LUKE 3

John Baptist Niu Dinronbo

(Mt 3.1-12; Mk 1.1-8; Jn 1.19-28)

1Wangdi Tiberia niu takum kariu-je-mangiukiu mawang wangmibo tingga; Pontius Pilate niu Judaea ramlungga dithinpao thiukinbo tingga, Herod niu Galilee mawang bamga, khatdi pasai kariupiu Philip niu Iturea nai Trachoniti luongriang mawang bamga; Lysania niu Abilene mawang bamga, 2khatdi Anna nai Caiaphas niu dibo singkupao thiubambo wan ramjing ga , Zechariah nahpiu John khuga Tingwang chamse piwang-e. 3John niu Jordan Giuki uigen pakhiangna tadronjiu, “Naliu nuan gasu mari lujiu tadui nphum lulo, sichiusai Tingwang niu naliu nuanse kuak khai bine,” chiujiu dinron wangde. 4#Isa 40.3-5.Phaimiukakung Isaiah ariakga raokhaibo kumjiu:

“Mai khatniu ramjingga senjiu kin-e:

Rapiu npuise kaden khailo;

2 paniu tadrabo npuise kam maji khailo!

5Pabek hinadi kamphui khailo,

paluong hinadi kam ncham khailo.

Nkhuibo npuise kam maji khailo,

2 khatdi taradbo npuise kam manai khailo.

6Sichiujiu Tingwang gu juringbose mai hinaniu ngao rabo-e!’”

7 # Mt 12.34; 23.33. Maidung siniu John khuga tadui nphumra wang-e. Siga paniu paliu khuga din-e, “Naliu kaniu kaikikdung! Tingwang lungpom gasu naliu marilubui-e chiubo saoniu naliu khuga dinjiulo? 8#Jn 8.33.Haikumbo ngamkam hainiu naliu nuan gasu mari lubui-e chiubo lenjiuma? Naliu ronna, aliura Abraham kaikikge chiu dinmi tulo. Iniu naliu khuga dinbo-e Tingwang ra haibo tudung haitu pijiu Abraham kaikik pithiu khai ngamme! 9#Mt 7.19.Singbang situ huimira marise kaden lujiu paphibang gase khai nbamme; kawibo sy masi makbo hina situ huilujiu chamiga thonkhai mirabo-e.”

10Maidung siniu pakhuga maniu-e, “Sichiusai aliuniu degu kamralo?”

11Paniu paokakge, “Pah ntiang nia bammai siniu wadi habo maileng pikhai bilo, khatdi katiu-kasak bammai siniu wadi habo maitu njan tiulo.”

12 # Lk 7.29. Ramkha khamai khangsia tadui nphumra wangjiu pakhuga maniu-e, “Katipao yo, aliuniu degu kamralo?”

13Paniu paliu khuga din-e, “Suikhaibo rigasu kha nkiu mane.”

14Riphendung khangsiadi pakhuga wangjiu maniu-e, “Aliu ndechiu ralo? Aliuniu degu kamralo?”

Paniu paliu khuga din-e. “Mai khat khugadi aratjiu, maksai manomjiu wa lutulo, khatdi mai khattudi kamaobo madam khai mane. Naliu phijeng siniu kabuibo thiululo.”

15John hai Messiah sima chiujiu maidung siniu maning sude. 16Sijengniu John niu paliu khuga din-e, “Ira naliutu tadui gasu nphum khaibo-e, chiudi asailam wangkinbo piu sira asuang di-e. Ira paphitop riangdi khira akaji makge. Paniu Masanbo Hiupuina nai chami ganiu naliutu nphum khai rabo-e. 17Paben-ga kazap bamme, sichiujiu tasiuse biulujiu pabowga khai maduimi rabo-e, chiudi pareng situra midlan lakbo miga thonkhaijiu rumi rabo-e.”

18Haichiujiu John niu pathak tam-tamjiu Kawicham hai maidung khuga dinronjiu, paliu npui gasu kali lura dinron khaide. 19#Mt 14.3,4; Mk 6.17,18.Sichiujiu John niu dihthinpao Herod tu pasai kariupiu nao Herodias tu lubo khatdi kakibo kasabo tienkam donniu rukhaide. 20Siga Herod niu John tu kavangkyga khaijiu, kasabo tiense kamsan lande.

Jesu tu Tadui Nphumbo

(Mt 3.13-17; Mk 1.9-11)

21Maidung mathiutu tadui nphum lubo sai, Jesu tudi tadui nphum khaide. Paniu kakheng thiujiu bamboga tinggen akhamse lepad sude, 22#Chab 22.2; T.Lui 2.7; Isa 42.1; Mt 3.17; Mk 1.11; Lk 9.35.khatdi Masanbo Hiupuina siniu makhao lun kumjiu pariga kiutao khaide. Sichiujiu tinggen lamsu chakhuan khat senkiu-e, “Nang hai Iniu lungsabo Anahpiu siakge, Iniu nakhuga alung kimsiakge.”

Jesu Gu Chavang-chavi

(Mt 1.1-17)

23Jesu niu pangam kamsubo tingga pagu takum samriu kumbo khangmide. Maidungniu patu maningbora, pahai Joseph nah, Heli nah, 24Mathat nah, Levi nah, Melchi nah, Jannai nah, Joseph nah, 25Mattathia nah, Amos nah, Nahum nah, Esli nah, Naggai nah, 26Maath nah, Mattathia nah, Semien nah, Joseph nah, Joda nah, 27Joanan nah, Rhesa nah, Zerubbabel nah, Shealtiel nah, Neri nah, 28Melchi nah, Addi nah, Cosam nah, Elmadan nah, Er nah, 29Joshua nah, Eliezer nah, Jorim nah, Mathat nah, Levi nah 30Simeon nah, Judah nah, Joseph nah, Jonam nah, Eliakim nah, 31Melea nah, Menna nah, Mattatha nah, Nathan nah, David nah, 32Jesse nah, Obed nah, Boaz nah, Salmon nah, Nahshon nah, 33Amminadab nah, Admin nah, Arni nah, Hezron nah, Perez nah, Judah nah, 34Jacob nah, Isaac nah, Abraham nah, Terah nah, Nahor nah, 35Serug nah, Reu nah, Peleg nah, Eber nah, Shelah nah, 36Cainan nah, Arphaxad nah, Shem nah, Naoh nah, Lamech nah, 37Methuselah nah, Enoch nah, Jared nah. Mahalaleel nah, Kenan nah, 38Enosh nah, Seth nah, Adam nah, khatdi Tingwang nah-e chiujiu maning-e.

Currently Selected:

LUKE 3: LIANBSI

Highlight

Copy