RUIHNGEI TULLU 3

Kaehor Spa Na Dam Na

1Nahani akha ah Pitar lea Johon na athieng inn sunga nie niek ranga chanutieng apha innthum takjuija thinge. 2Hana adon hai thou kaehor spa ta mee ngei na ehekta ahra innhar am na ah tha hanga shi phur ae rouram chu athieng inn hana lut mee limta sum niek ranga. 3Pitar lea Johon mel amona rijuija ejongpa akha pe ang mo ae ta nie ae. 4Manui na amo ta mun na an weta Pitar na ril, “Kanui ta anno!” 5Chunapa chu amo na manui ni kolla ejongpa mo kha chu pha ang sange ta mun na an ae. 6Chuti weta Pitar na amota ril, “Shum lea pai chu kei ekom am nonge, chuti weta kakolla ka-am ha nangta pe inge; Nazareth ta Jisu khrista minga kei na nangta thou weta thingrang trongsan pe inge!” 7Hana pa chu amo na aban changtiengpa oh weta ngir thou pi ae, apha ha mak ka akae horra am spa ha atun chu damso ae; 8amona akae hana chamma thou weta ahul tunga thingthou so, chuna amo na manui hitta athieng inn sunga luttol so. Athinglam ma chomma amo na Chungthieng ta dom ae. 9Thing weta Chungthieng ta riemma madom ri malmashi ngei na. 10Amo hi ahra inhar ningkolla ong veta sum nie ah am pa ae ta dangpha juija angak alau shukka machunga alo wa mo nu ta hallea.

Pitar Na Mokna Inn Shunga Rouril Na

11Solomon leihal aeta kokna amunt hana Pitar lea Johon kolla haitonna am malmashi ngei na angak shukka mani am na ah wa ae. 12Pitar na mani lim ta ri juija ril, “Israel tonpi thanrul ngei oh, nahina sarukka alowa angak shukka chau hana ejeranga nangei mitta mun na kani ta an na chau? Ejongpa akha tienga kani jatha ae ta hal chau ano lea Chungthieng tol no ae ta hal chau, ha spa kanina thingpi hi. 13Abraham, Isaac akha chu Jacob hina Chungthieng hana ani pipu ngei hina Chungthieng na masuuk Jisu ta mahung majai pek phau ah nangei na amota athat ranga pe so chau, hana chakno wa Pilate na amo ta that no ranga lungir phao nangei na amo ta ngeinum no chau. 14Nangei na adiek athieng hata pa ngeinum no wa meethat mee ta pa hla pi so chau. 15Nangei na ringchang sempa ta that hal kom Chungthieng na amo ta athi hai thou ringpi so. Kani na hina taranga lung ngirra am munge. 16Jisu khrista minga ngoiring jarra nangei na ri ah am spa hi atun chu arat pha so ae Jisu minga ma ngoiring hana jarra machunga pumdam dam pi so ae nangei na ri ah am hi ae.

17“Ulenao ngei oh atun chu, keina nangei ta dang singe nangei ta lamkai ngei hekta nangei na epromo ta am ha. 18Nahi Chungthieng na amatienga rouchoi ngei kolla rilsha rou sha ae, ha chu, khrista ha aol dong ange. 19Shilung hlonga Chungthieng ningtienga haileh oh, chu lea chu napak limpa kom silpi ange; ejonga nang na ae lea chu, jaitha pharanga apha ha areng kol hai thou phau ange. 20Hajong muihla rat rang ha arengpa kolla haithou phau ae hana amo na nangei taranga ahal sa. Sanpipa Jisu ta hla ange. 21Amo ha chu thongwan ram ma mapha ha pha ma lim chu am mange eheilim athar ra shak malim ma Chungthieng na marouchoi ngei kolla amatieng eja ah saro ei nujuija. 22Chuna Moses na ril, ‘Chungthieng nangei arengpu na nangei taranga rouchoi hla pi ange keita mahla hekta hana amo ha nangei mee makkange chuna nangei na kom maril eheilimpa ha jui ah ta ae. 23Atujong na rouchoi rouril jui no mee amo chu Chungthieng mee ngei kol hai thou hran pi weta amang ata shuk pi ange.’ 24Rouchoi rouril lim sunga Samuel akha chu manutienga phao ngei na kom awoni ah shukka am hi rilphur sa so ae. 25Chungthieng na marouchoi ngei kolla saro ei hi nangei taranga ae Chungthieng na nangei puthou Abraham kolla saro ei ah ril ha, ‘Simlei chunga natu nate ngei chunga keina jaihra pe ange.’ 26Chuna sarukka Chungthieng na marui ha hal weta amota masha ah nangei kolla hla ae, nangei limpa na nangei hrano lampi haithou wa lea weta jaihra pek ranga ae.”

Currently Selected:

RUIHNGEI TULLU 3: CHOTBSI

Highlight

Copy