RUIHNGEI TULLU 4

Shahidrin Maija Pitar Lea Johon

1Pitar Lea Johon na mee ngeita trong nga am lei ah thimpu ahre, mokna inn hak ahut shilla am offisar, lea Saddukise ahre kom waso. 2Mani lung leima hoino ae rouram chu rouron rui ani na Jisu thit na lea ringthou ah ringchan pha na chupi takpi ah am jarra. 3Chuna na nietak apha ah Pitar lea Johon ta mant na atuk huwar malim ma manui ta aral inn sunga hunga shi so ae. 4Chuti weta rouril theipha eja na ngoiringa malmashi hellatieng lasing ranga pha ah hangso. 5Hana hu warra lamkai ngei roukung ocha ngei akha chu ane angam na Jerushalem ma tuk hlakka. 6Hana chungtekty thiempu Annas hana Kaijaphas, Johon, Alexandar, akha chu adang chungtekty thiempu malmashi inn sung ngei kom tolla am meh. 7Mani na Pitar lea Johon ta mani maikunga rui ah wa ah manui ta rou sai thou so, “Ejongpa nangei jaitha ano lea atu minga nangei na tullu lu ah chou?” 8Hana muihla athieng na Pitar chunga shihakta mani chunga rouril: “Ane angam ngei akha chu lamkai ngei oh! 9Awoni hi ejonga nangei na kanui ta akae horra am spa hata lungshi ah dampi hana sarukka rou sai lea chu. 10Na hi nangei na dango, Israel meelim pa na; Nazareth ta Jisu khrista minga ae, khross chunga aban jam ma nangei that, Chungthieng na athi hai thou ringthou pi matienga ngir weta spa hata dam pi ah ae. 11Amo ha chu,

‘Inn sha ngei na denga hou alung ae,

anutienga chu amo na hella maru oui tek ti alung chang ha ah ae.’

12Samla ringchanga hi Jisu kol ano wa atu akha kolla tukkang no ae wanthui atu akha minga ani na sanpi pha ranga.”

13Pitar lea Johon thouna ri weh ta mani na manui hi abai kom chuno houphur ae ta angei thei ah, mani ha angak shukka ril Jisu hi manui hitta am ha ae. 14Adam ahra spa hana mani karra ngir toll am ha mani ri jarra, mani na ephao rillang am no ae. 15Chuna mani na mani inthum hata mani Sahidrin mashel waishit hlakna amunt haithou thing ranga trongsan pe so. 16“Ani na manui hitta alota ae ang sha?” Jerushalem sunga ringa am malmasi lim na mani ae angakpi tullu hi dang hap so ae chuna ani na denga hou nea ang ni jo weta mani na ril hlakso. 17Chuna hijonghi malmashi ngei mai ah lea ah rou sam no ranga ani na atujong akha kolla kom Jisu minga rouril no ranga rou chu dolla shi ei oh.” 18Hana mani na woiha lea ah mani ta kok weta Jisu minga rouril no ranga manita trongsan pe pi so. 19Chuti weta Pitar lea Johon na sange, “Nangei na nangei thei chakka routreem oh, Chungthieng ta hella nangei rou juipa na Chungthieng ningtienga adiek kang mo ae. 20Rouram chu kani na ri sha theipha sa rou ha trong no lutta am nea nonge.” 21Anutienga chu atri pi weta mani ha hla so, rouram chu malmashi lim pa na Chungthieng ta domma am akha chu shukka am eja hana taranga chunapa chu mani na manita alota dandi pe ang mo ta roungir nea ni jo. 22Rouram chu angakpi ah adam pha spa ha akum somly chunga ulien chang mee ae.

Atrih No Ranga Ngoiringei Aniek Na

23Mani na hla su wa Pitar lea Johon na mani mee mak ngei am na lea weta chungtekti thiempu ngei akha chu ulien changei na manui ta ril na lim thangkou so ae. 24Na rou hi mani thei juija mani na rachon weta sanrol shukka Chungthieng kolla nie so. 25Kani puthou nashuk David kolla na muihla athieng hana jarra rilphur ae,

‘Alo wa jatidang ngei na lung hanga;

akha chu ariem sal halla am ma meh?

26Ane angam akha chu simlei chunga Rengpa lim na,

rachun ha weta arengpu

Messiya ta anda rang tullu thouso.’

27Messiya ae ta nashak athieng nasuuk ta Herod lea Pontius Pilate akha chu hupi sunga am jat adang hana Israel ngei hita tuk hlakka rachun ha weta Jisu amota an shi anda thouso. 28Mani na rachun ha weta amatienga nane jaitha hana akha chu nahalsa ha shukpi ranga ae. 29Chuna atun chu arengpu, mani na ati pi ah am hi dangpi ah nasuuk na ati am no wa rouril shuk nea rang jaitha pe pi oh.

30Naban dok shukka athieng nasuuk Jisu minga angakpi ah dampi hrapi ranga anealah pe pi oh.” 31Mani nie shu nutienga mani ranchun na amunt ha linga. Hana mani lim pa ha athieng muihla na shihakta ati alou am no lutta Chungthieng rou ril.

Ngoiringei Na Ma Am Madon Sam Hlak Na

32Ngoiringei lim na thin lea lung akha chakka ammeh, atu akha na madon na am ha mata chakkae ta hal no ae, chuna mani adon anei lim pa ha sam hlak kae. 33Jisu na ringthou pha ket ta ahalsha rui ngei na atreem am no lutta hata meelung ngir pe ah mani lim chunga ehekta jaihra pha ae. 34Hana lei ah atu akha na phao awat apa am no ae mani sunga chuna atu jung ram mun don ano lea inn don ngei na apha anu juija jur weta apha sum lea pai hana ahalsha rui ngei am na choija phao ae. 35Hana ahalsha rui ngei kae kunga pe ah atu jung awat apa mee kolla manina sam pi ae. 36Sypras hai thou Levite Josep ahalsha rui ta kok sha Barnabas (hina ril na chu thanum thawak sanao.) 37Maloupuk jur weta apha sum lea pai ha ahalsha ngei kae kunga choija phao weta pe ae.

Currently Selected:

RUIHNGEI TULLU 4: CHOTBSI

Highlight

Copy