LUK 1

1Lungshit Theophilus:

Ani kolla shuk eheilimpa ha jiekka thangkou ranga malmashi ngei na mani nea makhai ae so ae. 2Athouna hai thou mani mitta ri ngei akha chu rou rilla rol ngei ha mani na jiekso. 3Chuna nakolla kom ahra ange, athou na hai thou wa eheilim ha adiek takka lung rang shukka nakolla akha chu nutienga akha ta hrabak ta jiek num minge, chungtekti Theophilus. 4Na tullu hina nang na adiek rou lim nadangpha juija chupi nea ange.

Johon Baptias Don Rang Dangpi Na

5Judia ram sunga Herod na reng changlei apha sunga thiempu hana ming chu Zekariah amo chu thiempu Abijah ngei kot ae anamei ming chu Elizabeth, amo kom thiempu ngei kot sung ae. 6Manui ani mak na Chungtheing ningtienga ahra ah ringa Arengpu aril trong juija am meh. 7Manui ha nao sal ae rou ram chu Elizabeth ha nao am no ae akha chu namei ha lea Zakariah kom leima ulien so ae.

8Nahani akha ah Zakariah na, thiempu akha changa inn thienga matun mahlou ron na am lei sunga. 9Thiempu akha hina yik anu juija Arengpu inn thieng sunga maicham ma ariem hoi sarmei hol rang amota hal so, chuna amona Arangpu inntheing-nga lutso weh marungnie shukso. 10Ariemhoi sarmei holla amlei sunga wairul riha malmashi ngei na awau wa nie ae ah am.

11Arengpu wanrui na ariemhoi sarmei holna maicham changtienga ngirra amota ri pi so. 12Zakariah na amota rijui ja leima atri ah hir so. 13Chuti weta wanrui na makolla ril, “Zakariah atri no oh! Chungtheing na naniena theipi so ae anno na-namei Elizabeth na spa akha don nange nangna aming Johon ta bo oh. 14Chuna nangna eja ah ariem ahoi tul shukkang akha chu madon juija malmashi ngei nakom eja ah ariem mange! 15Amo hi arengpu ningtienga arat athei mee chang ange drakha tui kom ju kom inn nangno ae. Hana adon hai thou wa amota muihla athiengna shi pi ange. 16Akha chu amo na Israel malmashi ngei ta mani arengpa Chungthieng ningtienga ruija lea ange. 17Amona Arengpu matienga thing weta rouphupa Elija hekta arat athei ange. Amona mapa ngeileh unga ngei woiha rachun pi ange; amona ariljuino malmashi ngeita adiek lamma lea rang lung rang pe ange; amo na Arengpu mee ngei ta mataranga thourang ae pi ange.”

18Zakariah na wanrui ta ril, “Alo ta keina na hi dangpha ang meh? Kei chu ulien chang singe akha chu kanamei kom ulien so ae.”

19Wanrui na sange, “Kei hi Gebariel linge” “Chungthieng mai ah ngir aminge, keita nakolla rou rillanga akha chu nataranga ahra rou ril ranga. 20Chuti weta karou hi nangna ngoiring no che ae, nahina apha cha ah routakka shukkang sa ae. Nangoiring no jarra natrong shuk kang no che ae; nakolla kasaro eisa hina adiek takka shuk malim chu nang hata am mang che ae.”

21Nalei apha sunga malmashi ngei na Zakariah ta ngakka hakka am meh, alo wa athieng inn sunga hichan sot am mota. 22Amo na mashuk juija manikolla ephou trongne no, chuna mani na dangpha so amo ta ripi akha inn thienga am so ae trong shukka rou ril nea no sarukka makut takka am na dangpi so.

23Innthienga matun mahlou apha treem ma Zakariah ma inn lam ma lea so, 24Hana nutienga chu Elizabeth nao ron na hla nga inn na lingno wa am. 25“Amo na ril atun chu keita arengpu na keita sanpi so ae” Amo na mee ngei maikunga keita ajak pe nijo ae.

Jisu Donrang Dangpi

26Elizabeth na hlaruk nao ron sunga Chungthieng na wanrui Gebariel ta Galily Nazareth hulokka hla. 27Arengpa David kot hai thou aming na Josep ti spa na reikung silsha saro ei ah shi nangak Mary kolla rouril lea. 28Wanrui na makolla phao weta ril, “Nakolla adai am su oh! Arengpu na nakolla am so ae akha chu amona nakolla lokka jaihra pe so ae!”

29Wanrui rouril hina Mary alung thukka aol pokso,

akha chu amo na ejongpa

ril na mo nu ta angak shuk so.

30Wanrui na ril, “Tri no oh, Mary;

Chungtheing na nangta ehekta lungshi ae.

31Nangna nao ron weta spa akha don nange

aming chu Jisu ta kokkange.

32Amo hi arat athei ange hana amota

chungtekti Chungtheing sanao pa ae ta

kok kange, Rengpu Chungtheing na amota

mapa David phomlu pe ange.

33Akha chu amo na Jacob tu te ngei karra Rengpa chang ange treem am no ah, mareng ram na atreem amang no ae.!” 34Mary na wanrui ta ril, “Kei chu athieng snu inge, chuna nahi alo ta shuk kang meh?” 35Wanrui na sang, “Muihla athieng na nakolla jung ange, akha chu Chungthieng jaitha na nakolla solha ange hina rou sarukka athieng naosan ha, Chungthieng sanao ta kok kange. 36Nasakai Elizabeth phao kom ulien chang sanutienga unga am so ae, anno amo ha atun hla aruk su so ae. 37Hina tak chu Chungthieng na nea no ephao am no ae.” 38“Kei hi arengpu kor inge” ta Mary na ril, “Naril chu hekta kakolla shuk shu oh,” hana wanrui na houphur so amo ta.

Elizabeth Kolla Mary Na Vengna

39Hana waitakka Mary na ranga potsem weta Mullon Judea ram hullokka thing. 40Amo na Zakariah inn na thing weta Elizabeth ta riem ma tuk hlakso. 41Mary na riem ma ril rou thei ah Elizabeth na thei phajui mawon sunga unga na lingso. Hana Elizabeth hi muihla athieng na shiso. 42Akha chu sanrol shukka ril, “Namei lim chunga jaihra ha nange akha chu nadon nang unga ha kom jaihra ae! 43Alo wa hija alok hi kakolla shukpi mo nu, ha chu karengpu hina manu kei ta vengpi meh? 44Nahi kathei pha inlen kawon sunga am unga na ariem ma chom meh. 45Arengpu rouril nangoiring hi eja ah ariem pi meh, nakolla rou takka shuk kange!”

Mary Na Riemma Domma Shak Laa

46Mary na ril,

“Ka muihla na arengpu ta dom minge;

47kamuihla hi ariem minge,

roulam chu Chungthieng hi keita sanpipa ae;

48Roulam chu arengpu amo na asul makor ta anpi,

anno atun hai thou wa meelim na

keita ariem nu ta kok kange.

49Roulam chu enene Chungthieng na kachunga alok tullu lu so ae.

Maming chu athieng ae;

50Meerul akha thou meerul akha ta amona lungsi pe ae,

akha chu atu yong amota atri azak pe lim ngei ta.

51Arengpu na maban pom dokka mane jai tha ripi so.

Akha chu amo na mani lunghal

sarukka lok chok ngei ta pumchok chokpi so.

52Amo na ane angam rengpa ngei ta mani phomlu

hai thou kai tum weta thui

tek ti ngei ta chungtinga dom.

53Amona wontam ngei ta ahra pot peweta wanhoppi.

Akha chu achongpu ngei ta kut rukka hla.

54Amona pipu ngei ta saro mashi hana amona

akor Israel ngeita sang ranga junge.

55Abraham kolla ringrei ngeipi ange ti kom

makno ae akha chu matu mate

ngei ta kom atreem nei no wa!”

56Mary na Elizabeth kolla hla inn thum am ha weta ma inn na lea so.

Johon Baptias Don Na

57Elizabeth na ma naosan don rang apha pha ah amona spa akha don so. 58Ma inn ning kolla am ngei akha chu a-u-anao ngei na theipha juija arengpu na eja ah hra ah angakpi ah meh, makolla hana mani na amo hitta riem ha so.

59Naosan na hapta pha ulien jui ja mani na amota asar tan pi, akha chu mani na Zakariah aming hekta bo anga ae. 60Chuti weta manu na ril, “Ano ae! maning ha Johon ta kok kange.”

61Mani na manu ta ril, “Nasakai na-natei sunga hijongpa ming akha phao am no ae!” 62Chunapa chu amota hi unga hi aming alo ta bo ang meh ta mani na mapa kolla dangpi ae.

63Zekariah na jiekka ngei salep akha sai, ah, “Maming chu Johon,” mani makhai na alo ta ngaksha! 64Hana apha makka Zekariah atrong woiha lea ah shukka akha chu Chungthieng ta amo na dom thou so. 65Mani inn ning tultieng atri hap so akha chu na routhar hina sarukka Judiah mullon ram sunga thangso. 66Chuna naosan hi alo ti tul shuk kang mo nu ta rou thei meelim lungsunga song hlakkae, rou lam chu arengpu kut na amo hitta am ha jarra.

Zekariah Rouphuna

67Johon mapa Zekariah hi muihla athieng na shihakta Chungthieng rou ril:

68“Israel ngei Arengpu Chungthieng ta anina dom ha shai oh!

amona maphao hi mamee ngei ta san ranga akha chu manita aol hai thou hlapi rang nga ae.

69Amona anita arat a thei Sanpipa pepi so ae,

makor David hina atu ate ngei thou wa.

70amona athieng thiempu hei thou wa saro ei so ae, apha eja matienga.

71Chuna amo na anita anda ngei

hai thou wa ani ta sanpi ange,

akha chu hrano ngei kut chunga hai thou kom.

72Amona ril ae ani pi pu ngei kolla malungshit ri pi ae

akha chu masaro ei ha angei thei ange.

73Anipa Abraham kolla riem ma saro ma ei ha.

74Anita anda ngei kut chung hai thou hlapi ange hana ani atri am no lutta amota hlou ae ranga.

75Ani ringa hanga rungnie chang honna

mamai kunga athieng akha chu diekka am rang.

76“Akha chu na ngei kasanao ngei, na ngei ta chungtakti Chungthieng rouphu ngeita kok kange:

Roulam chu arengpu matienga thing weta

ma lam san ranga.

77Mamee ngei ta san rang na chu

ani pak ha kok pi so weta ril ranga.

78Nahi ani Chungthieng chu ma ringreithei akha lungnem thei ae.

Athiem thuija akha chu athi hla sunga ani ta warpi so ae.

79Akha chu thangwan hai thou wa

atheim athi sa hla ah ringa am ngei ta warpi

hana adai lam pi ah kalchoi lamkai rang.”

80Unga hana pum lea mamuihla chu lokka hang juija, amo na Israel malmashi ngei maikunga marungni pha malim chu ramrukka hata ring ange meelim na dang malim chu.

Currently Selected:

LUK 1: CHOTBSI

Highlight

Copy