LUKE 2

Jesu Tu Manabo

(Mt 1.18-25)

1Sibo wan-ga Wangdih Augustus niu Rom kadihga lungbambo mai hina mairiak raorabo-e chiujiu chamtan padle. 2Haibo mairiak raoraithubo hai, Quirinius niu Syria gu dihthinpao thiubambo tingga-e. 3Sichiujiu mai hinase pagu-gu namdiga pazan raora tadsude.

4Joseph niu Galilee ga bambo Nazareth namdak gasu Judaea ga bambo Bethlehem namdiga, Chawang David tu mana khaibo bamgase tadde. Joseph niu siga tadbo lamra pase David kiriang mai-e. 5Paniu panaoleng khamkhaibo, Mary situ maluang lujiu mairiak raobo ga panai zan raora tadde, Mary se papum ripmibo-e, 6sichiujiu panainiu Bethlehem ga bambo tingga, ngena lungrabo tingse wangtang mide. 7Paniu naraibo thiujiu, piumainah lunglujiu, failep khatniu majiu lujiu khaoring kuangga maji khai bamme, palamra panaileng kiriuky dao makge.

Mily khuanmaidung Nai mazadung

8Sibo kadihga mily khuanmaidung khangsianiu paliugu milydung khuanjiu, luzamga jibamme. 9Rapiu gu maza khatniu paliutu lenkhaijiu, Rapiu maken siniu paliutu thaoben khaide. Siga paliu pingsui mide, 10siga maza siniu paliu khuga din-e, “Pingtulo! Iniu naliuleng Kawibo Champao phung wangbo-e, haise mai hina leng chunwi mathabo gu-e. 11Thainai David namdiga naliuleng Rankhaipiu Khrista tu mana khai bamme! 12Haisiniu naliuleng madan thiurabo-e: naliuniu ngena situ failepniu majiu lujiu khaoring kuangga majikhai bambo daosune.”

13Simakdakjiu tinggen maza riphen kengsui wanglujiu sibo maza situ maluang lujiu Tingwang tu thuonjiu chalui thiu sude:

14“Kukachangbo tinggen lam Tingwang ken dibamlo,

kadihpiriga paniu pachun kimmai khuga agi-manai bamlo!”

15mazadung siniu tinggen lam wanglan miboga, mily khuanmaidung siniu khat-khat khuga din-e, “Aliuniu Bethlehem lam tadlujiu Rapiu niu aliu khuga madu khaibo, khatdi padbambo haitu phui mataikhe.”

16Sichiujiu paliuniu kalangjiu tadmengboga Mary nai Joseph tu khatdi ngena siniu khaoring kuangga jibam niubo ngao daode. 17Sichiujiu mily khuanmaidung siniu patu ngao luboga, mazaniu ngena lamga dinkhaibose paliu khuga dinkhaide. 18Mily khuanmaidung siniu dinbo chiulumai hina paliu suang hamide. 19Mary niu haidung pakhiangna hai maningjiu khatdi makumjiu bamme. 20Mily khuanmaidungse mazaniu dinkhaibo kumjiu paliuniu ngaolubo khatdi chiulubo donniu Tingwang tu thuonjiu khatdi chalui thiujiu malanwang mide.

Jesu Zan Mathakbo

21 # Lev 12.3; Lk 1.31. Nidkak khat sai, ngena situ pagi romrabo ting wangtang miboga, patu lung makhaga mazaniu dinkhaibo zan siniu, Jesu chiujiu mathak khaide.

Jesu Tu Charakyga Kadkhaibo

22Mose gu Tacheng-tajai saisuijiu Joseph nai Mary niudi kam masan rabo tingse wangtang mide. Sichiujiu panainiu Jerusalem ga ngena situ Rapiu khuga kadkhaira phungtadle, 23#Tad 13.2,12.haise Rapiu gu Tacheng-tajai gadi raokhai bambo-e: “Nahraibo piumainah hinatu Rapiu leng kadkhai rabo-e.” 24#Lev 12.6-8.Paliuniu Rapiu gu Tacheng-tajai saisuijiu kaphina nia maksai makhao nia kadkhai ralengdi phunglujiu wang-e.

25Sibo wan-ga Jerusalem ga maipiu khat Simeon kubo bamme. Pahai kawibo khatdi palungchun ngutjiu Israel maitu gukhai bira khuanbambo piu-e. Masanbo Hiupuina niu patu maluang khaijiu, 26Rapiu niu ladriat khaibo Messiah situ ngaomak then pah shai lakge chiujiu ladriat thiukhaibo piu-e. 27Hiupuina siniu Simeon situ Charaky lungga maluang ngut khaide.Tacheng-tajai saisuijiu papui nai papiu siniu ngena Jesu tu Charakyga phungwangboga, 28Simeon niu ngena situ ponsu lujiu Tingwang tu thuonkiu sude:

29“Tuhoira, Rapiu yo, nagu ladriatse pi wangtang khai bide,

siniu navangpiu atu agi-manaijiu phutkhai sulo.

30Nangniu mai mathiu suangga kaden khaibo,

31nagu juringbo situ amik siakniu ngaolude.

32 # Isa 42.6; 49.6; 52.10. Nkengmai khuga kabenbo thao khaira-e,

khatdi namai Israel maileng kendibo daolura-e.”

33Simeon niu haichiujiu ngena lamga dinboga, papui nai papiu panai suang hamide. 34-35Simeon niu paliutu thoikhaide khatdi papui Mary khuga din-e, “Haibo nah haitu pijiu Israel mai kakengtu kam maha khaira khatdi kakengtu juring khaira Tingwang niu kadakhai mibo-e. Paniu maidung lungchun mahinbose din madu padjiu, maidungniu patu atungjiu Tingwang gu madan thiurabo-e. Sichiujiu lungchun magenthiu chariubo siniu, apang-heng kumjiu namalung risune.”

36-37Sigasu Asher kiphiuga Phanuel nahpui, pazanniu Anna chiujiu kubo phaimiukakungpui, kamipui khat bamme. Pase milubo sai takum chinnia ronna pakinatu maluang lung khaijiu, kamipui thiujiu tuhoi takum riaktachat-je-madaikiu tangmibo pui-e. Paniu Charaky situ nchun n-nien wadaodi saomakjiu Tingwang tu kahumjiu, khatdi kalum rijiu kakheng thiubambo pui-e. 38Sibo wansiak gase paniu wanglujiu Tingwang tu thuonjiu khatdi Jerusalem tu khenrang thiujiu phut khaira khuanbam mai mathiu khuga ngena lamga dinkhaide.

Nazareth Ga Malan Wangbo

39 # Mt 2.23. Joseph nai Mary niu Rapiu gu Tacheng-tajai saisuijiu kamlubo sai panai ky Galilee ga bambo Nazareth lam malanwang mide. 40Ngenase mawijiu tankhangde, khatdi ningtingniu phuikhang-e, khatdi Tingwang lungsiatse pariga bamme.

Jesu Niu Charakyga

41 # Tad 12.1-27; Taj 16.1-8. Takum machang Jesu pui nai papiu siniu Kenpadbo Ngee leng Jerusalem lam tadle. 42Jesu niu takum kariu-je-niakiu tangmibo gadi paliuniu sibo Ngeega tadle. 43Changibose loilujiu paliu kylam malanwang suboga, ngena Jesu sira Jerusalem ga bam mide. Sise papui nai papiu siniu silu makge. 44Maidung ruangga jaobam talakge chiu, maning lujiu, naikhat tadjing lubo sai panainiu pakiriang maidung nai pakahmaidung ruangga phiusude. 45Panainiu patu phiudao lulak mibo donniu Jerusalem lam patu phiura tadlan sude. 46Pasumbo naise Charaky lungga ntaolujiu, Jehudi maigu katipaodung ruangga paliu cham nkingjiu khatdi maniujiu bamniubo panainiu daolude. 47Palad kingkhai mai hina khatdi pagu ningting chamkak chiulu mai hinaniu paliu suang hamide. 48Papui nai papiuniu patu ngao luboga panai suang hamide, sichiujiu papuiniu pakhuga din-e, “ Anah yo, nangniu dekamjiu napiu anaitu haikumbo thak kamjiulo? Napiu anainiu natu phiujiu anai lung chariusui mide.”

49Paniu panaitu paokakge, “Dekamjiu nanainiu atu phiukin jiulo? Ira Apiu kyga bammi rabo-e chiubo naliu simak jiuma?” 50Chiudi pachamkak haitu panainiu sitanglu makge.

51Sichiujiu Jesu niu panai saisui lujiu Nazareth lam malanwang panai kadin piujiu lungkhangde. Papuiniu haidung pakhiangnase palungga lidkhai bamme. 52#1 Sa 2.26; Kad 3.4.Jesu se papum tankhangjiu, ningting mid-mid khang-e, sichiujiu Chara chamai thoi lujiu lung khangde.

Currently Selected:

LUKE 2: LIANBSI

Highlight

Copy