LOBMUNG 34
34
1 # 34.1. Kók bokhorok: 1Sa 21.13-15. Ang Subraiyungno hambai rw máng tongnai;
ani búkhúgo bini lobmung máng tongnai.
2Ani langma Subraiyungo kung chuk máng tongnai;
abono khnaui koinenerok bwkha tongthokjak thung.
3Ang bai baksa Subraiyungno chẃngsacha khlai di,
phai di chwng pal khe bini mungno tor rw lai anw.
4Ang Subraiyungno san kha hakhe bo ani ringmano khna kha,
tei ani bebak kirimarokni yakni phiyók kha.
5Bono naisik di tei kipir wng di;
hakhe nini mwkhang tei sókjak glak.
6O talikha hamyasa ring khe Subraiyung khna kha,
hakhe bo bebak digi-sigini phiyók kha.
7Subraiyungni suarirok bono kirinairokno kitingwi tongo,
tei bórokno phiyógo.
8 #
1Pi 2.3. Chánaiwi nai di Subraiyung bwswk se kaham;
bono bwkha beranai bororok bwkha tongthogwi tongo.
9O bini kwthar bororok Subraiyungno kiri di,
tamni hwn ba bono kirinairokni biyal wng ya.
10Singho bwsarokbo mui biyal wngjagwi ok khuijago,
Subraiyungno nainairokni le manwi kahamrok biyal wng ya.
11Phai di, o angsarok, ani kók khna di;
ang norokno Subraiyungno kirina phrwng anw.
12 #
1Pi 3.10-12. Norokni bere sabo thangwi tongnano hamjak,
tei kaham kwrwng khe tongna bagwi umor kolok khatung?
13Nini bwslai bai kók hamya samani,
tei nini búkhúk bai kók tatal samarok mwthak di.
14Hamya bai kak di tei samung kaham khlai di;
kwchang kwchangno nai tuk di tei abo hai
kheno tongna khlai di.
15Subraiyung tongmung kaham tongnairokno naikhlaiwi tongo,
tei bórokni kapmano bo khunju kai-o.
16Samung hamya tangnairokno Subraiyung naisik ya,
bo bórokno ha sakani pok rwui páinai.
17Borok kahamrok chubamung sanwi kap khe,
Subraiyung abono khna kha,
tei bórokno bórokni bebak digi-sigini yakni phiyógo.
18Subraiyung bwkha kwbairokni samo tongo,
tei bwkha kwbairokno mwthango.
19Borok kahamrok dukhu kwbángma mano, tamo khe Subraiyung
abórokni yakni bono phiyógo.
20 #
Joh 19.36. Bo bini bebak bekrengrokno kaham khe narwgo;
abo kongsa phano bái glak.
21Borok hamyano hamya’-no butharo,
tei tongmung kaham tongnaino naislernairok khe majra ma chánai.
22Subraiyung bini selengrokni langmano phiyogo;
bini thani tongthai na phainai khoroksano phano bo khibiui rw glak.
Chubamung sanwi surimani
Daudni rwchapmung
Currently Selected:
LOBMUNG 34: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
