YAPHANG 26

Isak Geraro tongwimani

1Abrahamni jora-o asari wngmano karwi tei philsa aro asari wng phi kha. Hakhe Isak Philistiani habugra Abimelekni ha Geraro tháng kha. 2Subraiyung Isak bai nukjagwi hai hwnwi sa phai kha, “Ha Ijibo ta tháng di; ang tong di hwnwi samani a ha-ono tong di. 3#Yap 22.16-18.O ha-ono tongwi tong di ang nwng bai’-no tongnai tei nono hamari rwnai; nono tei nini bosongno o harokno bebakno rwnai, ang nwpha Abraham bai swmai tangmano narwknai. 4Ang nini bosongrokno athukiri báng tẃi khe er rwnai tei o harokno nini bosongrokno rwnai; nini bosongni tẃi khe hani bebak dopharok hamari mannai; 5tamni hwn khe Abraham ani kók khna kha, ani bebak kerongno tẃi kha tei dagimarokno khna kha.”

6Isak Geraro kami khaui tong kha. 7#Yap 12.13; 20.2.Aroni borokrok bono bihikni kókno sẃng khe, bo hai hwnwi sa kha, “Bo ani hanok se” tamni hwn ba bo “Ani hik” hwnwi sanani kiri jago, “Oroni borokrok ano Rebekani bagwi butharnai” hwnwi bo uansuk kha, tamni hwn ba Rebeka wng kha bwrwi naithok. 8Bo aro sal kolokma romwi tong phuru salsa Philistiani habugra Abimelek tailam tẃi naharwi Isak bihik Rebekani bwsak mihimwi tongma nuk kha. 9Hakhe Abimelek Isakno ringwi hai hwnwi sa kha, “Nai di bo nihik se; hakhe nwng bahai khe, ‘Bo ani hanok se’ hwnwi saui man?”

Isak bono hai hwnwi sa kha, “Ang bini bagwi ma de ma thwi langno hwnwi ma uansuk kha?”

10Abimelek hai hwnwi sa kha, “Nwng chwngno tamo khlai kha? Khoroksa swk nini hik bai sak gwdalwi man kha mun tei abo bai chini thani sumsok tubuma klai kha mun.” 11Aboni bagwi Abimelek bini borokno hai hwnwi saui hus khe rw kha, “Khoroksa swk phano o borokno eba bini bihikni sak tangna ta tháng di, tang khe bo ma butharjaknai.”

12Isak o ha-o mai-khul kái kha tei kwbángma mai-khulrok man kha. Hakhe Subraiyung bono kwbángma hamari rw kha, 13hakhe bo belai’-no gwnang wngsa kha tei rang kwbáng aji kha, hakhe bo khoroksa rang gwnang wng kha. 14Bini kwbángma musuk-merarok wng kha teibo kwbángma seleng-selengjwkrok wng kha tei Philistiasarok abono nugwi mokol kiyórjak kha. 15(Aboni bagwi bini bupha Abrahamni molni bebak twikhor khurjakrokno Philistiasarok ha bai khe muthubwi rw kha.)

16Tei Abimelek Isakno hai hwnwi sa kha, “Chini oroni tháng di, tamni hwn ba nwng chini slái phan gwnang kuk wng kha.” 17Yagulo khe Isak aroni kutulwi thángwi Gerarni hapharo ríni nok tangwi tongwi kha. 18Tei Isak hai’-no hai buphani molni twikhorno khur phi kha, tamni hwn ba Philistiasarok Abraham thwimani ulo abono muthup kha. Bo bupha mung pharma hai’-no mung phar phi kha.

19Tei Isakni selengrok hapharo twikhor khur khe aro twimuk kahamni twi man kha, 20aro Gerarni mal-mata mwrwknairok bai Isakni mal-mata mwrwknairok uálai lai kha tei “Omo chini twi se” hwnwi sa lai kha. Aboni bagwi o twikhorni mung Esek hwnwi phar kha, tamni hwn ba abono tẃi ma uálai kha.

21Aphuru bórok tei khorsa twikhor khur-u kha, arobo hai’-no ma uálai-u kha, aboni bagwi abono Sitna hwnwi mung rw kha. 22Tei bo aroni kutulwi thángwi tei khorsa twikhor khur rw kha, aro khe bo ma uálai li ya, aboni bagwi bo abono Rehobot mung phar kha tei hai hwnwi sa kha, “Tabuk le Subraiyung chwngno tongthai rw kha, chwng o ha-o hamari kupulung wngnai.”

23Aroni khe bo Birseba o toksaui tháng kha. 24Tei Subraiyung a horo bo bai nukjagwi hai hwnwi sa kha, “Ang nini Apha Abrahamni Kaitor; ta kiri di, tamni hwn ba ang nwng bai tongo, ang nono hamari rwui tei nini bosongno ani seleng Abrahamni jarwi er rwnai.” 25Aphuru bo aro Subraiyungni mungwi háyá kaisa tang kha tei ríni nok tang kha. Aro Isakni selengrok twikhor khorsa khur-u kha.

Isak bai Abimelek kók kha laimani

26 # Yap 21.22. Abimelek, bono kókbiti sanai Ahujat tei bini sengkrak bokhorok Phikolno tẃiwi Isak bai malaina bagwi Gerarni phai kha. 27Hakhe Isak bórokno hai hwnwi sẃng kha, “Nwng tamo tabuk ang bai malaina phai, nwng ba swkango ano naislerjagwi nini aroni rwkhlai rohor kha bla?”

28Bórok hai hwnwi sa kha, “Chwng srai-srai khe nuk kha Subraiyung nwng bai tongo; hakhe phai di nwng bai chwng kók kha lai anw, swmai kaisa tang lai anw, 29nwng chwngno mungsa hamya ta khlai di, chwngbo nini mungsa hamya khlai yaba, chwng nono mungsa khlai yaui kwchang kwchang khe’-no thángna rw kha. Tabuk Subraiyung nono hamari rw kha.” 30Hakhe bo bórokno chá rw kha khan rw kha. 31Teini phung aidrobo khe khoroksa tei khoroksa bai khe swmai tang lai kha. Isak bórokno lama naharwi rohor kha tei bórok kwchang kwchang khe tháng lai kha.

32A salo khe Isakni selengrok phaiwi bórok khurma a twikhorni kókno sa phai kha. Bórok hai hwnwi sa kha, “Chwng twi man kha.” 33Bo a twikhorni mung “Siba” hwnwi phar kha; abo hai kheno a kamiyungni mung tabuk jora Birseba#26.33: Birseba: O mung khe Hibru kók bai “Swmai Kaham” eba “kaisnini bere kaham” hwnma bai baksa. hwnjago.

Esau buini hani bwrwi bai káijakmani

34Esauni umor nokha bisi brwichi phuru bo Hitisa Berini bwsajwk Judit tei Hitisa Elonni bwsajwk Basematno hik na-o; 35bórok Isak bai Rebekani thangsungo belai khe tekto rw kha.

Currently Selected:

YAPHANG 26: KOKBSI

Highlight

Copy