LUK 10

Jisu Cam Kvnleq Vnyi go Kanamnum

1Soq kokw so At Sw cam kvnleq vnyi nyiam xuqnv mwwg wdyko nampam pvmci-pamt bvla gvda tvqxib mwwg otuqyab vnyi vnyi gogaqb kanam namcolwqnum. 2Mwv bulam benum, “Dvnna naasv naleqjaqb doodwn, hvbmabde dvnna naanbo nyi yaangv anyoko gocaq, hoqgab dvnna atam mwwg rongo ho dvnna naam dvb nyi loq vijaqg kanam mvdwb xumto. 3Nulug lamtab wn! Ngo nulam svca cvvtwg pengko lo sviyangam kanamnam hvbjaq kanam nvmlwq gviywn. 4Nulv twngk kuiyamkam ho cukam kam baqmab, luxuqngamkam baqmabv, hoqgv lamtaho hiyv nvkam xumrwq rwqdu maabv. 5Hiyvg nammwb nulv haajaqkam, otuqcob beto, soq nam si swrsomalol doonka. 6Swrsomalongam aby bonbo nyi ak hoqho doobaloqkam nulug swrsomalo xumnam mam mwwg aoho doom dvb jito hvbmab nyiloqkam nulv soq nulug xumnam sam nookur tuku. 7Bulv hognvkam jidwn, ham nulv dvg-twwg dvl hoq nam namkinho dooto. Hoqgab bon nyijbo akam mwwg nyijongam jidwb nyidwn. Namgwn hoqgv nam namsaqb wmabv. 8Nulv nampam golo haaikam nyiv nulam alwb haatwk hvl bebaloqkam dvnam gotwq bolo nulug agaho ap jinam tulungam dvto, 9ho nampamho nyoi tulungam mwp jilaka, hoo nyi tulungam beta, ‘Pwnbog lvpwngv nulug ogumb haapa ku.’ 10Hvbmabde nulv nampam golo haaikam nyiv nulam alwb haatwk hvl bema baloqkam nampam lamtab wgdvl soq sam beto. 11Ngulug lvpia so nulug bopamg diimwr kaqgabl doonbo hamkam nulug ceebiongv hvl kaacin dvb dudinl dupaqta. Hvbsujaqkam sam cengto, Pwnbog lvpwngv nulug ogumb haapa kun!’ 12Ngo nulam bekin dvn hoq koi alwb pw-hwwd aalam Pwnbov hoq nampam ham hilayab anya nyanam mam sodom mam kaakin tayin!

Mwwjw Maanbo Bopam Tulu

(Mt 11:20-24)

13Vnaq vnaq Corajin nulgab bos mwwpa jaqkv, vnaq vnaq Betsaida nulgab bos mwwpa jaqkv! Nulug agaho Atwg nyis tulungam Taiyar la Sidon ho nyinam gonyiloqkam hoqho doonbo nyi tulungv kol otuqyab kaacin panpv, hoo nyic-nyia nyinam gab tuila vjam kootwl mubam nelyaq tvl mwwkur kams paco! 14Hvbmabde Taiyar la Sidon bunyiv nulam hilayab Pwnbov pw-hwwd aalam anyangam kaakin tayin. 15Hoqgv Kaparnahum noqg at gabsula! No atam atv ao gvdab jooca sudub mwwsdvn yv? Namnvn sux-ywlw gvda bvslak hwrgeq lotayin.

16Mwv mwwg buu tulungam benum, “Hiyv nyiv nulam tadwn hv ngamkam tadwn, hiyv nyiv nulam haqxiadvn hv ngamkam haqxiadvn, hoqgv hiyv nyi ngam haqxia dvn hv ngam kanambo nyi akamkam haqxiadvn.”

Cam Kvnleq Nyi Vnyiv Hookur Kunam

17Kokw so hoq nyi cam kvnleq vnyiv hemp pol hookur kunum. Bulv benum, At Sw, Noqg eminb ngulv gaml jida kalam ui tulungv kam ngulug benam mam tvjwnum!” 18Jisu bulam benum, “Ao gvda tolo taiyam bioqnam hvbkalam ngo uiyam hol dvb kaanum. 19Kaato! Nulam tvbam la pooxu yvsiam caataml wmin mvdwb hoqgv nyemaq mwlw ator aoho ngo nulam ab bokum mam jigyin, hoqgv hog gokam hoggub nyilakam nulam muiyu nyoram. 20Hvbsujaqkam almab yal tulungam nulam tvjw ko-gab nulv akvkam hemp pomab hvbmabde ao gvda tolo nulug eminam xeqpwl apkunam gob nulv hemp poto.”

Jisug Hempnam

(Mt 11:25-27; 13:16-17)

21Hoq mood akinho Jisu dvrwqbo yal rooxo tvl hwnyir cojor jaqb benum, “Aba ao gvda gvla swcw nvg At Sw! No soq benam nyinam sam mwwlaqbo gvla hingkubo nyi tulug hoqgv mvvsil apbanv bulam ko anyo tulug aoho belinko gabnvl ngo nam paqdwn. Vv, Ab soq sam noqg hinglwqko bvla Xumkub nyigam gabnvl ngo nam paqdwn. 22Hog mwlwngam ngoqg Ab ngam jipa kun, Abam bepa maabjaq Ko Tuupam hiyvkam cengma dvn ho Ko Tuupam bepa maabjaq ho Ko Tuupv kaakinam nyi akwg aoho hiyvkam mwam cengma dvn.”

23Kokw so Jisu nywkur banv buu tulungam bisil benum, “Vnyiq hoqgv no hoggv kaapan hvvjaq moloq xinam jaqkv! 24Hoggab, ngo nulam bekin dvn, nulug kaapanam mam nyiqry benbo tulungv la lvpw at tulungv kaapa dvb mwws bakam kaapa nyomanum, hoqgv nulug tanam mam tapa dvb mwws bakam tapa nyomanum.”

Hang Biinbo Samariya Nyi Akam Doocnam

25Hoo kaato, pvvb tomswrbo nyi ak gorab dumnv Jisun vnyiq hang hengka dvb mwwnum. Mwv toxnum, “Tomswr bov, hogbvxeq nyilayil nwrba cwtam swwgam ngo kaapal swwtayin?” 26Jisu mwam birwqnum, “Dvrwqbo potalo hog hvla xeq xeqpnamv doodwn? Hog bvxeq hoqham pooril bekin dvn?” 27Nyi akv birwqnum, “Noqg hog mwlw hvvjw-hara lvgab hoo noqg hog mwlw yvj lvgab hoo noqg hog mwlw ator lvgab, hoo noqg mwwnam lvgab, hoo noqg door-doopwngam no atwg gv aiyaqkam abynam hvb noqg Pwnbo At Swnvn aby boto.” 28Hoo mwam benum, “No kvtaqjaqb birwqpa sam nyito, hoo swwtayin.”

29Hoq pvvb tomswrbo nyi akv atv atam lvdy keemalo mwwnv Jisun toxnum, “Hiyv yu ngoqg door-doopw nyiingv?” 30Jisu birwqnum, “Nyi ak Jerusalem toloqgv Jerikob idul doonum, hoq nyi akam dvco conbo nyi ata go lamtaho jwwgur mvnum. Bulv mwwg gv hoqg vj orioq mwlwngam twqxin-twqnin tvl mwam silo-tors dvb jwwpel wleqnum. 31Haqmapaq golo nyub ak hoq lamta baakinb idul doonum, mwv hoq nyi akam kaapa tvl lamta taqc gob wleqnum. 32Hoq hvbkalam Lebi nyi ak kalam hoq nyi akam kaapa tvl lamta bviywr gonwb wleqnum. 33Hvbmabde hoq lamta baakinb nyoyw wdul doonbo Samariya nyi akgon hoq nyi akam kaapa tvl anya mwwpanum. 34Mwv ogum wnwql kutiam la opo ngam tooiyo banv mwwg gv hoq unnam puujnum. Kokw so atwg svdam aoho joocal doom tvl nyiin nam golo baqlayil mwv mwam vc sonum. 35Aal loogwn so mwv rup twngk bvrnyigo naalin banv nyiin namho at akam jitwl benum, ‘Mwam hindy alwb kaayab, hoqgv soq aoso no hoobin kubnyiloqkam soq lamtab wkur yukam nam ngo hiqya kunpv.’” 36Hoo Jisu bitwr benya so benum, “Hiyv dvco conbo nyi tulug alaqho haan boam, nulug mwwnamv soq nyi oum pengko soqgv hogloq nyi ak hv hoqg door-doopw nyi gob nyinum?” 37Pvvb tomswrbo nyi akv birwqnum, “Hoq nyi akam anya mwwpal svka bo nyi ak hvvs lak.” Jisu mwam birwqnum, “Hoq nyiloqkam wgdvl mwwg nyinam hvbkalam nyita.”

Jisug Marta gvla Meerig Nammwb Haanum

38Jisu la mwwg buu tulungv lamta ho wdul dooiyam mwv nampam pamg golo haata yukam Marta ngvk hvl benam nyem ak mwam mwnwg nammwb alwb haatwk hvl bel boal haagnum. 39Mwnwg bwrm ak Meeri ngvk hvl doonum, mwn At Swg lvpia lwkw hv dootwl mwwg tomswrnam mam todul doonum. 40Hvbmabde Marta mwnwg vijaqg hoocum haapil bon nyidwb nyigam gab mwn mwwdwq saqk banv oluq luqnum, hoqgab mwn haabnv benum, “At Sw hoocum haapil bon nyimdvb ngoqg bwrm akv ngam vp-cwkwb apaqnam mam no cengma dvn i? Hoqgab haal ngam svka mvdwb mwnwn beto!” 41At Sw mwnwn birwqnum, “Marta no naleqgo pagoq goqxy aoho mwwdwq dwqdo hoo vs-axaq gob nyido, 42hvbmabde naadynamv akin gotwq. Hoggab Meerig naanam si hvvtw poot jaqkam xuql naapa, hoo soq sam mwnwg galoqkv naareq dvb nyiram.”

Currently Selected:

LUK 10: NISS

Highlight

Copy