YAPHANG 24
24
Isakno káima
1Abraham chakra wng kha, umor pái rw rwk kha; Subraiyung Abrahamno bebago’-no hamari rw kha. 2Abraham bini nokni seleng kwcham kuk, bebakni barjano berjak a selengno hai hwnwi sa kha, “Nini yakno ani yaphago ton di,#24.2. Yaphago ton di: Omo tẃi khe Swmai tang rwmani abo tei a swmaini ayang uyang wngwi man ya. 3ang nono ha tei chuknohani Subraiyung Kaitorni mungwi swmai tang rwui sa-o, nwng ang tongma o ha Kananni bwrwirokno ani sajlani bagwi hamjwk naui man glak, 4tamo khe nwng ani ha-o thángwi ani sajla Isakni bagwi ani sandai masarokni bisingni se angsajla Isakno káina bagwi bwrwi ma tubunai.”
5A seleng bono hai hwnwi sa kha, “Rom di a bwrwi ang bai baksa phaina nai li ya; hakhe ang ba tamo nwslano da nwng phaimani a ha-o tlangwi thángnai tamo?”
6Abraham bono hai hwnwi sa kha, “Nai di, nwng ani sajlano le aro kiphilwi ta tlang phi di. 7Ano ani aphani nokni tei ani achaima hani tikhlai tubunai chuknohani Subraiyung Kaitor, bo ano hai hwnwi saui swmai tang kha, ‘Nini bosongno ang o hano rwnai,’ bo’-no nini swkango khe bini suarino rohornai tei nwng aroni ani sajlani bagwi hamjwk mannai. 8Aroni bwrwi nwng bai baksa phainani lon ya hwn khe, hakhe nwng ani o swmaini yakni yóknai; nwng ani sajlano simi aro kiphilwi ta tlang di.” 9Hakhe a seleng bini nokphang Abrahamni yaphungo yak ton kha tei o kókno tẃiwi bini thani swmai tang kha.
10Hakhe a seleng bini bugrani mangingang mak chi naui lam rw kha, bo bini bugrani aroni hilini bagwi manwi kaham-kaham tlang kha; hakhe bo lam rwui Nahorni kamiyung Mesopotamia-o tháng kha. 11Bo kamiyungni phataro twikhor gandaro khe mangingangrokno yáskú sung rw bai kha, aphuru sarik jora, a jora-o bwrwirok twi khókna phai-o. 12Hakhe bo hai hwnwi suri kha, “O Subraiyung, ani nokphang Abrahamni Kaitor, nwng tini ani samung cha rw ja di, ang nono koi ja-o tei ani bugra Abrahamno hamjakmano phunuk ja di. 13Nai di ang twikhor gana-o bachaui tongo tei kamiyungni bwrwirok twi khókna bagwi phaiwi tongo. 14Ang bórokni bisingni’-no khoroksano, ‘Nini golano mekhengwi ano kisa twi khan rw ja di,’ hwnwi sa khe bo, ‘Nwng di tei nini mangingangrokni bagwibo ang twi khógwi tubunai,’ hwnwi sa khe, bo’-no nini seleng Isakni bagwi nini chongmani bwrwi wng si thung. Omo hai wng khe, nwng ani nokphangno khá súgo hwnwi sinai.”
15Bo suri bai ya sini’-no Rebeka phairukungo twini gola tẃiwi aro sók phai kha. Bo Abrahamni takhuk Nahorni bwsla Bethuelni bwsajwk, bini bihik wng kha Milka. 16Bo wng kha belai bwrwi naithok, bo khoroksa chwla bai phano gwdal ya kho. Bo twikhoro thángwi gola-o twi supungwi kiphilwi phai kha. 17Hakhe seleng khachigwi thángwi bono hai hwnwi sa kha, “Nini golani twi ano kisa khan ja di.”
18Bo, “Takhuk nwng ja di” hwnwi sa kha; hakhe bo dodro-dodro khe golano yago khe tikhlaiwi bono twi khan kha. 19Bo bono twi khanwi pái khe hai hwnwi sa kha, “Ang nini mangingangrokni bagwibo twi khógwi tubunai bórok nungwi mansak’-no nung thung.” 20Hakhe bo doui a golano bukcha khe twikhoro hai’-no hai twi khókna tháng kha bo bini bebak mangingangrokni bagwi twi khók kha. 21A borok siring siring khe a bwrwini tongmungrokno naichomwi Kaitor ba bini phaimani samung cha da cha rwno cha rw ya naiwi tong kha.
22A mangingangrok twi nung khe’-no a borok sekel khaksa rangchakni longphu rw kha, sekel kaichi yaktwk kongnwini bagwi rangchakni mathiya rwui 23bo a bwrwino hai hwnwi sẃng kha, “Nwng saboni sajwk wng kha? Nwphani nogo ang bai ani borokrokni tongthai da manno?”
24Bwrwima bono hai hwnwi sa kha, “Ang khe Milka, Nahorni bagwi bámani bwsla Bethuelni bwsajwk se.” 25Bo hai hwnwibo sa kha, “Chini nogo nara tei chwkap kwbángma tongo tei tongna bagwibo nok kwbángma tongo.”
26Hakhe a borok yáskú sungwi Subraiyungno suriui 27hai hwnwi sa kha, “Ani nokphang Abrahamni Subraiyung Kaitorno lobo, bo ani nokphangno hamjakma tei sói khe naimano yakar ya. Anobo hai’-no Subraiyung ani nokphangni jaiti-masani nok lama bwkhak lama soui tubu-ui phai kha.”
28Hakhe a bwrwima khachigwi thángwi bumani nokni bebak borokrokno a kókrokno saui khna rwui kha. 29Rebekani takhuk khoroksa tongo bini mung wng kha Laban; Laban a twikhor tongma-o a borokni thani khachigwi tháng kha. 30Laban bini bukhuk Rebekani thani longphu tei yakni mathiyano nuk khe tei a borok bahanokjwkno tamo sa kha a kókrokno khna khe, bo bini thani tháng kha, bo a borokno bini mangingangrokni gandaro twikhor samo khe bachaui tongjak nugwi kha. 31Bo bono hai hwnwi sa kha, “O Subraiyung bai naikhlaijaknaisa, phai di, tamo phataro bachaui tong lang? Ang nini bagwi ani nogo tongthai tiyar khe ton kha tei nini mangingangrokni bagwibo tongthai tongo.”
32Hakhe a borok nok bisingo hap kha; hakhe Laban mangingangrokni phikungni manwirokbo kariui chwkap tei bwlái kwranrok chána bagwi rw kha. Bo bai bini borokrokni bagwi yakung súnani twi rw kha. 33Ulo khe bini thani chámung tubu-ui rw phai kha; tamo khe bo hai hwnwi sa kha, “Ani kók sajaknairok sa bai ya sak ang chá glak.”
Bo hai hwnwi sa kha, “Do hakhe sa di.”
34Bo hai hwnwi sa kha, “Ang Abrahamni seleng. 35Subraiyung, ani nokphangno hamari kwbángma rw kha, bo kotor wng kha; bo bono musuk, merarok, rangchak-rukphairok, selengrok, selengjwkrok, mangingangrok, korai chirkarok rw kha. 36Hakhe ani nokphangni bihik umor chakra súk phuru ani nokphangni bagwi chwla bwsa khoroksa bá kha; bono bo bini bebakno rw kha. 37Ani nokphang ano hai hwnwi swmai tang rw kha, ‘Ani sajlani bagwi tabuk ang tongmani a ha Kananni bwrwino hamjwk ta na di; 38tamo khe nwng ani Aphani ha-o ani jaiti-masarok tongma ha-o thángwi ani sajlani bagwi hamjwk naiwi di.’ 39Ang ani nokphangsano hai hwnwi sa kha, ‘A bwrwi ang bai phai ya wngwi mano.’ 40Tamo khe bo ano hai hwnwi sa kha, ‘Ang tẃimani Subraiyung, bini suarino nwng bai rohornai tei nini samungno cha rwnai; nwng ani sajlani bagwi ani jaiti-masani bisingni, ani aphani nokni hamjwk tubu di; 41omo hai khe nwng ani jaiti-masani aro thángwi nwng soi yarok wngjagwi kiphilwi phai khe se yóknai.’
42“Aboni bagwi ang tini a twikhor rukungni samo phaiwi khá bising bising hai hwnwi suri kha, ‘O Subraiyung, ani nokphang Abrahamni Kaitor, nwng ani o phaimanino samung cha rw ja di, 43nai di ang o twikhorni samo bachaui tongo; kamiyungni khoroksa swk bwrwi sikla twi khókna phai khe ang bono hai hwnwi sanai, “Ano nini golani twi kisa khan ja di,” 44phiya bo ano “Nung di, ang nini mangingangrokni bantabo twi khógwi rw anw,” hwnwi sanai bwrwi’-no subrai ani bugrani bwslani bagwi chongma bwrwi wng thung.’
45“Ang hai hwnwi siring siring khe surima thak ya sini’-no Rebeka phairukungo gola boksaui phaiwi twikhor bwkhak twi khókna bagwi tháng kha, ang bono ‘ano kisa twi khan ja di’ hwnwi sa kha. 46Bo doui bini golano phairukungni tikhlaiwi, ‘Nung di’ hwnwi gola mekhengwi sa kha, ang nini mangingangroknobo twi khannai’ hwnwi sa kha. Hakhe ang twi nung kha tei bo mangingangroknobo twi khan kha. 47Ang bono sẃng kha, ‘Nwng saboni bwsajwk?’ Bo sa kha, ‘Ani apha wng kha Nahor bai Milkani bwsla Bethuel.’ Hakhe ang bini bukungo longphu kan rwui rw kha tei yaktwgo mathiya soraui rw kha. 48Ang khorok bomwi Subraiyungno khulum kha, ano ani nokphangni jaiti-masani thani lama soui tlangwi nokphangni bwslani bagwi hamjwk man rwui rwnai ani nokphang Abrahamni Subraiyung Kaitorno ang lob kha. 49Tabuk nwng ani nokphangno sói khe nainani tei kubui khe samung tangna chong khe ano sa si di. I’n da, I’nhi sa di hakhe ang tamo khlainai khlai ya chongnani.”
50Laban bai Bethuel hai hwnwi sa kha, “Omo Subraiyungni aroni se phai-o; chwng nono hamyabo saui man ya kahambo saui man ya. 51Iko Rebeka nini bwskango’-no, bono nwng bai tlangwi tháng si di, Subraiyung sama tẃi’-kheno bono nini nokphangni sajlani hik snamwi si di.” 52Abrahamni seleng a kókno khna khe’-no, bo yáskú sungwi Subraiyungno khulum kha. 53Hakhe a seleng rírok tei rangchak rukphaini uakhum-toyarok kanmungrok tikhlaiwi Rebekano rw kha. Bo bini takhuk bai bini bumanobo kanmung kaham rw kha.
54Hakhe Abrahamni seleng tei bo bai baksa tongnai a borokrok chá lai kha-nung lai kha tei horo arono tong lai kha, bórok phungo bacha khe, “Ang ani nokphangni thani kiphilwi tháng sinai” hwnwi bo sa kha.
55Tamo khe Rebekani takhuk bai buma hai hwnwi sa kha, “Rebeka chwng bai khe salsni eba salchi jora chwng bai tong gra si thung aboni ulo khe bo tháng si thung.”
56Tamo khe a seleng hai hwnwi sa kha, “Ano ta dwk rw si di; tamni hwn ba Subraiyung ani samungo hamari rw kha, ano nokphangni thani tháng rw si di.”
57Bórok hai hwnwi sa kha, “Chwng a bwrwimano ringwi sẃngnai.” 58Hakhe bórok Rebekano ringwi “Nwng o borok bai baksa tháng sinai da?” hwnwi sẃng kha,
Rebeka hai hwnwi sa kha, “I’n ang thángnai.”
59Bórok bórokni bukhuk Rebekano tei bono naikini khlainaino Abrahamni seleng tei bo bai baksa phainai a borokrok bai khe rwui rohor kha. 60Aphuru bórok Rebekano hai hwnwi hamari rwui sa kha,
“Chini hanok chisai chisainini buma wng thung,
tei nini bosongrok bórokni arirokni kamiyungrokno
segwi naui man thung!”
61Hakhe Rebeka bai bono naikini khlainaijwkma bachaui mangingangrokni saka-o kasaui a borokrokni utung utung khe tháng lai kha; omo hai kheno a seleng Rebekano tẃiwi bini thángthai-o tháng kha.
62Aphuru khe Isak Bir-Lahairoini phaiwi Negebo tong phai kha. 63Isak sarigo haphar bwkhak himgurungna thángmani; hakhe bo bokhorok tisaui naisik khe mangingangrokno phaiwi tongma nuhur kha. 64Rebeka Isakno phaima nuk khe’-no mangingangni nongkhor kha, 65tei selengno hai hwnwi sẃng kha, “Chini phaising himwi phainai a borok sabo?”
Hakhe a seleng “Bo ani nokphang” hwnwi sa kha. Hakhe bo bini rí hungjaknai bai mwkhang kholop kha.
66A seleng Isakno bo khlaimarokno saui khna rw kha. 67Hakhe Isak Rebekano ríni nok bisingo tubu-ui phai kha tei bono hik song kha, Rebeka bini bihik wng kha; Isak Rebekano hamjak kha. Omo hai khe Isak buma thwimani yagulo bwkha kwchang kha.
Currently Selected:
YAPHANG 24: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
