LOBMUNG 31
31
1O Subraiyung ang nini thani bwkha bera kha;
ano uáisa phano lachima-o ta khiklai ja di;
nini kaham bai ano phiyók ja di.
2Ano khunju kai ja si di;
ano dakti phiyók ja di.
Ani katithai holongthai kwrak wng ja di,
ani mwthangnai nok kwrak wng ja di.
3Kubui’-no nwng’-no ani holongthai, katijaknai nok kwrak;
nini mungni jarwi ano lama phunugui tẃi ja di,
4ani bagwi khẃi chakjak tongmani aroni ano phiyók ja di,
tamni hwn ba nwng se ano kati rwui tonnai.
5 #
Luk 23.46. Nini yago ani pholano yapharo;
O Subraiyung kubuini Kaitor, nwng ano phiyók kha.
6Nwng chúk ya mang takjak khulumnairokno selengo,
tamo khe ang Subraiyungni thani bwkha bera-o.
7Ang nini khairokma-o pái phlai ya hamjakmungni bagwi lobsanai,
tamni hwn ba nwng ani tong digi-sigino nuk kha;
nwng ani kebengnai arino nai kha,
8tei ani kebengnai arirokni yago nwng ano khiklai rw li ya;
nwng ani yakungno haphar kuaro yapri bera rw kha.
9O Subraiyung, ano khairok ja di tamni hwn ba ang dukhu klai tong kha;
ani bwkha hamya wngmani bagwi ani mokol bena-bena wng kha tei bwsakrok ram kha.
10Ani langma dukhu-o tong kha,
tei ani bisi thwgwi lengprojak#31.10: Lengprojak: Baksa kók séma-o lengprojakrok. Hibru-o khe sumsok (derama). wng kha;
ani dukhuni bagwi ani phan kwrwi kha tei bekrengrok chemai kha.
11Ano kebengnai arirok bai ang hamya hwnjak kha,
tei nok arirok tei sinijakrok bai kirijaknai se wng si-o,
lamarogo ano nuknairok
ani oroni khárwi se thángo.
12Thwiwi thángjak borok hai khe se sak nangjak ya wng si-o;
ang manwi kwbai hai se wng si-o.
13Ano kitingwi kirimasingcha kókrok
hunu-hanai sa laimano ang khna-o!
Bórok kuthum laiwi ani bagwi hamya chap lai kha,
ano butharna hwnwi bórok chap lai kha.
14Tamo khe o Subraiyung; ang nini thani bwkha bera kha.
Ang hai hwnwi sa-o, “Nwng’-no ani Kaitor.”
15Ani jorarok nini yago se;
ano ani kebengnai arirok tei
sátoknairokni yakni phiyók ja di.
16Nini selengni saka-o nini mwkhangno chẃng rw di;
nini hamjakma bai ano mwthang ja di.
17Ang nono ring ja-o, o Subraiyung;
ano ta lachi rw ja di;
borok hamyarok lachi rwjak thung;
siring siring khe bórok kwthwirokni
ha-o ma tháng thung.
18Tatal sanairok kók man ya wng thung borok kahamrokno hamya saui kók kotor sanairok,
samung nang ya wngnairokbo kók man ya wng thung.
19Nono bórom khlainairokni banta nwng bwswk se manwi kahamrokno ton kha,
tei nini thani katina bagwi phainairokno
jotoni bwskango bwswk se hamari rw kha!
20Nwng kók kotor sanairokni bwskangni bórokno
nini thani hui tonnai,
kók uálai sanairokni yakni phiyógwi nwng bórokno nini nogo tonnai.
21Subraiyung hamchajak,
tamni hwn ba ang tongma kamiyung choprokjak phuru suda bo ano uanamasingcha khe hamari rw kha.
22Ang achomsa kirima chaui,
“Ang nini mokol bwskangni chal kha” hwnwi sa kha.
Hai phano ang nono chubamung sanwi ring khe nwng ani koimano khna kha.
23O bini borok kwtharrok Subraiyungno hamjak di.
Kók narwknairokno Subraiyung mwthango phiya kók
kotor sanairokno khe yagul su-o.
24Subraiyungno khatungwi tongnairok
phankrak wng di, bwkha kwrak khlai di.
Sumsok gosimani tei nakarjakmani
Daudni kóklob
Currently Selected:
LOBMUNG 31: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
