YAPHANG 27

Isak Jakobno hamari rwmani

1Isak umor chakra wng kha tei mokolbo nuk ya wng kha. Bo bwsajla okra Esauno ringhorwi hai hwnwi sa kha, “Angsajla” hakhe bwsajla, “I’n ang oro se” hwnwi sa kha. 2Isak hai hwnwi sa kha, “Nai di, ang chakra laha; ang buphuru bo thwino si ya, 3hakhe tabuk nwng nini mui kokjaknai badukhung bai chakhlarok naui hapharo nongkhorwi tháng di tei ani bagwi mui butharwi tubu di, 4tei ang thokjakma hai khe mui sóngwi ani thani tubu-ui phai di, abo cháui pái khe ang thwinani swkang nono ani páithakni hamari rwnai.”

5Yang khe Rebeka, Isak bwsla Esauno sama kókrokno khna kha. Hakhe Esau bolongo mui butharwi tubuna bagwi tháng khe, 6Rebeka bwsla Jakobno hai hwnwi sa kha, “Ang nwphano nwta Esauno hai hwnwi samani khna kha, 7‘Ani bagwi mui butharwi tubu-ui abono sóngwi rw phai di; hakhe ang abono chá bai khe, thwinani swkang Subraiyungni bwskango khe hamari rwnai.’ 8Tabuk aboni bagwi sajla ani kókno khna di tei ang sama tẃi’-no khlai di. 9Tháng di, mera bodol tongma-o thángwi mera bwsa kaham maknwi romwi tubu-ui phai di, abo bai khe ang nwpha thokjak tẃi’-kheno sóngwi tiyar khlainai; 10bo thwina swkang abono cháui nono hamari rwui manna tẃi khe nwng abono tubu-ui phai di.” 11Tamo khe Jakob buma Rebekano hai hwnwi sa kha, “Nai di ata Esauni le bwsago buikhumu máng tei ani le bwsak milik se. 12Apha ano tangwi naiwi saui man khe ang bono bandima se klai anw tei ani bagwi hamari wng yaui swraimung se wng anw.” 13Buma bono hai hwnwi sa kha, “Nini a bati ani sago nang thung, sajla; ani kók simi se khna di, tháng di, ano mera bwsarokno simi tubu-ui rw phai di.” 14Hakhe bo thángwi romwi tubu-ui bumano rw phai kha; tei bupha thokjak tẃi’-kheno buma abono sóng kha. 15Rebeka bini nogo tongma bwsla okra Esauni rí kaham kuk’-no naui, bwsla kusu Jakobno chum rw kha; 16a mera bwsani bukurno bini yago tei gwdnani bahan milik tongma jidolo bólwi rw kha; 17hakhe bo kothok khe sóngma chámung tei auangrokno bwsla Jakobni yago yapharwi rw kha.

18Hakhe Jakob buphani aro thángwi “Apha” hwnwi hwn phai khe; bo “I’n tamo, sajla, nwng sabo wng kha?” hwnwi hwn kha. 19Jakob buphano hai hwnwi sa kha, “Ang nwsla okra Esau se. Ang nwng sama tẃi’-no khlai kha; ano hamari rwui manna tẃi khe, nwng bacha di achugwi ang mui romwi tubumano chá di.” 20Tamo khe Isak bwslano hai hwnwi sa kha, “Sajla nwng bahai khe omo aswk doui manẃi phai man lang?” Bo hai hwnwi sa kha, “Nini Subraiyung Kaitor se ano samung cha rw-o.” 21Isak Jakobno hai hwnwi sa kha, “Ani samo phai di, nwng angsajla Esau de Esau ya, tangwi nai grana.” 22Hakhe Jakob bupha Isakni samo tháng kha, hakhe bo bono tangwi hai hwnwi sa kha, “Khorang khe Jakobni khorang, tamo khe yakrok khe Esauni yakrok se.” 23Hakhe bo bono siniui man li ya, tamni hwn ba bini yakrok khe bini bwta Esauni yakrok hai buikhumu gwnang. Hakhe bo bono hamari rw kha, 24bo bono hai hwnwi sẃng kha, “Nwng kubui’-no ani sajla Esau da?” Bo hai hwnwi sa kha, “I’n ang’-no.” 25Hakhe Isak hai hwnwi sa kha, “Abono ani thani tubu di, ani sajla mui rommano cháui pái khe ang nono hamari rwnai.” Hakhe bo abono bini thani tubu khe bo abono chá kha; tei angur bwtwibo rw phai khe abono nung kha. 26Hakhe bupha Isak bono hai hwnwi sa kha, “Sajla, samo phai di, ano motom su phai di.” 27#Hib 11.20.Hakhe bo samo phaiwi bono motom su kha; bo bini rírokno motom su-ui hamari rwui hai hwnwi sa kha “Nai di ani sajlani báhai, Subraiyung hamari rwma hapharni motom báhai! 28Kaitor nono nokhani pantwi rwui, hapharno ha kaham khlai thung, bo nono mai tei angur bwtwi kwbáng khe rw thung! 29#Yap 12.13.Dopharok nini seleng wng thung, borokrokno nono ma khulum thung, nini sandairokno tei nwmani bosongrok ma khulum thung. Nono swrainairok swraimung nang thung tei nono hamari rwnairok hamari rwjak thung!”

Isakni hamarino Esau sanmani

30Isak Jakobno hamari rwui pái kha tei bo bupha Isakni aroni tháng khe’-no bwta Esau mui romwi kiphil kha. 31Bo’-bo chámung kothok khe sóngwi buphani thani tubu-ui phai kha. Bo buphano hai hwnwi sa kha, “Apha ano hamari rwui manna tẃi khe bachaui achugwi chá di ang nini bagwi muihan sóngwi tubu kha.”

32Bupha Isak bono hai hwnwi sẃng kha, “Nwng sabo?”

Bo hai hwnwi sa kha, “Ang nwsla, okrasa Esau.”

33Isak belai khe bwsak kwlwijagwi hai hwnwi sa kha, “Hakhe nwng phai ya sini ani thani a mui tubu-ui ang chámani tei ang hamari ma rwmani abo sabo sla? I’n a hamari bini’-no wng phlainai.”

34Esau buphani o kók khna kheno, chirikhógwi khá hamya wngwi belai khe kap kha tei buphano hai hwnwi sa kha, “Apha anobo hamari rw ja di!”

35Isak hai hwnwi sa kha, “Nwphayung phaiwi ano bandi phai khe, bo nini hamarino tlangwi tháng kha.”

36 # Yap 25.29-34. Esau hai hwnwi sa kha, “Bono gothok rwuino Jakob#27.36: Jakob: O mung khe Hibru kók bai “bandinai” hwnma hai. hwnwi mung pharma klai ya da? Bo ano omo bai khe uáinwi bandi kha. Bo ani okrani manthainobo sek kha; nai di tabuk khe ani hamarino naui pái kha.” Hakhe bo hai hwnwi sa kha “Nwng ani banta hamari khatiui ton li ya da?”

37Isak Esauno hai hwnwi sa kha, “Nai di ang bono nini nokphang snamwi pái kha, bini bebak takhuksongno bini seleng wngna rw kha, bono mai tei angur bwtwirok bebak rw bai kha, sajla ang nini bagwi tei tamo khlai man sinai?”

38 # Hib 12.17. Esau buphano hai hwnwi sa phi kha, “Apha nini ba hamari kaisa’-no da tong? Apha, anobo hamari rw ja di.” Esau khorang kotor khe kap kha.

39 # Hib 11.20. Hakhe bupha Isak bono hai hwnwi sa kha:

“Nai di nini haphar kaham wng glak,

aro nokhani pantwibo klai glak.

40 # Yap 26.8; 2Ha 8.20. Nwng nini seng bai se ma chánai,

tei nwng nini nwphayungno ma monnai;

tamo khe nwng dundroksaui bini seleng

wngwi tongmani yakni yóknai.”

41Hakhe tabuk bupha Isak Jakobno a hamari rwmani bagwi Esau Jakobno naislerjak kha tei bo bwkha bising-bising hai hwnwi sa kha, “Aphani thwinani sal sampha kha, aphuru khe angphayung Jakobno butharwi páinai.”

42Tamo khe bwsla okra Esauni a kókrok Rebekano sajak kha; hakhe bo bwsla kusu Jakobno ring rw horwi hai hwnwi sa kha, “Nai di nwta Esau nono butharwi páinai hwnwi bwkha chabwi tong kha. 43Aboni bagwi sajla nwng tabuk ani kók khna di; nwng ani ata Labanni thani Haranno khárwi tháng di, 44Nwtani thamchi kwchang khlai ya sak aro’-no tong gra di; 45nwta jolima pogwi tei nwng bono khlaimarokno pogwi tháng ya sak aro’-no tong gra di; ulo ang khoroksa swkno rohorwi nono kiphilwi tubu-ui phai anw. Tamo ang salsani salo’-no bwsa khoroknwirokno’-no kwmana klai lang?”

Isak Jakobno Labanni thani rohormani

46Hakhe Rebeka Isakno hai hwnwi sa kha, “Ang Esau Hitini bwrwirokno káijakma a bihiksongrokni bagwi lengpro kha. Abo hai kheno Jakobbo khoroksa swk Hitini bwrwirok bai káijak khe ani langma-o tamo kaham wng sinai?”

Currently Selected:

YAPHANG 27: KOKBSI

Highlight

Copy