LUKE 4
4
Jesu Tu Hiambo
(Mt 4.1-11; Mk 1.12-13)
1Jesu niu Masanbo Hiupuina phuilujiu Jordan lamsu wangbo tingga Hiupuina siniu ramjingga maluang khai mide. 2Siga Satan siniu jeng atai hiamsude. Sibo lungga pah wakhatnadi tiumakge, sichiujiu tanusu lamra pawon mariu mide.
3Siga Satan siniu pakhuga din-e, “Nang Tingwang Nahpiu-e sai, haibo tudung situ pijiu taruak mawira chamtan pilo.”
4 #
Taj 8.3. Jesu niu paokakge, “Masanbo ariakga haichiu raokhai bamme, ‘Taruak ronna chamaina ringlu lakge, chiudi Tingwang ladkeng siniu ringrabo-e.’”
5Sigasu Satan siniu maluang lujiu, kadihpiri wangbam hina malod khatniu lenkhaide. 6Sichiujiu Satan siniu pakhuga din-e, “Iniu haibo pumtan hina khatdi chakhiu-chalan hina nakhuga pikhai bine. Palamra Iniu achunbo mai khuga haise pikhai raleng akhuga pikhai mibo-e. 7Nangniu atu kahum khaisai, pakhiangna haise nagu thiu rabo-e.”
8 #
Taj 6.13. Jesu niu paokakge, “Masanbo ariakga haichiu raokhai bamme, ‘Nangniu nah Rapiu Tingwang tu kahum rabo-e, khatdi nangniu patu ronna macha rabo-e.’” 9Sigasu Satan siniu patu Jerusalem lam maluang tadle, khatdi kuthubo Charaky ton-ga pichap khailujiu pakhuga din-e, “Nang hai Tingwang Nahpiu-e sai haigasu jongkiu lulo. 10#T.Lui 91.11,12.Palamra haichiu raokhai bamme, ‘Tingwang niu natu manang khaijiu pagu mazadungtu langkiu khai bine.’ 11Sironna makjiu, ‘Tatu gasu naphi kam ajam makra paliu benniu natu jukhai rabo-e.’”
12 #
Taj 6.16. Siga Jesu niu paokakge, “Haichiujiu raokhai bamme, ‘Nangniu Na-Rawang Rapiu tu madiumak rabo-e!’”
13Satan siniu Jesu tu kahiambo hina gasu madiuloi mibo sai, pakak khatleng patu saodiak lujiu tadmide.
Jesu Niu Galilee Ga Patien Thiusubo
(Mt 4.12-17; Mk 1.14-15)
14Sigasu Jesu niu Galilee ga malanwang mide, khatdi Masanbo Hiupuina pumtan siniu patu maluang bamme. Paracham hai sibo wonjeng hina sichia mide. 15Paniu maduiky gase katikhaide, sichiujiu mai hinaniu pakense dinjiu patu thuon sude.
Jesu Tu Nazareth Ga Suikhai Makbo
(Mt 13.53-58; Mk 6.1-6)
16Sichiujiu Jesu niu patu makuat khangbo bam Nazareth ga wangjiu Tabamnai machang maduikygase tadjiu bamme. Paniu Masanbo ariak kenra chapkhangde, 17sichiujiu phaimiukakung Isaiah gu ariakkhuangse patu pikhaiboga, haichiu raokhaibo bamga paniu lepadjiu kensude:
18 #
Isa 61.1,2. “Rapiu gu Hiupuinase ariga bamme,
palamra kawichamse lungkalak maidung khuga phungwangra paniu atu kadakhai bide.
Kavangkyga bammaitu lepad khaira, khatdi pamik tiat maitu pi-ngao khaira
khatdi pamad padjiu bammaitu khi khaira paniu atu langkhai bide.
19Rapiu niu pamaidungtu rankhai rabo chamse madukhaira pawanse wangtang mide.”
20Sichiujiu Jesu niu sibo ariakkhuangse majiu lujiu, macha bambo piu khuga pikhai lujiu ntaokiu mide. Maduikyga bambo mai hina patu matingjiu phui bamme. 21Siga paniu paliu khuga din-e, “Masanbo ariak hainiu dinkhaibose naliuniu chiulubo kumjiu, haise thainai wangtang khaide.”
22Paliu mathiu lungchunse pakhuga ngut mide, khatdi paniu haijiukha chalad dinsibo gase paliu suang hamide. Sichiujiu paliuniu din-e, “Haise Joseph nahpiuse makma?”
23Paniu paliu khuga din-e, “Naliuniu haibo kadincham hai akhuga dinsu rabo-e, ‘Phaimiupiu yo, naronna natu kam mawi lulo.’ Capernaum ga kamkhai mibo naliuniu chiulubose akiluong haigadi kamkhailo chiujiu naliuniu akhuga din sune.” 24#Jn 4.44.Jesu niu dinkiu lan-e, “Iniu naliu khuga dinbo-e, Phaimiukakung situ wadao khatdi pakiluangga lukhai makbo-e.”
25 #
1 Chaw 17.1. “ Acham kinglo, haise palingbo-e nda Elijah ken-ga Israel mai ruangga kamipuidung kengjiu bamniu-e. Sibo tingga takum sum paphan tingriu kiumakjiu kadihpiri pabam hina ga chakhum katanbo wang-e. 26#1 Chaw 17.8-16.Chiudi Elijah situ Israel mai, kakimai khuga langkhai makjiu, Sidon luongriangga Zarephath ga bambo kamipui khuga ronna langwang khaibo-e. 27#2 Chaw 5.1-14.Sichiujiu phaimiukakung Elisha ken-gadi ka-nphenmai kengjiu bamniu-e; chiudi Syria mai piu Naaman tu makbo mai kakimaitu piwikhai makge. “
28Maduikyga bam maidung siniu haise chiuluboga paliu lung pomchang pom mide. 29Paliuniu sulujiu, Jesu tu namdi lenlam jupad lujiu, paliu namdi thiukhaibo luongton gasu, chakhaolam tunkhai mira maningjiu maluang padde. 30Chiudi maidung rong gasu pah tadpad mide.
Rasa Phungbo Piu
(Mk 1.21-28)
31Sigasu Jeau niu Galilee namdi lungga bambo Capernaum gase maidungtu katikhaira Tabamnaise tadde. 32#Mt 7.28,29.Pumtan jaojiu katikhai bibo donniu mai hina paliu suang hamide. 33Maduiky lung gasu rasa phungbo maipiu khatniu pakhuan tanjiu senpad sude, 34“ Oh! Nazareth Jesu yo, nangniu aliutu dekamlo chiujiulo? Aliutu kam mahara nang haiga wangjiuma? Nang saolo chiubo I si-e: Nangra Tingwang gu masanbo ladlangtadmai-e!”
35Jesu niu rasa situ chamtan pi-e, “Maliu makjiu bamlo khatdi sibo piu khugasu padmilo! “ Siga rasa siniu paliu masuangga maipiu situ kamkao khailujiu wadi patu kam masa makjiu padmide.
36Mai hina paliu suang hajiu khat-khat khuga din-e, “Haikumbo ladkengse dechiubo gulo? Pumtan jaojiu rasa situ chamtan pi-e, siga paliu padmide.” 37Jesu ken haise sibo luongriang pakhiangnaga dinchia mide.
Jesu Niu Maidungtu Wikhaibo
(Mt 8.14-17; Mk 1.29-34)
38Jesu niu maduiky situ phutlujiu Simon kyga wangde. Simon naise kakhunjiu mara bambose paliuniu Jesu khuga paokhaide. 39Paniu tadlujiu, paji mungga chaplujiu kakhunbo situ tadmira chamtan pide. Kakhunbose pakhu gasu tadmide, sichiujiu paniu sulujiu paliutu macha khai sude.
40Naimik kiumibo saiga paka-paphen kabammai hinaniu mara sathiujiu bambo hinatu Jesu khuga puiwangde; paliu mathiu riga paniu paben kaba khaijiu paliu mathiutu wikhai bide. 41Rasadung niudi maidung kakeng khugasu, “Nang hai Khrista, Tingwang Nahpiu si-e!” chiu senjiu pad karen mide.
Jesu niu rasadung situ maliu makjiu bamra chamtan pi-e, palamra paliuniu pahai Messiah-e chiubo sibam mibo-e.
Jesu Niu Maduikyga Dinron Tadbo
(Mk 1.35-39)
42Tingben padboga Jesu niu sibo namditu phutlujiu mai habo bamlam tadmide. Siga maidung siniu patu phiusude, khatdi paliuniu patu phiudao luboga paliutu phutkhai makra kamsude. 43Siga paniu paliu khuga din-e, “Tingwang niu atu langkhaibo saisuijiu, Iniu katam-tambo namdi lamdi Tingwang gu Chawangdih lamga kawibo champao hai dinron tadrabo-e.”
44Sichiujiu paniu sibo luongriangga bambo maduiky hinaga dinron khaide.
Currently Selected:
LUKE 4: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
