Matthew 15

Johova thüzho khaküsüko

1Süsa Jerusalem lü küvori lüsiküseko mo Phariseekoe Jisu kitso die; 2Dipühna n sadzikoe thazü pethimi zhoko varhüyo la? Kükrenamoli, puko mhaküti mhüzü u be miltüyo mo tina; zita. 3Eli Pu süko zü küla die sü; neko ri dipüh nai netho ne zhoko na Jihova zü khaküsüko varhü yola? zita. 4Kükrenamoli, Jihova thazü, npo nzu rhoyite, mo thüma kühopühri pupo puzu rüshuhyo lize süo posata te, süzi püh müzü zo. 5Eli nekoe po die, thüma kühopühri püpo püzu yisü, No ayono dipüh kümve ngoyi küto müsüh sheli süko mütü müthu kha püh Jihova prüve; süzi küsümi püpo püzu rho mo zori pü kükha bayomo. 6Sidie nekoe netho ne zhoko na Jihova zü khaküsüko püh kümüthu thi ve. 7Neko küthürakütiko, Isaiah sadzüküseoe neko na mhapo mve shüh püh kümüta hibi: 8Thüma hiko uta püh a müno voriyo, mo püko ta püh a rhoyo; eli püko lüno a züh kümücuh shüh tayo. 9Eli pükoe thümae zü khaküsü kümütha züko süh mütha die püko rüsu thüdo thi tate; zita.

Mha uva mürho vayo kütiko

10Sidie pü makroo ci Püce süyi die püko yisü, nekorünyi die seyi te, zita. 11Thüma talü külüko thüma thi mürho vayo mo; süri thüma lünoküpariko thüma va mürho vayo. 12Süsa müthaküyiko vori Püce po die sü; Phariseekoe zü hiko se küyi sa püko nümo ba küta noriseba tatho? zisü. 13Jisu püko khü, küla die sü, Tüyo küba Apoe lüsükümo süh mütüko pava zoto. 14Püko po tsüzi balute! Pükoe u mhüküce shotha mo kümüthako zo; sülize mhücemi po mhücemi shotha lize unyi künanyi rütu tükhülü lü tayo. 15Sücesü Peter Pu yisü, züve hio co küla münü püh hako ka süte, zita. 16Süri Jisu sü, nekori tsüri mhase kükreyi mozo me? zita. 17Mhakühopühri utalü külü khü u vadelü ki die khapüh covüthilü kügü vayo küti neko se mo zo me? 18Süri utalü no küpari khü ulüno pariyo, mo süko thüma thi müsu vayo. 19Kükrenamoli ulüno küparikoe, lüdo küsü, küdokhri, perüüküthi, Kürüzü kürügo, kücezü zhopo, mikütha hikohi pariyo küti na. 20Mha hikohi tho mi thi müsu vayo, eli ube mütü mo die mha küti na mi thi müsü vayo mo; zita.

Canaanmipü püh kümülü dzüh

21Süsa Jisu sülüno ta rüde sü Tyre mo Sidon nyi rünaco vota. 22Sücesü Yhie! Canaanmipü püh rüna sülüno vori die se zo die sü A phimüzhe zote, Nyepoo no David nuo; anupü küsü rüpü po kübü müsü shüh ta tale; zisü. 23Eli pü züpühri popüh süpü khü küla mota, Süsa müthaküyiko Püce vori die pü yisü; pü po tatate, kükrenamoli pü u sa müdzi die se tazote; zita. 24Eli pü la sü, a kütsüh püh müdi küva Israelmi kokroko ce küsü zo; zita. 25Süsari thüno hipü vori pü rüsü die, Nyepoo a khrühi sü zote, zi bata. 26Eli pü la sü, natsimi lüva kügü püh tüshikoce sü küti pütü mo, zi lata. 27Süri thünopü lasü, kütho zo Nyepoo, süri tüshiko zori u nyepomi mhacoba yono rüra kükiriko pati yozo, zita. 28Süna Jisu pü yisü, n kümülü zhozo ho, n külüo thipüh n küprüo thiyite, zisü. Süsa pü nüpü sütütülü sü sührhoyi ta.

Jisu küthimi kükro thi küsührho küsü

29Süsa Jisu thinyi sülüno ta sü Galilee dzüküzho mürhe vorita. Sidie pü cejüthuyo kho die süyo baba ta. 30Sücesü thüma kro künye püh Püce vori, mo sükoe pheyhomi, mhücemi, zü po küthomi, lülemi, mo küthikünyi kükrekre kütiko züh die vori, mo Jisu süko mütü thi küsührho sü. 31Süsa makrooe züpoküthomi züpo küta, lülekütami sührho küta, pheyhomi shotayi küta, mo mhücemi mha ngoyi küta, hiko ngo die u malhü thi die Israel Jihova shühta.

Thüma nyeda vathi küsü

32Süsa Jisu müthaküyiko ci püh Püce süyi die püko yisü, I thüma kroo phimüzhete, kükrenamoli, püko tha zho süh azüh bate, mo püko mhapühri ti küto bamo, mo I püko po thükhü thi die kütsüh sülho, püko sholü phesari tayi ve tina; zita. 33Sücesü müthaküyiko sü, uko nhatsa hilühino dipüh bi die thüma hidühi na kütico ngo püh püko külhuthiyi ve ta? zita. 34Jisu pükoce, neko tsükhrüda didü püta la? Zi die kütso; püko sü, thüna mo khu künyi hu ba, zisü. 35Süsa pü thüma kroo po ki cejü bayi no die pü zü khasü, 36Sidie pü tsükhrüda thünako mo khuko khi pühyi die galiphi sü die cephre püh müthaküyiko belü sü, mo püko süko püh makroo zasü. 37Sidie püko mütü süko tiyi die u küchu kühi thiyi; süsari ti kümüshoko shi küngu püh khopühne thüna chu layi. 38Mo sünha mhati küyiko thünothünu mo natsimi sa kümo mi nyeda. 39Süsa pü thüma kroo kütsüh sü va die, püzu pühlü lü die ta sü Magadan rüna taralü vori ta.

Currently Selected:

Matthew 15: NAG5BSI

Highlight

Copy