Matthew 16

Zasi püh sho küsü

1Sücesü Phariseeko mo Sadduceeko vori die pü po tüyono zasi püh thipüh püko ka no die pü müdephi ta. 2Pü süko zü küla die sü, thüva küyice nekoe sü, tü müre bate, tsüsa tü ve tato; ziyo. 3Süsa küshüo lize, tü sü tato, kükrenamoli, tü müre mo kümhü sü zaza ba terü, ziyo. 4Gwine mo kürüzü shühye hio zasiko libi phu tayo küti zo, Eli Jonah sadzühküseo yono thi küsü zasio zo kümosa zasi kükre pühri khala süyi Ihote; zita. Sidie pü süko kha va die tata.

Phariseeko mo Sadduceeko khreyono münuyi no küsü

5Süsa müthaküyiko tasü kükreco vota, eli püko tsükhrüda khiyi rükra mota. 6Sücesü Jisu püko yisü, neko Phariseeko mo Sadduceeko khre yono münuyite, zisü. 7Eli püko thoümko dolü küpo die, süsü kükrenamoli ukoe tsükhrüda khiyi rükra mo küta na mütsete; zi bata. 8Jisu süo seyita die püko yisü, neko, kümülü kütsako, dipüh na neko tho neko dolü küpo die, sü kükrenamoli uko tsükhrüda khiyi rükra mo küta na te, süzi yo la? 9Neko tsüri lü kükreyi mozolu me? Mori tsükhrüda pühnguko mo mi nye pühnguko mo didü püh shi küngu layi shi kütiko rükra mo la te me? 10Mori tsükhrüda thünako mo nyedako, mo khopühne ditsu shi layi shi kütiko. 11Neko dipüh bi die I tsükhrüda rüle po ba kümo, mori neko po Phariseeko mo Sadduceeko khre yono münuyi no küsü ri se kükreyi mota laha? 12Süsa pü püko po tsükhrüda lü khreyo münuyi no bamo die, Phariseeko mo Sadduceeko kümütha zü yo münuyi no küsüco seyi.

Peter Jisu dzüh phra küsü

13Süsa Jisu tasü Caesarea Philippico vo die Pu müthaküyiko kütso die sü, Thümakoe thümanuo hi yisü sopüh lizü lü bata ha? zisü. 14Pukoe sü, humi n yisü John mi zülu khaküsüoli, humi Elijah li; mo kükrekoe Jeremiah mori sadzühküsemi püh lizi die poyo le; zisü. 15Pu süko yisü, süze nekoe a yisü sopüh lizi die lü yo la? zisü. 16Simon Peter sü, Noe rhühküba Jihova nuo Khristao zo, zisü. 17Jisu lasü puce po die, No Simon Bar Jonah nuo no yhevetho zo, kükrenamoli, uthi mo uza lüno mo, eli tüyo küba a Po tho hihi po püh n müse müngoküsü zo tina. 18I nce potü süto, Noe Peter (Püco kütsü) mo kütsü hio yono a kühuce thito; mo meza kharüko pümünyi vayi lho. 19I tüyo küde cabiko yipüh n prüto; mo no cejülü dipüh kha sheli tüyori khato; mo no cejülü dipüh khri sü sheli tüyo ri khri süto; zita. 20Süsa Pü müthaküyiko po Pü Jisu Khristao li küti püh mipüh ceri pohi no die püko ce pota.

Jisu putho Pu müzhe mo Pu süh dzüh küpo

21Süyogwino Jisue müthaküyikoce Pu dipühbi die Jerusalemlü kho mosü shi, mo dibi die mülhiko mo pethiküzhoko mo lüsiküseko belü kümüzhe die sa teshi küti mo Pü zhosüh nha rhühlasü ta küto dzühko püh sükoce po shühdü süta. 22Süsa Peter Püzüh kre vodie Pü likhu die sü, Nyepoo npo süzi ta süzo, mhapühceri mha hiko po n yo thita kündi zo, zita. 23Eli pü rürüh vo Peter yisü; Satan, no ta asaco vo tayi, no a shokha pühzo, no Jihova müdolü moli thüma rüle mo thüma zholü ba küti na; zita. 24Süsa Jisu müthaküyiko yisü, thüma kühopühri asa müdzi künyimi putho pu kükhakürühyi die pu cross püh die asa müdziyite. 25Kükrenamoli thüma kühopühri pupho mükrü püh pu zü thiyi künyimi pu süo müdi vato; mo thüma kühopühri ana pu pho müka müdi küvami pu süo ngolayi zoto tina. 26Süze mipüh cejü mütü prapüh puzü thiyi zori pu kürhühro müka va lizepu dipüh küpra ngoyi ta? Mori mipühe dipüh püh pu kürhühro züh küleyi veta? 27Kükrenamoli thümanuo Pu po zapozale süh die Pu shoyimi züh kirito, mo Pu mipühpüh mhatho khüce züh die püko zhokhro thi püh prüto. 28I nekoce potü süto, hice kütha humi Thümanuo Pu küdelü küvori ngo kümothe küsa ngo Ihozo küti kropüh tha zo; zita.

Currently Selected:

Matthew 16: NAG5BSI

Highlight

Copy