LOBMUNG 35
35
1O Subraiyung ano kebengwi bachanairokno
nwngbo bórokno kebengwi bacha di;
ang bai choba nang lainairok bai nwngbo
bórok bai choba nang lai di.
2Nwng phui bwsa bai phui kotorno na di,
tei ano chubana bagwi bacha di!
3Ano kebengnai arirokno kolonga tei koslu naui
ano riphriknairokni lama muthup di;
Ano “Ang se nini mwthangnai” hwnwi sa di.
4Ano butharna chaitoknairokni
mwkhang sógwi lachimasingcha khlai di.
Ani bagwi hamya chapnairok bórokni
bwkha urumuru khlaiwi rwui kiphil rw di!
5Bórok nokbaro gundak kobonjak hai wng thung,
Subraiyungni suarirok bai bórok rwkhlaijak thung.
6Bórokni lama mwnak tei rimi wng thung,
Subraiyungni suarirok bai bórok riphrikjak thung.
7Bórok ereng ereng’-no ani bagwi khẃi chago;
ereng erengno bórok ani langmani bagwi hakhor khur lai-o.
8Bórokni thani achomsa komormung phai thung.
bórok tepsa khe thonmani a khẃi-o bórok’-no kwcha thung;
bórok aro klaiwi gaija thung.
9Hakhe ani langma Subraiyungo tongthoknai,
bo phiyókmani bagwi khápang srangnai.
10“O Subraiyung nwng hai sabo tong? hwnwi ani sakni bekrengrok sa anw,
nwng kebelrokno phan gwnangrokni yakni mwthango,
bigra tei biyalo klaijakrokno nwng’-no seknairokni yakni phiyógo.”
11Naislernai sakki bachasa kha;
bórok ang saui man ya abórokno se sẃngo.
12Bórok ani kahamni hamya bai se yagul su-o;
ani bwkha bái kha.
13Tamo khe bórok hamya phuru ang rí kichik kano;
ubas tongwi ang langmano leng rw-o.
Ang khorok bomsonwi suri kha,
14ang kiching eba takhuk wng phano;
ang buma thwijagwi kapnai hai khe bomwi tong kha.
15Tamo khe bórok ang yapri kásle phuru khe mw se mwnwi lai si-o,
bórok ano kebengwi kwrẃngsa khe kuthum lai kha;
sini ya nuk ya dagaitrok ano sachik-sapro khe sek phai kha;
16bórok katswi búkhúk sitra kariui ano thesra kari lai kha,
ano naisigwi bórok ua hul lai kha.
17O Subraiyung, nwng tei bwswk nai sinai?
Ano sokomorna naimani yakni ano mwthang si di,
ani pholano singhorokni aroni mwthang si di!
18Hakhe ang kwbángma khe luku kuthumjak bodolo nono hambai rwnai;
bórok kwbángmani bwskango ang nono lobnai.
19 #
Lob 69.4; Joh 15.25. Ano kebengnai arirok bai ano mechen rwui bórokno ta tongthok rw di,
eba ano naislernairok bai ano muphlik-muphlik khe ta naisik rw di.
20Tamoni hwn ba bórok kók kaham sa ya,
tamo khe ha-o kwchang kwchang khe tongnairokno
bandina kók se chap lai-o.
21Bórok ano naisigwi búkhúk kuar khe khua lai-o;
“Ei, chwng abono chini mokol bai nuk kha” hwnwi bórok sa lai-o.
22O Subraiyung nwng nuk kha,
siring siring ta tong si di,
o Subraiyung ang bai ta chal ja di!
23Bacha di, sicha di ano kati rwna bagwi,
ani bagwi o ani Kaitor ani Subraiyung!
24O Subraiyung ani Kaitor, nini buj kaham bai ano kaham hwnwi
sakhlai si di tei ani digi-sigi nugwi bórokno ta mwnwi rw si di.
25Bórokno, “Hok, chwng omo tẃi’-no naimani”
hwnwi ta sa rw si di.
Bórokno, “Chwng nono monok kha” hwnwi ta sa rw di.
26Ani digi-sigino nugwi tongthoknairokno lachi rw di
tei bwkha bái rw di;
ani kebengwi kung chuknairokno
lachimung man rwui bórom kwrwi khlai di.
27Ani kahamno hamjaknairok tongthogwi
chirik thung, khápang srang thung,
sal brúm bórok, “Subraiyung wng kha kotor, chẃngsacha wng thung,
bo bini selengni hamkraino hamjago” hwnwi sa thung.
28Hakhe ang nini kahamno
sal brúm lobwi sa máng tongnai.
Borokni samung hamya
Rwchapmung twithernaini bagwi: Kaitorni seleng Daudni Rwchapmung
Currently Selected:
LOBMUNG 35: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
