LUK 5

Jisu Na Mashatekka Kok Arui

(Mit. 4:18-22; Mak. 1:16-20)

1Jisu na Gennesaret tuikum hou wa ngirra Chungthieng rou rilla malmashi ngei na marou ngei num ma makolla julla wahom leija. 2Amona tuikum sunga kung ani am ri so, chuti weta kung sunga tuiriek mant mee chu mani len sella kung sunga am no ae. 3Jisu na Saimon kungsunga lut weta, tui hou wa kung ella wakranga rilla Jisu na kung chunga onga wairul riha ta chupi takpi thou so.

4Jisu na rou ril su takka, Saimon kolla ril, “Kung hi tui athuk tienga ella lut oh, hana nanui ani na len ha tuiriek mant ranga dengo.”

5Saimon na sang, “Mitpu, janjei shotta kanuina ephao mant nea no ae, chuti weta narou anu juija kei na len hi deng ang singe.” 6Manui na len denga tuiriek haja matik tolla len ha ther ang ae so. 7Chuna adang manui tonpi ta sanpi rang kokka atronpi ngei na wa weta sanpi so, hana kung animakha tuiriek na shihak ti ah kung animak tui sunga luttang ae so. 8Saimon Pitar na shukka am hi riveta Jisu maikunga huk hrun weta mokka ril, “Ka am na hai thou wa thingo Arengpu! Kei chu ehekta jaishi spa inge!”

9Amo akha chu adang makolla amtol ngei na haja matik tam tui riek mant ri weta angak shukso. 10Chuhekta Zebedee sanao rel Jacob lea Johon manui ha Saimon tonpi ae, hana Jisu na Saimon ta ril, “Hina sarukka ephao atri no oh, nang mee mant mee chang ang so che.”

11Hana mani kung ha tui hou wa choija wakjui ja manina eheilimpa houphur weta Jisu nutieng juiso.

Jisu Na Spa Akha Ta Dampi Ta

(Mit. 8:1-4; Mak. 1:40-45)

12Jisu na hulok akha ah amlei apha ah raichi spa akha na phao ah Jisu mel mari juija amai alei tienga hai weta hita ril, “Arengpu oh ejonga nangna ngei pi lea chu keita nang na thiengpi nea che ae.”

13Chuna Jisu na makut dok shuk weta makolla tonga ril, “Ngeipi sange; thieng jou oh.” Hana apha makka raichi na makolla houphurra dam so. 14Jisuna makolla hita rou ril, “Atu akha kolla rilno oh; Chuti weta jang nga thiempu kolla, hana amona nakolla an su oh, chuna meelim kolla nangha hra so ae ti dang su, Moses na trongsan pek hekta rithoi Dorh peh shukko.”

15Chuti weta Jisu rou hi ram lim ma thanga wairul riha na makolla phao weta rou ngei ah mani rai eja kom dampi ae. 16Chuna Jisu na athei chakka nie ranga ram rukka thingso.

Jisu Na Pum Ahui Thisa Ta Dampi Na

(Mit. 9:1-8; Mak. 2:1-12)

17Rungnie akha ah Jisu na machupi ah amlei ah. Galily ram husung chang honna Pharisis lea roukung ocha ngei akha chu Judiah hana Jerushalem hai thou phao ngei kom aning kolla onga am meh. 18Malmashi ahre na pum ahui athisa kut chunga ruija phao ah mani na Jisu am na inn hana rui lutta Jisu maikunga shi num ae. 19Chuti weta wairul riha ban ma-am sharukka mani na amota ruilut rang lam tuk no ae. Chuna mani na inn chunga kalweta chek ahre la ah ahur ongpi ah Jisu maikunga makut chunga jalpi ah hla so. 20Jisu na mani ngoiring ri weta spa, “Kolla amona ril, tonpi oh, napak ha keina silpi sange.”

21Chuna Pharisis lea roukung ocha ngei na hita Jisu kolla saithou so, “Na spa hi atu meh hijong plouril hi! Chungthieng ano wa chu atu akha na pak silpi nea am no ae?”

22Jisu na mani lunghal ha dangpha juija anona manita ril, “Ejeranga hajong lunghal nangei lung songa sanga chao? 23Hoipa rilna leitek kang sha, ‘napak silpi sange’ ah no lea, ‘thou weta thingo?’ 24Chuna keina nangei kolla meesanao pana aleiram ma pak silne jaitha am meh ti hi dang pi ang inge.” Amona pum ahui athisa spa ta hita ril, “Keina nakolla rilla aminge, thou wo hana nakotchung choi weta na inn na thing jou oh!”

25Hana apha makka amona mani maikunga thou weta majalna kotchung ha ma inn lam tienga choi weta Chungthieng ta dom so. 26Mani limpa angak shukka Chungthieng ta domma mani lungsunga kom ati ah ril, “Awoni ah kani mitta eja ah angakpi akha ripha unge!”

Jisu Na Levi Ta Kok Na

(Mit. 9:9-13; Mak. 2:13-17)

27Hina nutienga Jisu na shukka thinga khasana hrai ngei office ah Levi onga am riphaso. Chuna Jisu na makolla ril, “Kanutieng juijo.” 28Hana Levi na eheilim houp hurra thou weta Jisu nutieng jui so.

29Chuna Levi na ma inn sunga ehekta alok lochao ah ehekta tam khasana hrai eja na kom ma am na karra baktol ha ae. 30Hana Pharisis ngei lea roukung ocha ngei na marui ngei kolla manilung sunga pelno ah ril, “Alo sarukka nangei na khasana hrai ngei lea jaishi ngei hitta bakha inha ah chao?”

31Jisu na manita sang, “Atujong pum ahra ngei tarang doctor darkar am no ae, chuti weta pum hrano ngei tarang sa ae, 32hina kaphao hi dramo chel ngei taranga no ae pakchel ngei ta shilung hlong ranga ae.”

Bu Hai Na Roulam Ma Shai Na

(Mit. 9:14-17; Mak. 2:18-22)

33Hana manina Jisu ta ril, “Johon hina rui ngei chu marak marakka bu hai weta nie, hana Pharisis ngei rui nakom ha hekta ae chuti weta narui ngei chu bakka inn na am meh.”

34Jisu na sang, “Taichang nie ah aphao atronpi ngeina taichang angpa na mani hitta am ha lei lim ma bu hai ah am ange ta halla chao? nahi uithukno ae. 35Chuti weta nahani akha chu phao ange taichang angpa ta mani kar hai thou ruija thing ange, hana juija mani kom bu hai ange.”

36Jisu na manita na panteem hi kom rile, “Atu akha na pun athar atan ther weta pun alui chunga bal no ae, ejonga amo na ae lea chu pun athar ha ther weta pun athar ra bal ae, hana pun lui ha chu ajon kom ano ae. 37Atu nakom darkha tui athar ha savunt hou alui sunga thalno ae, atu jong na darkha tui athar ha thal lea chu savunt hou ha tittange, chu na darkha tui ha leija hou ange. 38Hana saruk chu athar darkha tui ha athar savunt hou sunga sunge! 39Chuna asotta shi darkha tui inn su nutienga athar darkha tui inn num no ae, rouram chu ‘asotta shi darkha tuina tuitek kae,’ amona ril.”

Currently Selected:

LUK 5: CHOTBSI

Highlight

Copy