Matthew 14

John zülü khaküsüo dzüh mo Jisu mi nye pühngü vathi küsü

1Sücesü Herod küdeo Jisu za müle pari küta se die pü cetako yisü, 2Hiohi John zülu khaküsüo tazo, pü küsalüno rhühla süri tazo, süna umalhü mhatho künye hikohi Püyo thi pari bata zo, zita. 3Herod süosü hizü pü sazüo Philip cemi Herodias na John tüyi die pü khapüh küdücelü süva. 4Kükrenamoli, John süo yisü, no thüno süpü yi küti thüzho mo, zi küsü na. 5Mo pü süo dokhri küva rhü küsüce makroo müprüh ta, kükrenamoli süko John yisü sadzüdküsemi püh thiyo tina. 6Süri Herod kümünu tüso vori küyice, Herodias nupü nasü püh püko mhüzülü sü die Herod nü thiyita. 7Süna thüno süpü püce mha kühopüh sho zoshi pu küshoo püh pu prü toli zi die pu zü khasü va. 8Süsa süpü sü müzümüra puzu puce popüh kümüzü bi die sü, No John mi zülu khaküsüo pi püh mükhu pühlü süh vori a prüte, zita. 9Mo küdeo ri pülü kümüzhe ta; süzori pü zü khasü küva na mo thüma pü züh ba die hi kübako na süo püh vo thünopü prü no die pu zü khasü va. 10Sidie pu mi po vo küdücelü John pi veyita. 11Süsa mi pu pi sü püh mükhu pühlü süpü vori die püh rüli süpü prüva, mo süpü süo püh die püzu ce vori ta. 12Süsa pü sadziko pu rüngu püh vo khrüh va; sidie vori Jisuce posü.

Jisu thüma nye pühngu vathi küsü

13Süsa Jisu zü süo se küyice Pu püzu pühlüno ta pü tsühkre vota; Süri thümako sü sesü die rüna lilü u phe tasü pü sa müdzi vorita. 14Sücesü pü thüma. Kroo ngo küsüce Pu süko phimüzhe die süko küthi künyiko thi küsührho sü. 15Süsa thüva vori küyice, pü müthaküyiko Püce vori die sü, thinyi hio thüralü te mo tüsozho ri vote, süna thüma kroo kütsüh püh rünalü sü die püko po vo utho u lüva khritiyi tate, zita. 16Eli Jisu pükoce po die; püko po tata mori vezo, neko mhayi püko po tite; zita. 17Eli süko püce, hako hicehi tsükhrüda pühngu mo khu küna püh küta zo; zisü. 18pü sü, süko püh ace vorite; zisü. 19Sidie Pü thüma kroo po ki nhayo bayi no sü, mo pü tsükhrüda pühnguko mü khu küna pühyi die tüyo pe die galiphi sü die brüphre püh müthaküyiko belü sü, mo püko süko küza püh makroo prüsü. 20Süsa püko mütü ri süko ti die püko küchü thiyi; mo püko tishoko shi küngu püh khopühne küriküna chu layi. 21Süze püko mhati küyiko thüno thünu mo natsimi sa kümo mi nye pühngu müsüh lisi.

Jisu zü mhü shota küta

22Süsa Jisue müthaküyiko po pü makroo kütsüh küba doce ta püzu lü lü die tasü pü mhüzü lishico ku ta nosü. 23Sidie pü makroo kütsüh küva sa, pü sho tozu die takre cejüthu pühyo khota; mo thüva ta zori pü lübi sülü bata. 24Eli tükhrae püzuo mütsu die khra vori küta na süo hü küye püvo zü mütsulü tata. 25Sücesü tüzühyo rikhu küvale dao tülü Jisue züyono ta pükoce vorizü. 26Eli müthaküyikoe Pü züyono ta vori küzü ngo die müprüh shüh die sü, Rüpü püh tazo sidie u müprüh pü se zota. 27Süri Jisu rükri pükoce po die sü, neko lü ne nüyite, I zo müprüh ta hite, zita. 28Süsa Peter Püce po die, Nyepoo no zo lize apori züyono ta nce pheriyite; zita. 29Mo pü sü pherite zisü, sücesü Peter püzuyono ta kiri die Jisuce phe tozü die dzüyono ta süta. 30Eli pü khrade kürüh ngo südie müprüh shüh ta, mo rülüprü ta tozü ta. Süna pu sü, Nyepoo no a küla süte, zita. 31Süzisü mütha Jisu püpo sho püh pari pü ceyita, sidie pü yisü, Yhei n kümülü kütsao, dipühna no külüdo ta ha? zita. 32Süsa unyi püzulü lüri küyi sa tükhra lazüh ta. 33Süsa püzulü kütako vori die pü rüsüta, sidie püko sü, No Jihova nuo küthozo; zita.

Jisu Genezaretlü küthi künyimi thi küsürho küsü

34Süsa püko süolü prüh prayitice, tasü küsolü, süosü Genezaretlü prata. 35Sücesü thüma sülü külhüko pü se küyice püko thüma kütsüh püh rüna süshi sümhü mütü sü die küthi künyimiko züh püce vori. 36Sidie süko. Püce, püko po pü khüphre zori nyisü no die shota; mo süo zori nyi küyi khüko sührhoyita.

Currently Selected:

Matthew 14: NAG5BSI

Highlight

Copy