LUK 2

Jisu Don Na

(Mit. 1:18-25)

1Agustus Kaisar rengpa na reng chang lei apha ah, Rome na pal ramlim hi masing thit ranga trangsan shukpi ae. 2Syria ah Quirinius na Governor change hana ahalpa masing thi ae. 3Malmashi lim na maming chal ranga mani hu lokka thing so.

4Chuna Josep kom Galily Nazareth Judea hina Bethlehem ram David hulokka tungso, rouram chu amo hi David sakai akha chu inn sung sarukka. 5Amona mataichang ranga reikung siella shi saroei ah shi naoron Mary hitta ming chal ranga thinge. 6Akha chu mani na Bethlehem ma amlei chu Mary na nao don rang apha nei so ae. 7Chuna ahalpa masanao pa donso, hana pun na hlum weta shachik bakna hengkunga jalla shi ae, rouram chu mee tung rang inn mani tarang am no jarra.

Kelmo Rungei Lea Wanrui

8Ram hana kelmo rungei na loupok ka riekka mani kelmo jantienga runga am meh. 9Arengpu wanrui na mani mai kunga mel muh ah, akha chu arengpu ma hung ma jai na mani chunga war pi so. Mani ha leima tri so. 10Chuti weta wanrui na mani ta ril, “Atri no oh kei na nangei taranga ahra rou ron na phao inge, nahina malmashi lim taranga ehekta ariem pi range. 11Awoni rungnie mak hina David ram hulokka nangei ta Sanpipa Khrista arengpu don so ae! 12Nangei dang rang chu: Unga ha pun na hlum weta asha bakna hengkunga jalla am tuk kange.”

13Hana apha makka thangwan tienga wanrui abom ngei na rachon weta Chungthieng ta riemma laa sha weta dom meh. 14“Chungthieng ajai hina thangwan na chungtek su oh,

akha chu malungshit ngei kom alei

chunga kom adai chang su oh.”

15Wanrui ngei na wantienga mani lea su takka kelmo rungei na mani mashel ril hlakkae, “Ani na Bethlehem ma thing weta arengpu na anita rilpa shukka am rou ril an thing sai oh.

16Chuna manina ranga phao weta Mary akha chu Josep hana shachikpek na hengkung sunga jalla am rihlakso. 17Kelmo rungei na amota rijuija wanrui na naosan hana rouram ma ril na ha takso. 18Kelmo rungei na rouril thei meelim na ama-acha shuk so. 19Mary na nalimpahi angai thei ah, hana taranga lung thukka hal. 20Kelmo rungei kolla ril chu hekta, theipha akha chu mitta rimakhai lim taranga manina Chungthieng ajai phu ah arengpu amota riemma domma lea so.

Jisu Ta Ming Pek Na

21Rungnie narit su nie ah unga ha asar tan rang apha ah amo ha Jisu ta bo so. Na aming hi amo ta ron ma hai thou wa wanrui ngaina pek minge.

Jisu Ta Mokna Inn Na Pek Na

22Moses hina roukung anu juiya mapha pha ah Josep lea Mary na Jerushalem ma thiengpi ranga akha chu pekranga ruiya kalso. 23Arengpu hina roukung anujuiya jiekka shi ae, “Masha ah don spa chu arengpu taranga pe su oh.” 24Mani na rithoi ranga, “Urhu ani ano lea paipi sanao kom choi ae rou lam chu arengpu hana rou kunga tolsa sou chu.”

25Hanalei apha ah Simeon ti spa akha Jerushalem ma ringa am phur ae. Amo hi leima ahra akha chu Chungthiengta ajak atri, hana Israel ngeita sampi ange ta hakka am spa akha ae. Muihla athieng hana makolla am meh. 26Amo hi arengpu Khrista ta mel ri malim ma thi ang no che ae ta muihla athiengna amota rilsukpi so. 27Chuna muihla na lamkai ah Simeon na inn thieng lutso. Roukung anu juiya arengpu taranga mapa lea manu na unga Jisu ta rui lutso. 28Simeon na unga ha poi weta Chungthieng ta dom so ae.

29“Atunchu Arengpu nangna nata rouril limha rouraen ah shi che ae, hana nangna nasuuk ta dai ah thingpi so che ae.

30Kamit makka keina nata aring kaetlo risinge.

31Malmashi ngei lim maikunga nashem nashi ha:

32Jat adang ngei tarang nawarpi ha akha chu na mee

Israel ngei taranga nahung najai nachoi phao ha.”

33Unga hina mapa akha chu manu na Simeon na mataranga roulam ma ril lim hina yama-acha shukso. 34Simeon na manita jaihra pe weta manu Mary ta ril, “Na unga hi Chungthieng na ahalsa ae rou lam chu atul sa Israel atampa ngei aring kaetlo pha rang amo hi Chungthieng kolla hai thou anealah ae malmashi eja na anda ah rou rillange, 35akha chu thuppa shi lunghal lim kom dangpi ange. Hana apop chamsai hana nalung ha kui pi ange.”

36Asher jati ah Phanuel sanaonu thiempu Anna ti akha am phur ae. Amo hi leima ulien so ae maluhong su takka apisal hitta kum sari ring ha ae. 37Kum somrit innly phao arong nu changa amo na nisoun jantieng bu hai ah akha chu mokka nie ya Chungthieng inn thieng hla hao no ae. 38Hana lei apha makka amokom tunga Chungthieng ta riem ma dom ma unga hana roulam ma ril, atu jongpa Chungthieng ta hakka am Jerushalem ngei ta sanpi ange.

Nazareth Ah Lea Na

39Josep lea Mary na arengpu roukung hana anu juiya ae phung shuk eya lim su weta manui hulok Nazareth Galily tienga lea so. 40Unga na lokka hanga arat shukso; amo ha lungsing na shihakti ae akha chu Chungthieng jaihra na machunga am meh.

Jisu Innthienga Amna

41Kum changhon na Jisu nu-pa na Jerushalem ma lanpina reen tol thinge. 42Jisu na kum asom ani pha juiya mani na thinga hang hekta reen tol thinge. 43Reen ha sutakka inn na lea rang thing thou so chuti weta Jisu chu Jerushalem ma amphur so. Manu mapa na chu nahi dangpha no. 44Mani hal chu mani tonpi ngei karra tol ae ta chuna rungnie akha lampi mani thing juiya mani u-nao akha chu atronpi ngei karra tol rang so ae ta jong thou so. 45Mani na amota tukno pa chu manuina Jerushalem tienga amo ta jong thing so. 46Rungnie nathum su nie ah inn thienga amota tukso. Amo chu Jewish ocha ngei hitta ong ha weta rou ngei ya akha chu rou sai ah am meh. 47Lungsing lungwar hra ah sanga ma am ri weta thei ya am meelim na ama-acha shukso. 48Manu mapa na amota rijuiya angak shukso, manu na amota ril, “Kasanao oh alo wa hijong hi kani kolla ae ah che? napa lea keina atripi makhai lung olla nangta jong unge.”

49Mani ta amona sang, “Ejeranga keita jonga cha meh? nangei na dangpha no chao kei hi kapa in na am mange ti hi?” 50Chuti weta manui na masang hina rou hi lunghal thei no ae.

51Chunapa chu Jisu na manui hita Nazareth ta lea tol so. Ti chu mani kolla aril jui mee ah jarra hana manu na chu roulam lim hi malung sunga hrabakta shi ae. 52Jisu hi pum ma akha chu lungwar ani mak lokka hanga Chungthieng na akha chu meelim na lungshit na hella hangpi ae.

Currently Selected:

LUK 2: CHOTBSI

Highlight

Copy