LUK 3

Johon Baptias Na Rouril

(Mit. 3:1-12; Mak. 1:1-8; Jhn. 1:19-28)

1Tiberius kaisar na palla hang kum asom ranga ah, Judea ram sunga Pontius Pilate na Governor changa akha chu Herod na Galilee ah pallei, hana anaopa Phelip na Iturea akha chu Trakonitis ah palle, Lysanias na Abilene na pal ae. 2Hana Annas lea Kaijapha chungtekti thiempu changa amleiya ramrukka Zekariah sanaopa Johon kolla Chungthieng rou tungso. 3Chuna Jordan turiella am ram lim pa ah Johon na thinga rouril, “Pak hai thou wa Chungthieng am na lea jo oh hana baptias ae oh, napaklim silpi ange.” 4Rouphupa Thiempu Isaiah na abai sunga jiekka shi so ae:

“Ramrukka atu mo akha na rol shukka au ae:

‘rengpa lam satto;

malam ha hrabakta dokpi oh mathing rang!

5Lam kutta am makhai alei thullo,

hana mullon makhai tana tan weta mana pi oh.

Chuna lampi akai am no lutta hra pi oh.

6Malmashi ringchang limpa na Chungthieng aring kaetlo ri ange!’ ”

7Wairul riha na Johon am na baptias lak ranga phao ae. Johon na manita ril, “Arul sanao ngei.” Chungthieng na lungshat hi nangei kolla atu na hlik nea ange ta ril sha? 8Lung hlonga ara ra oh, hana nangei thei chakka nangei rilhlak Abraham hi kani pa ae ti ha chan jou oh, roulam chu kei na nangei kolla ril num inge Chungthieng na, alung ngei ta Abraham sanao ngei changpi nea ae. 9Thingkung atro ah tan ranga arei thourang ae so ae. Thei ara ra no thingkung makhai ta tan weta sarmai ah deng ange.”

10Malmashi ngei na amo ta sai, “Chuleh chu kani na ejongpa tullu lu ang sha?”

11Amo na sang, “Atuyongpa na linglut ani am lea chu atuyong am no akha ta pe shu oh akha chu bu am mee kom bakha su oh.”

12Khasana hrai ahre kom baptias ae rang phao weta manina amota sai, “Ocha kani na e aeta meh?”

13Manita amo na ril, “Nangei na hrai phung shuk ta lella hrai no oh.”

14Ralmee ngei nakom amo ta sai, “Kani chu? eyongpa tullu lu ang sha?”

Amo na mani ta ril, “Atuyongei kolla yairaat ah sum lah no oh hana atu yong akha ta kom dieklao aral pe no oh nadon hana ahop chango.”

15Malmashi ngei na lungranga thouso hana manina ngakthouso. Johon hi Messaiah ah ange ta. 16Chuna Johon na mani ta ril, “Kei na nangeita tui sunga baptias ae pi singe chuti weta keita lella loktek ti akha phao ange, kei chu makae bur rui phao hla rang kane am no ae. Amo na nangei ta muihla athieng akha chu sarmei ah baptias ae pi ange. 17Arengpu loupokka sang reina amunt lokka semma shi ae sangha arengpu na masrra bom mange Arengpu balei makutta am mehi chuna sangshi makhaita atreem nei lao sermei kumma deng ange.”

18Akha chu Johon na adang, adang riemma dom na rou rilla mani ta ahra routhar rilpi ae. 19Chuti weta Johon na Herod kolla manaopa namei Herodias sarukka akha chu adang hrano matullu taranga tronghsi ril. 20Herod na eheilim chunga hikom hap then so, ti chu Johon ta kom hajok sunga shi so.

Jisu Baptias Ae Na

(Mit. 3:13-17; Mak. 1:9-11)

21Malmashi lim na baptias ae su nutienga Jisu kom baptias ae so. Chuna amona prathana ma ae leiya thangwan hongso. 22Hana muihla athieng na machunga wurhruh pum hekta chungso, wanram tieng hai thou sanrol akha ma yunga, “Nang hi kalungshit kasanao ae, nakolla keina leima pelsinge.”

Jisu Nu Hang Pa Hang Na

(Mit. 1:1-17)

23Jisu na tun hlou ae thou makum hi somthum ulien so. Amo hi Josep sanao ae Josep na Heli sanao ae. 24Matthat sanaopa, Levi sanaopa, Melki sanaopa Jannai sanaopa, Josep sanaopa. 25Mattathias sanaopa Amos sanaopa, Nahum sanaopa Esli sanaopa Naggai sanaopa. 26Maath sanaopa, Mattathias sanaopa Semein sanaopa, Josech sanaopa, Joda sanaopa. 27Joanan sanaopa, Rhesa sanaopa, Zerubbabel sanaopa, Shealtiel sanaopa. Neri sanaopa, 28Melki sanaopa, Addi sanaopa Kosam sanaopa Elmadam sanaopa, Er sanaopa. 29Joshua sanaopa, Eliezer sanaopa. Jorim sanaopa Matthat sanaopa Levi sanaopa. 30Simion sanaopa, Judah sanaopa, Josep sanaopa Jonam sanaopa. Eliakim sanaopa. 31Melea sanaopa, Menna sanaopa, Mattatha sanaopa, Nathan sanaopa, David sanaopa. 32Jesse sanaopa, Obed sanaopa, Boaz sanaopa, Salmon sanaopa, Nahshon sanaopa. 33Amminadab sanaopa, Ram sanaopa, Hezron sanaopa, Perez sanaopa, Judah sanaopa. 34Jacob sanaopa Isaac sanaopa Abraham sanaopa Terah sanaopa Nahor sanaopa, 35Serug sanaopa, Reu sanaopa, Peleg sanaopa, Eber sanaopa. Shelah sanaopa, 36Kainan sanaopa Arphaxad sanaopa, Shem sanaopa. Noah sanaopa, Lamech sanaopa. 37Methuselah sanaopa Enoch sanaopa, Jared sanaopa, Mahalalel sanaopa, Kenan sanaopa, 38Enosh sanaopa, seth sanaopa, Adam sanaopa Chungthieng sanaopa.

Currently Selected:

LUK 3: CHOTBSI

Highlight

Copy