RUIHNGEI TULLU 5

Ananiah Lea Saphira

1Ananiah ti spa akha na anamei Saphira hina manui don ram ahui te jurra. 2Anamei hitta ngei hlakka amo na mataranga sum ahre shi weta alem sum hana ahalsha rui ngei kae kunga choija phao wata pe so. 3Hana Pitar na ril, “Ananiah alo ta saitan na nalungsung shihakta muihla athieng kolla murthei ah naram jur na napha sunga nataranga shi ah che? 4Amatieng napot ha jurmatieng chu na ha nata ae; hana najur sa nutienga kom sum ha nata ae. Eje ranga hajong tullu lu ranga nalungir ra che? nangna malmashi ngei ta murthai ah no che ae Chungthieng ta murthui ah che!” 5Ananiah na rou hi mathei sulen tu wa thi so ae; hana atu jong rou thei meelimna ati alou shukso. 6Hana rungthar ngei na lut weta apum ha hlum ma rui ah shukka amota uise so ae. 7Anamei na shukka am rou dang no wa apha innthum neidom ti ah lutta. 8Pitar na sai, “Nahina napisal lea nangna ram mant na pha hi adiek tak jou mo?” Amo na sange, “Oh weh,” “naha makkae.”

9Chuna Pitar na makolla ril, “Ejeranga nang lea napisal nanui na arengpu muihla ta chang an ranga lungir ah chau? Napisal ta ui she spa ngei ha atun eenhar ra am meh, hana mani na nangta kom rui ah shukange!” 10Hana makka makae kunga tu wa thi so. Chuna rungthar ngei na lut weta amo hi thi so ae ta danga mani na rui ah shukka apisal ui na apanga ui so ae. 11Akoksha akha chu adang thei pha meelim na ati hlakso ae.

Angakpi Anealah

12Angakpi anealah eja ahalsha rui eja na malmashi ngei mai ah ripi so. Ngoiring eja Solomon laihalla rachun na tuk hlakae. 13Atu akha na kom ati alou am no lutta mani kolla jui num no ae, mani ta malmashi ngei na leima ajak ati halkom. 14Chuti weta arengpu ta ngoiring malmashi snu spa chu abom abom ma tamtek tekta hange. 15Ahalsha rui ngei na tullu lu hana jarra ana asha lim na lampi hou wa rui ah shukka kutchung ano lea phar chunga jalpi ah shi ae Pitar na hella thingjuija mahla chak na phao mani chunga lee ranga. 16Hana Jerushalem hulokhana am malmashi wairul riha na ana asha akha chu hrano muihla na tong mee eja ta akha chu rai phao ah mani limpa ha adam pha ae.

Ahalsha Rui Ngei Ta Aol Ana Pek

17Chungtekti thiempu akha chu achim aruol ngei hana am Saddusees ngei na ahalsha rui ngei ta leima tam ma anarra; mani chunga tullu lu rang lungir so mani na. 18Mani na ahalsha rui ngei ta mant na aral inn sunga shi so ae. 19Chuti weta nani jantieng makka arengpu wanrui na aral inn har ha hongpi ah ahalsha rui ngei ta rui ah shukka manita rourillea. 20“Athieng innsunga thing weta ngirra malmashi ngei mai ah ringchang athar hina rou rillo.” 21Ahalsha rui ngei na aril juija hu warra wak juija athieng inn na lutta chupi takpi thou so.

Chungtekti thiempu akha chu achim arual hana Jihudi ulien changei ta kokka rachun na alok bomtulha ae; Hana aral inn sunga am ahalsha rui ngei ta mani maikunga rui ah wak ranga trongsan pe ae. 22Chuna offisars ngei na tung jui ja aral inn sunga ahal sharui ngei ha tukpha no ah mani na lea weta bontul na ah thangkou so, 23“Kani na aral inn amunt na pha juija enn har kom hrabakta harra am enn har hok ngei kom ngirra am tuk hlakkunge, chu ti weta enn har sunga kani lut juija chu aral inn sunga atu akha phao am no ae!” 24Chuna chungtekti thiempu akha chu mokna enn hakka am offisars ngeina rou hi thei pha ah mani na rouron rui ngei hi ejongpa mo ae ta angak shukso. 25Hana spa akha na mani am na lut weta hita ril, “Ann oh! nangei na aral inn sunga shi ngei ha mokna enn na malmashi ngeita chupi takpi ah am meh!” 26Chunapa chu offisars na ma mee ngei hitta thing weta ahalsha rui ngei ta rui ah lea so. Mani na akal ring sha ah ae no ae rouram chu mani na malmashi ngei na alung deng ang mo weta atri jarra.

27Manina ahalsa rui ngei ta bam tul ha na maikunga ngir pi weta chungtekti thimpu ngeina rou sai ae. 28“Kani na akal trongsan nangei ta pe ah am munge, ti chu na Jisu hina minga chupi takpi ngai ang no ae.” Amo na ril; Anno nangei ae sha tullu hi! nangei na Jerushalem ram sunga rou ril sa so ae, hana mathit hi kani hrano lu tullu hek ti chang pi nangei na di ah chau!”

29Pitar akha chu adang ahalsha rui ngei na sange, “Kani na Chungthieng ril jui anga ae, malmashi ngei ta no ae. 30Kani puthou Chungthieng na khross chunga jotpi rei ah nangei that Jisu ha athi sa hai thou ringpi ae. 31Israel ngei lunghlong ranga akha chu pak sil pi ranga hana sanpi weta lu chingpi rang Chungthieng maban changtiengpa na amo ta ringthou pi ae. 32Kani na hi lim pa taranga meelung ngir pe ah am munge hana Chungthieng maril matrong jui ngeita pek muihla athieng hana kom meelung ngir ae.”

33Hana bomtulla am ngei na rou hi theijuija mani na lung leima sha ah mani na ahalsharui ngeita that num so. 34Chuti weta mani kar sunga roukung ocha Pharisee amingna Gamaliel amo hi malmashi ngei na ajak atri shak na tul bam sunga ngir thou weta apha atante sunga ahalsha rui ngei ta shuk pirang rou pe ae. 35Hana amo na tulbom ngei ta ril, “Tonpi thanruol Israels ngei oh na spa kolla nangei lu tullu ha cheksillo. 36Apha esot sot no matienga Theudas spa na mathei chakka kei kom kei inge ta ril shuk kolla spa rihaly na ma nutieng jui ae. Chuti weta amota that su nutienga chu manu jui mee ngei kom adang adanga thing happa mani lam ha thi so ae. 37Hana waitakka mee masing tel lei ah Galily hai thou Judas shukka wairul riha na manutienga jui ja amo ta kom that sier ra manu jui mee ngei kom hran hlak hapso. 38Chuna hijong rou sunga keina nangei ta karil num chu, hata mani thei chakka am shu oh, ‘ashu oh.’ Ejonga na mani lu tullu hi malmashi hai ah lea chu woiha chu tui ange. 39Chuti weta ejonga Chungthieng na adit ahal ah lea chu nangei na na spa ngei ta ephau ae nea ang no ae, Chuna nangei hi Chungthieng ta asul di ngei ae ta nangei thei chakka hal pha ange.” 40Chuna mani na ahalsha ngeita mani am na ah lut piveta Jisu minga woiha lea ah rou ril no rang trongsan pe pi ah mani ha ta thingpi so. 41Rouril nea ulien chang bomtul na hai thou wa shukka thinga Jisu minga ani ajak tuk hi ngei so ae ta ariem ma thingso. 42Chuna rungnie chang honna athieng inn sunga akha chu inn lakchanghon na mani na thing weta Jisu hi Sanpipa ae tina ahra trongsan hi chupi takpi ah rol ae.

Currently Selected:

RUIHNGEI TULLU 5: CHOTBSI

Highlight

Copy