LUK 11

Swgwnam Pagoqkam Jisug Tomswrnam

(Mt 6:9-13; 7:7-11)

1Lok golo Jisu xumdul doonum, hoqgv mwv mvnya yukam mwwg buu akgon mwam benum “At Sw Jon mwwg buu tulungam xumdwb tomswrnum, hvbkalam no kam ngulam xumdwb tomswr tvb.” 2Jisu bulam benum, “Hwdlo nulv swgw yikam, soq sib beto;

“Ab:

Noqg eminv dvrwq xignvka;

Noqg lvpw-hatiam haamto.

3Ngulug looxiam dvsam looxiam ngulam jitbv.

4Ngulam nyimur-wmur boam ngulv axia jinam hvbkalam

Ngulug nyic tulungam ngulam axia tukub

Hoo ngulam ator jaqb pooka-yirka kob wgmab.”

5Hoo Jisu mwwg buu tulungam benum, “Nulv hiyvkam akgon ajin ak dookub ai nywywrangam mwwg dookub wl mwam begdvn ajin ngam wtw lo toqum go nvrwqlab. 6Ngoqg ajin ak nyoyw wnbov ngoqg nammwb nyiin haapa ku, hoqgv mwam ngo hog jis dooma!’ 7Hoqgv mwv ura hoqgv noqg ajin akv, ‘Ngam bisup-beyab maabv hvl birwq baloqkam, hoo viyap pam cwqtum paku, hoqgv ngoqg ko tulu ngvla ngo yubl doodwn, nam hog gokam jitab ngo gorab rabnyi kuram! 8Vv hoqnyiloqkam hoggv yu? Ngo nulam bedwn noqg ajin ko-gab mwv gorabl nam wtwngam jima sujaqkam noqg hvnyw doomab kogam gab mwv hvraqb gorabl noqg mwwnam luucw-luutam nam jitayin. 9Hoqgv ngo nulam bedwn, koto, homolo nulam jitayin, meeto, homolo nulv kaapa tayin, viyap pam cedinto, homolo nulam viyap pam ciqko jitayin. 10Hoqgab hiyv lajaqkam konbov nvvrwqdvn, hoo meegaq bov kaapa keedwn, hoo hiyv lajaqkam cedin boam viyap pam ciqko jidwn. 11Nulug pengko ho hiyv hoqhvb ak doodwn mwwg ko tuupv ngui loqk hvl koi nyiloqkam mwam ngui jimab tvb yaangam jikub dvn yv? 12Ho mwv pwp loqk hvl koinyiloqkam mwv pooxu yvs yaangam jikub tayin? 13Nulv almas tvl hvraqb nulug atv atwg ko tulungam albo akiam jidwb cengn do, hoqnyiloqkam ao gvda tolo doonbo Abv mwam konbo tulungam hog hwdgo dvrwqbo yalam jibin maatayin!”

Jisu la Beljebul

(Mt 12:22-30; Mk 3:20-27)

14Jisu becin maanbo ui ak ruqlinum, ui akam ruqlin yukam goocin maanbo nyi akv goorab kunum, hoo nyi tulungv vcib lomnum. 15Hvbmabde bulug tuuginv benum, “Ui tulungam ruqxa dvb Beljebul galoqkv, mwv ui ko tuup akv.” 16Tuugin mwam vnyiq hang hengka maalo mwwnv Pwnbog toloq gvjaq nyiloqkam hoglo ak swrdorxeqb nyil kaakin tvbwk hvl mwam benum. 17Hvbmabde Jisu bulug hang mwwnam mam cengtwl bulam benum, “Hogloq gvda hoojaqkam atam atv ceebio baqdwn hv niqtuq dooma dvn, hoo hiyvg imiq dvparv parkin maadwn hv yuupaq dvn. 18Hoqgab uiyig lvpwngv pwsaq pwsaqb nyil pongparal pamin suba nyiloqkam hog buiyu soq sib dooyu tayin? Ui tulungam ruqxa mvdwb nulv ngam ui ann nvdag ator jig dvnvk hvl begam gab ngo soq sam bedwn. 19Ui tulungam ngo ui ann nvdangv ruqxa dvn nyiloqkam hiyv nui yu nulug at ui tulungv ywwn gvdwn? Hoqgab bulv nulug pw-hwwdy bo nyi tulub nyitayin. 20Hvbmabde Pwnbog ator hoqgv ngo ui tulungam ruqxa baloqkam Pwnbo lvpwngv jvqtw jaqb nulug ogumb haapa kun. 21Nyi atorbo akgon nwwxo svtam mwlwngam hindjaqb mwx-mvaql atwg nam deela lo rvkil daqg bvnyiloqkam, mwwg swwnam gumn mwlwngv cumcum jaqb dootayin. 22Hvbmabde mwam tembo yaab atorbo nyi akgon haabnv mwam mviya yukam at hoqg hingwnam nwwxo svtam mwlwngam naareql wg gvdkun, hoqgv mwwg dvco conam dvrab tulungam horpin-hora dvn. 23Hiyv nyi akgon ngoqg lvgab dooba maab nyiloqkam mwv ngoqg ceebiob doodwn, hoqgv hiyv nyi akgon ngam svkal noocum ming gvma bov, mwv cwrsaq-bvraq twqb mvdwn.

Almanbo Yalwg Wkurnam

(Mt 12:43-45)

24“Almanbo yalv nyi akgon hoqgv lengla yukul mwv iss doomako nyookub gaqknv-gaqknv doonu dvb mwwdwn. Ham meepa maaiyam mwv bedwn, hogloq nam hoqgv ngo lengl wikun, ngoqg hoq nammwb wkur taikun. 25Hoqgab mwv wkurnv nammam dvrwq dvb la kvtaq alwb doodwb kaapa dukun. 26Ho mwv wnv mwam laabo yaab almanbo yalv kvn paqta go lvkin gob boalayil hoqho doodwn. Hoqgab hoq nyi ak hoqg swwnamv otuqngam hilayab almab nyidkun.”

Jvqtw jaqb Hemp Podynam

27Jisu soq sam beyamnvn, nyem ak nyi pvtw hoqgv mwn vc alwb benum, “Namnvn dwr buqtwl sokambo nyem ak hvvjaq hemp ponam jaqkv.” 28Hvbmabde Jisu birwqnum, “Pwnbog benam mam tatwl ham bugil swwnbo nyi tulungv hemp ponam jaqkv hvl!”

Swrdorxeqb Nyil Kaakin Tvbwk hvl Gumnam

(Mt 12:38-42)

29Nyi tulungv Jisun hwwiyum tvl mwam benum, “Swnyw-soolog nyi tulu si hvkam bvxeq alwb nyima dvn! Swrdorxeq loqk hvl bulv gumnum, hvbmabde Jonag swrnam mam bepa maabjaq bulam hiyv nvkam swrnam mam jiram. 30Hoq hvbkalam Nenibi nyi tulu gab nyiqry kaanbo Jona swrdorxeq akgob nyinum. Hoqgab soolog soq hotam nagub Nyia Ko Tuupv kaacin deenam gob nyidwn. 31Pw-hwwd aalam svko gvdag vi-koory annv daqrab layil soolog nyi tulu sam yolu betayin, hoqgab Solomonwg nyijwq-nyegam mam tatabnvl swcw nvg gwwl gon hoqgv haapa kun, hvbmabde Solomonnvn koi yaanbo ak soq si doodo. 32Pw-hwwd aalam Nenibi nyi tulungv soolog hotam lvgab daqrab layil sam yolu betayin, hoggab Jonag betamnam mam bulv tatwl bulug nyic hoqgv wkurnum, hvbmabde Jonanvn koi yaanbo ak soq si doodo!

Gvvg Huto

(Mt 5:15; 6:22-23)

33“Hiyvkam muram rwgab tvl kvvciq golo ap maadwn hoo pwcw pooga ura golokam ham ap maadwn, hvbmabde urab haanya bo tulungv hutongam kaapa mvdwb mur tvtam nan ak golo apdvn. 34Nulug vnyiqkv nulug gv gab mur hvb nyidwn. Nulug vnyiqkv alwb dooikam nulug gv dorpwngv huto rooxo dvn hvbmabde soq si alwb doomayin nulug gv dorpwngv kan rooxo dvn. 35Hoq gabnvl noqg uraho doonbo hutongam kan mvma dvb hengab to. 36Hoqnyiloqkam gvvg dorpw ho kan vcwr gokam doomab noqg gv dorpwngv huto rooxo yukam, murwg huto hoqg lvlaqkv nam huto jinam hvb nyidwn.”

Jisu Nyijwq-nyegam Tomswr boam la Parisi Tulungam Yolu Benam

(Mt 23:1-36; Mk 12:38-40)

37Jisu goonam mam goonya yukam, Parisi nyi ak mwwg lvgab dvnam dvtajuk hvl mwam goqnum hoo mwv urab haabnv dvtam tebolho doanum. 38Hvbmabde dvnam dvma daab Jisug alaq losuq maanam mam kaatwl mwam hoq Parisi akv lomnum, 39Hoqgab At Sw mwam benum, “Parisi tulu nulv huku pvtaq aga aro ngam deexaql xaxaq dvn, hvbmabde urab nulv yolu-swcin bvla almanbo rooxongam nyidwn. 40Nyiidam bo tulu! Pwnbov agangam bvl pwnbov urangamkam bvl pwma namyv? 41Hvbmabde huku pvtaq uraho hog nvkvxeq doodwn ham jwwgwbo tulungam jito, hoo nulgab hog mwlwngv dvrwq kvdab nyitayin.

42“Hvkam bvxeq Parisi tulu gab hentwr-kaasnamv dootayin! Nulv Pwnboam jidynam aro ngam mwlwngam wj-oo luucw-luutwg hoqgv akwn jito, hvbmabde Pwnbog gab nulv jvqtwngam la abynam mam anam acam do. Soq tulu sam anam acam tamab nulv nyinyoq dvb nyiky dvn.

43“Hvkam bvxeq Parisi tulug hvdgab hentwr-kaasnamv doodwn nulv Sinagog namlo dootam mwlwngam alyanboam la kwm-kor mvk deela lo xumnam mam aby bodwn. 44Hvkam bvxeq nulug gab hentwr-kaasnamv doodwn! Nulv nyubu ung mutum maanam hvb nyidwn hoo nyi tulungv cengmab caataml hoqho wl yvdwn.” 45Pvvb tomswrbo akgon mwam birwqnum, “Tomswr bov, soq sam no beikam, no ngulamkam hvnyw bisu do!” 46Jisu birwqnum, “Hvkam bvxeq nulug pvvb tomswrbo tulu gab hentwr-kaasnamv doodwn! Nulv nyi tulungam baqla deemanam viyam tubaq jidwn hvbmabde bulam hoq nyi tulungam baqm dvb nulv atv lvqcw cirg nvkam ilwqlayil svka dvb mwwma dvn. 47Hvkam bvxeq nulgab hentwr-kaasnamv doodwn, nulug ab tulungv nyiqry benbo tulungam mengnum, hoqgv bulgab nulv anya alwb nyubu mviya jidwn. 48Soq so nulv hvvky swwdo, hoqgv nulug at ab tulug nyiam mengnam mam loomin gvdo hoqgab nyiqry kaanbo tulungam mengnum hoqgv nulv bulug nyubungam mviya jinum. 49Hoqgab, Pwnbog mwwlaq saqpaq ngvkam bedwn ngo nyiqry benbo tulu ngamla buu tulungam bulug pengko ho kanam tayin, bulug tuugin bulv meng tayin, hoo raql-puql mvtayin.’

50Gvda gvt sam pwda ywk hoqgv nyiqry benbo mwlwngam meng gam gab sija nyi tulu si hoqg laqm baqnam mam baqdwb nyitayin. 51Abelnvn mengnam hoqjaq hoqgv yugw gvla dvrwqbo cwrwg pengko ho mengnam Jakariyanvn mengnam gob sija nyi tulu si laqm baqdwb nyitayin. Vv, ngo nulam bedwn bul mwlw gab soolog swwca soq nyi tulungam kam laqm-baqm dvb nyitayin. 52Hvkam bvxeq Pvvb tomswrbo tulu gab hentwr-kaasnamv doodwn! Nulv mwwlaq saqpaq nanwg sabingam naareq pakun, nulv atv kam urab haama taikun, hoo nyi haata boam kam nulv haam mvma do.”

53Jisu hoqgv lengda yukam, Pvvb tomswrbo la Parisi tulungv mwam kacaq bviyaq dvb benyi-beyal biluqtvl hoo mwam naleqgo agam goom dvb mwwnum, 54hoqgab mwwg hog mwlwg benam mam betam tvnam gob sur runyia banv bexiaq mvtwl nootu tvnam gob mwwnum.

Currently Selected:

LUK 11: NISS

Highlight

Copy