RUIHNGEI TULLU 6

Sanranga Mee Sari Ta Hal Na

1Hana apha nutienga chu ngoiring mee hella hanga Grik trong tronga am Jihudi ngei lea hana am sha Jihudi ngei kar sunga trongjet hlak thou so. Grik tronga am ngei na mani arong ngei ta rungnie changhon na sam hata thousa no ae ta ril thou so. 2Chuna ahalsa asom ani hana ngoiring sha meelim ta tul bom pi weta ril, “Hojon tun siel ang sarukka kani na Chungthieng rouril thadol rang ephao jaitha am no ae. 3Chuna ulea nao ngei oh muihla athieng na shihak ti akha chu lungrang shukthei mee sari nangei kar sunga hallo, hana kani na mani ta tun siel pi ange. 4Chuna kani na kani hi apha chang honna nie ah, akha chu rouril ang tullu lu ah am tukkae.”

5Bomtulla am lim pa na rouron ngei lunghal ril shuk lim pa ariem ma ngei pi ah, muihla athiengna shihakti akha chu ngoiringchet Stephen, Philip, Procharus, Nicanor, Timon, Parmenas akha chu amatienga Judaism ma lunghlong nga hou phur Gentile Antioch ka Nicolaus ta mani na hal so ae bomtulla am lim pa na ahakha ngei ta mani lim ming pe shu weh, 6mani chunga mani kut shi weta prathana aeso.

7Chuna Chungthieng rou hi atreem am no wa sai ah thinga Jerushalem sung ngoiring ngei hi tam tek, tekta thingso, hana thiempu atam nakom hijong ngoiring hi ta lah sier num ae.

Stephen Ta Mant Na

8Chungthieng na ehakta lungshi ah jaihra pek spa Stephen ane jaitha na shihakti na malmashi ngei maikunga angakpi ati pi ripi so. 9Chuti weta amota Synagogue sung tol spa ahre hana Cyrene akha chu Alexandria hai thou wa, mani akha chu Silisia Asia ram tienga Jihudi ngei na Stephen ta trong jet hlak thou so. 10Chuti weta muihla sihakti Stephen kolla lungsin na trong juija mani na ephou sang nea no ae. 11Chuna mani na aru wa spa ahre kolla waishi weta rillo ta ril, “Chungthieng akha chu Moses kolla amona ngeinum no rou ril thei unge kani na makolhai thou wa!” 12Hijong lamtienga malmashi ngei na, ulien changeina akha chu roukung ocha ngeina Stephen ta mant na Sahedrin am na ah rui ah phao so ae. 13Hana mani na spa ahre ta diek lou marou ril pi ranga rui ah honga “Mani rilna chu,” “Na spa hi, apha changhon na ani athieng inn akha chu Moses hina Roukung ta ngei num no na rou tronge. 14Maril na kani thei chu Nazareth ta Jisu na athieng inn sung hi mangpi weta Moses hai thou wa ani talit tamang hi ahlong akha phao pi ange taril ae!” 15Sahedrin sunga onga am limpa na Stephen mai hi wanrui mai hekta mani mit ta ri hapso ae.

Currently Selected:

RUIHNGEI TULLU 6: CHOTBSI

Highlight

Copy