YAPHANG 25

Abrahamni tei bosongrok

(1Bo 1.32,33)

1Abraham tei khoroksa bwrwino káijak kha tei bini mung khe Ketura. 2Bo Simran, Joksan, Medan, Midian, Isbak tei Suano bini bagwi bá kha. 3Joksan khe, Seba bai Dedanni bupha. Dedanni bwsarok khe Asurim, Letusim, Leomim. 4Midianni bwsarok wng kha, Epha, Epher, Hanok, Abida tei Elda. Omorok bebak’-no Keturani bwsarok.

5Abraham bini tong kwrwi bebakno Isakno rw bai kha. 6Bo kwthang tong phuru bini tei kubun bihik kotoisongrok bámani bini bwsaroknobo hilirok rw bai kha. Hakhe bo a bwsarokno bwsla Isak bai hakchal khe salkabaini ha-o rwui rohor kha.

Abraham thwi kha tei phobjak kha

7Abraham nokha bisi sarasnichiba thangwi tong lang kha. 8Abraham bini umor rá súgwi, umor pái súgwi’-no thwi kha tei bini borokrok bai tongwi kha. 9Isak bai Ismael bini bwslasong bono Makpelani hakhoro phob kha, abo wng kha salkabaini haphar Hitisa Joharni bwsla Ephronni ha panthor, 10#Yap 23.3-16.Abo khe Abraham Hitisasongni aroni paimani ha; Abraham bai bihik Sara khoroknwi’-no arono phobjago. 11Abraham thwimani yagulo khe Kaitor Isakno hamari rw kha. Tei Isak Bir-Laharoi o tongwi kha.

Ismaelni bosongrok

(1Bo 1.32,33)

12Omorok wng kha Ijipjwk Hagar, Sarani selengjwk bámani Abrahamni bwsla Ismaelni bosongrok: 13Bórokni mungrok khe, mareui swkang achaigranaini simi; Nebaiot khe Ismaelni bwsa okra; teirok khe Kedar, Adbil, Mibsam, 14Misma, Duma, Massa, 15Hadad, Tema, Jetur, Naphis tei Kedema. 16Omorokno Ismaelni bwsarok, bórokni mung rwgwi’-no bórokni kamirokni mungbo pharjago tei bosong thwgwi khorokchinwi bugra chongjak. 17(Ismael nokha bisi sara tei thamchisni umor phuru-o thwi kha tei bini sandairok bai baksa tongwi kha.) 18Bini bosongrok Habila bai Surni amchoini kwcharo, Ijipni salkabai-o tei Asiriya thángma lama-o sandairok bai pal khe kami kha lai tong lai kha.

Esau bai Jakob achaimani

19Omorok wng kha Abrahamni bwsla Isakni bosongrok; Abraham wng kha Isakni bupha, 20Isakni, Padan-aramni Aramiasa Bethuelni bwsajwkno tei Labanni bahanokno káijak phuru Isakni umor nokha bisi brwichi ká kha. 21Rebeka bwsa man yani bagwi, Isak Subraiyungni thani suri kha; hakhe Subraiyung bini surimano khna kha tei bihik Rebeka sakderiya wng kha. 22Bini ogo bwsa khoroknwirok dundrok lai kha; hakhe bo hai hwnwi sa kha, “Omo hai wng khe, bahai khe ang thangwi tongnai?” Hakhe bo Subraiyungno sẃngnani tháng kha.

23 # Rum 9.12. Hakhe Subraiyung bono hai hwnwi sa kha,

“Nini ogo dopha kwnwirok tongo,

nwng kwtha lai ya dopha kwnwino bánai,

khoroksa tei khoroksani slái raknai;

okra kusuno ma monnai.”

24Bini sak keng phuru khe, bo bwsa apher bá kha. 25Swkang achaigranai khe kwchak tei bini bwsak buikhumu gwnang rí hai, abo bai’-no bono Esau#25.25: Esau: O mung Seir hwnmano sama se, ulo aro Esauni bosongrok tong kha. Seir hwnmani abo Hibru kók bai “buikhumu gwnang” hwnmani hai. hwnwi mung phar kha. 26Aboni ulo khe tei khoroksa Esauni yakoraino kwrak khe romwi nongkhorwi phai kha, hakhe bono Jakob#25.26: Jakob: O mung khe Hibru kók bai “Yakorai” hwnma hai. hwnwi mung phar kha. Bórok achai phuru Isakni umor nokha bisi dokchi ká kha.

Esau bini achai okrani manthaino phalmani

27A chwrairok tor kha lok kha, Esau khe poluan kaham wng kha, bo phataro tongnano hamjago, Jakob khe kwchang kwchang borok, nogo máng tongo. 28Isak Esauno hamjago, tamni hwn ba bo Esau butharmani muihan thokjago; Rebeka khe Jakobno hamjago.

29Salsa Jakob tha sóngwi tongo, Esau khe mui rwgwi phai-o, bo belai khe ok khuijak. 30Aphuru khe Esau Jakobno hai hwnwi sa kha, “Ang belai ok khui tong kha, ano kisa u tha sóngjakno chá rw ja di.” (Aboni bagwino bono Idom#25.30: Idom: Hibru kók bai omo “Kwchak” hwnma bai baksa. hwnjago.)

31Jakob hai hwnwi sa kha, “Swkang nwng ano nini okrani manthaino phalwi rw gra di.”

32Esau hai hwnwi sa kha, “Ang thw se thwinai kha, okrani manthai ba ani tamo chúk?”

33 # Hib 12.16. Jakob hai hwnwi sa kha, “Swkang ano swmai tangwi kók rw gra di.”

Hakhe tei Jakobno bini achaimani manthaino bo phalwi rw kha. 34Hakhe Jakob bono auang kisa tei tha sóngmani bwtwino rw kha. Hakhe Esau cháui nungwi bini achaimani manthaino khibiui rw kha.

Currently Selected:

YAPHANG 25: KOKBSI

Highlight

Copy