kom ae! 34Akha chu ejonga nangna sum ding nea ang meeta chak nangna sum pu pi ta lea chu alo ta nangna jaihra pha ang che? hajong chu pakchel ngei na kom mani masum hata pu pi hlakkae. 35Chuna nangta anda mee ngei ta ranga ahra tullu lu jo akha chu lungshi oh; napukpi sum ha ding ranga ephao hal no oh chu lea chu nangna alok mana pha ange akha chu chungtekti Chungthieng sanao pa chang ange, rouram chu ae na lamant dang no ngei ta hrano ngeita kom arengpu na lungshi ae. 36Lungshi thei oh Pathieng na lungshi thei hekta.

Meeta Routreem

(Mit. 7:1-5)

37“Meeta routreem no oh, chu lea chu Chungthieng na nangta routreem ang no ae. Meeta kom aral rilno oh Chungthieng na kom naral Rou rilang no ae, mee maral ngakpi ta lea Chungthieng na kom naral ngakpi ange. 38Ape dol no oh nang ta kom pe ange, shilung lokka napek thingna anu jui ja nangna kom nakut chang makhai pha ange chuna nang na wul na changa Chungthieng na kom nangta wul ange.”

39Chuna Jisu na manita na panteem hi ril, “Mitcho spa akha adang akha ta lamkai nea ang no ae; ejonga amo na lamkai lea chu manui nimak kum sunga tullange. 40Atu rui akha na ma ocha ta hella thei tekno ae, chuti weta rui limpana mani chu mulshu multom juija chu mani kom mani ocha hek ti ange.

41“Alo sarukka nata mitta am tingthou ta an na am che? namitta am tingthou ta masha hal no wa? 42Alo ta nata kolla lungshi ngei ah namitta tingthou lah ah hou tikkae ta rillang che? namitta tingthou la no wa. Chuna ahra sa nangei! masha ah namitta tingthou la su ta lea chu nangna nata mitta am tingthou ha kom hra bakta lah hou nea ang che.

Theikung Lea Ara

(Mit. 7:16-20; 12:33-35)

43“Thingkung hra na hrano theira ra no ae, hana hrano thingkung na ahra theira ra no ae. 44Thingkung lim pa hi ara ra jui ja dange. Chuna nangei na aling abom sunga theichang lei no ae hana aling abom karra anggur kom leino ae. 45Ahra mee na malungsunga ahra ha choija shukkae hana hrano mee na malung sunga hai thou hrano ha choija shukkae chuna murra shuk rou hi lung sunga shi hakta am ha chak shuk kae.

Inn Sha Spa Ani

(Mit. 7:24-27)

46“Alo wa keita kokka che, ‘Arengpu, Arengpu ta,’ karil chu nang na ae no che? 47Kakolla wa meelim akha chu karou ngeinum ma karil jui ngeita keina manita amo hek ti mee mo dang pi ange. 48Amo ha chu alei hur thukka chao wa alung chunga inn sha spa ae. Tuina lokka hang juija inn hana thum ma lut hal inn ha chu ephao ling ang no ae, rouram chu inn ha hrabakta sha thou sa so ae. 49Chuti weta atu jongpa akhana karou ril thei weta juino ngei chu inn saweta akung alung tolno ngei jongpa ae, ha chu tui lokka hangjuija innha tu ange, chuna hajongpa taranga eja ah atri pi meh?”

Currently Selected:

LUK 6: CHOTBSI

Highlight

Copy