RUIHNGEI TULLU 2

Muihla Athiengna Tungna

1Lanpina rungnie apha ah chu ngoiring lim na amunt akha chakka mani na rachon so. 2Edang dangnowa wanram tieng hai thou wa ajap ahai hang hekta thirang tara na mani onga am na inn sunga shihak ti so. 3Hana mani ha sarmei hekti alei akhana mani lim changhon kolla sarmei hana tongso. 4Chuna mani limpa ha muihla athieng na shihak pi adang adang tronga thou so ae muihla athieng hana trong shukpi nea so. 5Amunt hana Chungthieng ta atri lim thangwan thuija jat lim na Jerushalem ma phao ah am meh. 6Wairul riha mani lim na atara ha theipha juija rachon na mani lim ha thanum tha thou ae rouram chu mani lim pana ngoiringei na tronga am hi masha mak trong hekta thei sarukka. 7Angak shukka mani mur shukka ril, “na rourilla am ngei hi Galily malmashi ngei no wa meh? 8Alo ti ah meh? ani limpa na mani rouril lim ani trong hekta theipha hi? 9Ani hi Parthia Media akha chu Elam; tieng no meh? akha chu Mesopotamiya, Judah akha chu Kappadokiah Pontus akha chu Asia tieng no meh. 10Phrygia Pomphylia tiengno meh akha chu Egypt ramtienga Cyrene ningkolla Libya tieng no meh, hana ani ahre na Rom tieng no meh. 11Jihudi akha chu jat adang Gentals hana kristen lea Arabia, ani ahre na kom Chungthieng na alok matullu ae na mani rouril ha ani tronghekta theipha nea ae!” 12Nungjel mangjella mani na angak shukka mani akha lea akha sai hlakka “Nahina ae am hi alo wa mo nu?” 13Chuti weta ahre na chu nuiso weta ril, “Mani hi leima ju rui so ae.”

Pitar Rouril Na

14Hana Pitar na rouron asom akha ngei hitta ngir thou weta sanrol shukka wairul riha ngei karra rou ril, “Jerushalem sunga am nangei lim akha chu kalungshit Jihudi ngei oh karou ngeithei oh nahina rou ram sarukka kei na nangei ta dangpi tikke. 15Nangei na halla am ha mani hi jurui no sa ae; atun apha hi nituk apha aku chak tul lim sunge. 16Chungthieng rouril Joel rilphur ha ae:

17‘Chungthieng na ril atreem nie rungnie ah ka ae ang tullu ha na hi ae;

meelim chang honna kamuihla athieng boun ange.

Nasonaopa lea nasanaonu ngei na karou rillange;

nangei unga ngeina ri nea ange,

akha chu ulienchangei na amang mant ange.

18Chuna kasuuk kakor snu spa, ngei ta phao

ha jongpa rungnie ah chu ka muihla athieng mani chunga boun ange,

hana chu mani na karou ril thing ange.

19Keina Chungthieng wanna angakpi ae ange

hana thuitieng simlei ah angak shuk kange.

Hana sarmei ah athee am mange, akha chu meihut na shihak ti ange;

20Nienu na thiemma amange,

akha chu apuhlapa na athee hekta san na wullange.

Arengpu hina alok ahoi jaihra marungnie tung matienga.

21Hana chu, atujungpa atujungna arengpu amota

kok lim na sanpi pha ange.’

22“Tonpi thanrul Israel, ngei oh rouhi Nazareth ta Jisu na nangei kar sunga ri ngei lou angakpi eja akha chu ane tullu najarra alimpa hi Chungthieng na angei mee ae ti hi nangei makna phao dangso ae. 23Chungthieng na mahal madangpha nu juija Jisu hi nangei kut chunga pe so ae hana hrano akha hana jurra amota khross chunga aban jump ma that ae. 24Chuti halkom Chungthieng na amota athi hai thou wa ring thoupiso, athi aol hana hai thou wa kom hla pi so. Rouram chu athi jaitha hana amota kolla shi nea rang ui thokno ae. 25Marou hana sarukka David na ril,

‘Keina apha chang honna karengpu ha ka matienga am ri pha inge

rouram chu amo ha kaban changtieng pa ae kei ephao

ollang nange.

26Chuna sarukka kalung hi ariem na shihakti ae,

chuna karou limpa kom ariem chakkae,

katak kom sui no wa aring,

pha ange ta denna aminge.

27Rouram chu nangna keita athi simlei karra etikkom

shi angno che ae hana chakno wa

narui athieng hata kom hrano

amut akha ae ta ri no ae.

28Nangna keita ringchang lam thingrang

ri pi so che

akha chu kakolla na am sarukka

ariem na shihakti ae.’

29“Ulehnao ngei oh, keina nangei kolla arat athei ani pu reng David hana rou riltikkae, atun hina makka mathit na akha chu ma uoi na hlan ha am meh. 30Amo hi rouphupa akha jarra Chungthieng na matu mate ngei sunga akhana maphomlu ong ange ta saro ei ha amo na dangne ae. 31Chungthieng ningtienga ejongpa ae ang mo ti kom David na ri nea jarra khrista Jisu ringthou ranga amo na ril,

‘Jisu athi simlei na kolla shi nea ang no ae

akha chu;

matak hi kom hrano amut ephao na nea ang no ae.’

32Chungthieng na Jisu ta athi haithou wa ringa thou pi so ae chuna ani lim pa na na adiek rou hina meelung ngir ae. 33Chuna sarukka Chungthieng na maban changtiengpa ah wanga domma kalso. Chuna sarukka amo na Pathieng na saro eisha muihla athieng boun na jung atun nangei na ri ah am akha chu thei ah am rou ha ae. 34David na wanram ma kalno phao sunga kom amo na hita ril,

‘ka rengpu kolla arengpu na ril;

kaban changtiengpa ah ongo.

35Nangta anda mee ngei ta nakaeto na kachangpi malim ma.’

36“Chuna Israel inn sung lim na dang a ngoiring shu oh, khross chunga nangei that Jisu hi Chungthieng na sanpi nepa arengpu ae ta sem meh!”

37Atun chu rou hi mani theipha juija mani lung leima olla Pitar akha chu arui ngei ta ril; “Ulenao ngei oh, kani hi alo ta ae ang meh?”

38Pitar na sange, “Nangei lim na shilung hlonga Jisu khrista minga baptias ae oh, nangei pak sil pi ranga chule chu nangei na athieng muihla hana khuthul pha ange. 39Rouram chu Chungthieng na nangei unga ngai akhu chu nangei taranga hana aram anei alah lim pata makolla phao ranga anipa Chungthieng na saro ei ah arengpu minga kokka am.”

40Pitar rou adang eja kom mani kolla hlem ma rouril, “Natak kom sanpi pha oh, hrano amut meerul hina.” 41Hana rouril hata lashil weta baptias ae mee ha lasing inthum tolla nani ah mani masing hel kat ae. 42Manina rouron ngei rourilhata mani theichakka lung lutta juija rochun na chupi takpi hana butol kuipi ah bakka akha chu nie ae,

Ngoiringei Bomtul

43Rouron ngei na angakpi anealah ae eja ta mani na ajak ati ae. 44Ngoiringei lim na hata rachonna mani am adon lim akha lea akha saruk ja hlakkae. 45Mani anei adon limpa jurhlakka mani lim sunga madarkar nujuija sam hlakkae. 46Rungnie chang honna mani na athieng inn na ranchon na mani na shilung thienga ariemma mani inn na bakha in ha ae. 47Malmashi limna ahra lunghal hana jarra ariemma manina Chungthieng ta dom meh. Chuna Arengpu na sanpi pha sha mani ta naha naha hella tolpi ae.

Currently Selected:

RUIHNGEI TULLU 2: CHOTBSI

Highlight

Copy