LUK 12

Gwwlyw Lywnboam Hvvmin Tvk Hvnam

(Mt 10:26-27)

1Lwwyw lwwyw nyiv lvkin gob hwwt kvlwl doonum, bulv bulug pengko ho caajab-caiyab minsnyinum. Jisu otuqcob mwwg buu tulungam benum, “Parisi tulug opappam hvvminto, hvgdvn si kaak-takdvb gwwlywnam mam hvvmin tvk hvl benum. 2Hognvkam kulub ap pan ham kulub maabjaqb aptayin. Hoqgv luucw-luutam mvvsnam mam cengdwb mvtayin. 3Hoqgab nulv hognvkam xeq kan uralo benum ham huto lo tapa dvb nyitayin, hoqgv wrw uraho nulv hognvkam xeq nyi tulug nyuruho jebs-japeql benum hamnvn nam bootu baaglo sogoql bedwb nyitayin.

Hiyvn Bostayin

(Mt 10:28-31)

4“Ngoqg ajin tulu, ngo nulam bedwn gv apongam mengxo kokwngam hog gokam mvnyi deema bo nyi tulungam bos somabv. 5Hiyvn bos sodwb nyidwn ham ngo nulam bekin tayin: mengxo kokwngam sux-ywlw gvdab hurlwq dvb ator doogbo Pwnboam nulv bosto, ngo nulam bedwn mwam bosto! 6Pvta pwdw dorngam naiya tayin tvqnyi gob puqma dvn yv? Hvbsujaqkam bulug ak nvkam Pwnbov mwwpa maabjaq nyima dvn. 7Hvbmabde nulug dumpo dum sooxiam xipwl ap pakun. Hoqgab bos somabv. Nulv pvta pwdw tulungam hilayab xibinamv!

Kriston Bekinam la Haqpaqnam

(Mt 10:32-33; 12:32; 10:19-20)

8“Ngo nulam bedwn, hiyv lajaqkam nyi mwlw rolu agaho ngam bekin baloqkam Nyia Ko Tuupv kam mwwg gab Pwnbog ao gumtw tulug agaho bekin tayin. 9Hvbmabde nyi rolu lo ngam bekin maanboam Nyia Ko Tuupv kam mwam Pwnbog ao gumtw tulug agaho bekin kalam maab haqpaq tayin. 10Hiyv akgon Nyia Ko Tuupwg ceebiob bebaloqkam mwam kol xaqb axia jitayin, hvbmabde dvrwqbo yalam ceebiob benbo akam kol xaqb axia jidwb nyiram. 11Hwdlo bulv nulam Sinagog nam bvla laat saab tulug hoo ab bokum tulug dookub bool wg baloqkam hog bvxeq nulv atv atam ceetor tayin ho hoggv birwqtayin hoqgab nvl nulv mwwdwq maabv, 12Hoggab Dvrwqbo Yalv nulam hoq mood jaqkam tomswr tayin hoggv nul gootayin.”

Nyet Paca boam Doocnam

13Nyi acam hoqgv nyi ak mwam benum, “Tomswr bov, ngulam apaq jipe kul sileq kunum ngulug abwg gumnam ngoqg lvgab mvpin sudub no ngoqg vbwngam betbv.” 14Jisu mwam birwqnum; “Noqg nyi no, hiyv ngam nunyig lvpaho pw-hwwl gumnam mvpin mvra mvdwb mvnum?” 15Hoqgv mwv bul mwlwngam benum, “Hog mwlw rvvswnam hoqgv atam luucum gvdwl hvvmin minsto, hoggab mwv nyetwb nyisjaqkam naleq baleq gob doosjaqkam nyiig swwnamv mwwg gumnwb nyima dvn. 16Kokw so Jisu bulam soq doocnam sam benum, “Nyi nyetbo ak dvg alwb swwnbo kedam doognum. 17Mwv atv atam mwws banv benum, ‘ngoqg dvg mwlwngam ocumko noosu dooma, ngo hoggub mvtayin 18Mwv atam besnum, ngo soq sam ya nyitayin: ngo noosu tulu sam sapia gvdwl koi aldvb mvtayin hoqgv ngoqg dvg mwlwngam la dvrab pam ocum tayin. 19Hoo ngo atv ngoqg yvjam betayin, ngoqg yvj, naleqgo vnyw gab dvggam baqp pakun; hoqgab doominto, dvminto, twwminto, hoo jamp pominto! 20Hvbmabde Pwnbov mwam benum, ‘Paca no, soiyig ai jaqso no noqg swwgam apaqdvb nyitayin; hoqnyiloqkam noqg at gab pvvcumnam dvrab tulu si hiyv gab dootayin?’” 21Hoo Jisu bitup kunum, “Hiyv Pwnbog gab nyet tvma jaqb hvbmabde at gab ya nyet tvnbo nyi akv soq sib nyidwn.”

Pwnboam Mwwjwto

(Mt 6:25-34)

22Kokw so Jisu buu tulungam benum. “Hoqgab ngo nulam betam dvn, turl doodwb hognvkam dvl swwtayin, ho gv gab hognvkam kootayin ham mwwdwq dwqmabv. 23Hoggab dvnam mam, la vj koonam mam hilayab swwgv alyadwn. 24Poaq tulungam kaaka to, bulv vly liima ho vly naama, bulv noosu gokam dooma ho noosu bvkam bvqlwq maadwn. Hvbsujaqkam Pwnbov bulam dvdwb jidwn. Nulv hog hwdgo pvta tulungam hilayab xinamv! 25Nulug pengko ho hiyv vpjaqkv mwwdwq dwql atwg swwgam wm swlw duur jaqkam mwwg swwgam vbw nyotayin? 26Hoqgab mwlwngam anyo yaabam nulv nyinyi maapel hog buiyu asaq bvrwqgab mwwdwq dwqnyi tayin? 27Mwwka to hog bvxeq nyoro lo opu tulungv swwdwn! Ho at gab vj cuma dvn. Hvbmabde ngo nulam bedwn, lvpw at Solomon kam mwv hwdgo nyet subakam soq opu tulug akgon anyanam hvbkalam hog doog maanum. 28Aaram wm mvramlo hurlwql guxia mvta tanam mam soq sib Pwnbov soolog nyoro wwngam vj koom dvnyiloqkam, hoo mwv nulam vi jaqg vj koomram yv? Nulug mwwjwngv hvkam bvxeq mvneq kocaq dvn!

29“Hoqgab hognvkam dvtayin, hognvkam twwtayin, soq svkam nulv mwwdwq dwqmabv. 30(Hoggab gvda gvt soqg nyob luusaqkv looxiam soq mwlw sam meedwn) Hvbmabde nulug Abv nulam hognvkv xeq nulv nvvnw dvn ham cengdwn. 31Hvbmabde otuqcob mwwg lvpwngam nulug swwca lo meeto, hoo hog mwlw ham nulam vbw jitayin.

Ao Gvda lo Nyet Tvnam

(Mt 6:19-21)

32“Nyob luunyo ko nul, bos somabv! Hoggab nulug Abv nulam lvpwngam jidwb pwbwq jaqdo. 33Nulug hog mwlwngam twngkwb puqgdvl jwwgw tulungam jito. Hogloq nyook ho dvco conbov ogum wnwq nyoma dvn hoqgv topum mvkam dvnyi maadwn hoqhvk ao gvda tolo at gab nywywngam nyimabo nyetam tvl swwto. 34Hoggab hogloq ho nulug twngk noosungv doodwn nulug hangv kam hoqho dootayin.

Hvvminl Doonbo Nyera

35“Mwx-mvaqto hog mwlwngv haas jaqkam, bon nyidwb vj koox-koaqto hoo nulug lemp tulungam gudul doomto, 36nyem naal hwrl gol ducum twcumko hoqgv bulug atwg haanam mam kaaya yoodul doonbo nyera hvbjaq nyito. Mwv haal viyap pam cedinl mviyam bulv viyap pam vnwqb kuqko jitayin. 37Bir atv haatayi hvl hvvmin mingl doodwb kaapanam nyera tulungv hemp ponam jaqkv! Ngo nulam jvqtw jaqb bedwn. Mwv bon nyidwb mwwg atwg vjam koox-koaq tayin hoo tebolho bulam doom tvl, mwv haal bulam bon nyijtayin. 38Mwv ai nywywrangam maabnyiloqkam ar komcam haabnv bulam hoq hvbkvda hingkub doodwb kaapa bvnyiloqkam hoq nyi tulungv hvkam bvxeq hemp podwb nyidwn. 39Hoqgv sam mwwgabto! Hwdlo moodam dvco conbov haatayin ham nam at akv ceng nyiloqkam hvvmin mingl mwv dvco conboam mwwg nammam mvkol haam dvb jimab nyikam subaco. 40Hoqgv nulvkam hvvmin mingl dooto, hoqgab hogloq moodam nulv mwwpa maab dootayin hoq ditaqngam Nyia Ko Tuupv haatayin.”

Mwwjwbo la Mwwjw Maanbo Nyera

(Mt 24:45-51)

41Pitor benum, “At Sw soq doocnam sam no ngulam yv begdvn ho maalo nyi mwlwngam yv begdvn?” 42At Sw birwqnam, “Ho hiyv yu mwwjw jwwxam bvla mwwlaq saqpaqbo nyerangv? Mood jaqkam atv mwwg nyera tulungam bulug dvnam mam jitak hvl bel apnam ak hv sulak. 43Bir atv nammwb hookur yukam mwwg bonam nyidul doodwb kaapanam nyera ak ham hog hwdgo hemp podwb nyidwn. 44Ngo nulam jvqtw jaqb bedwn, atv hoq nyera ak ham mwwg gumn mwlwngam bvvm tayin. 45Hvbmabde hoq nyera akv atv atam beswl, ‘Ngoqg bir atwg hvvd moodv hvraqb vijaqg dooxiqdo hoqgv nyera asaqkam nyem ge nyega ge jwwnv dvt-twwtwl twwxum twwiyaql nyirab sunum. 46Kokw so aal loog golo hoq nyera akv mwam haai kunup hvl hog mwwpa maab doodu dvk aalam mwwg cengma lvpab dood mood jaqkam mwwg at akv hookur kunv mwam tunyi gob potu to hoo mwwjw maanbo tulug lvgab mwam aptayin.

47Mwwg bir atwg mwwnam mam cengdum sutwl kvtaq rvpaqb mwwg mwwkwb nyimab doomin bo nyera akam aoho cwqla maadwb xipwql mvmdvb nyitayin. 48Hvbmabde mwwg bir atwg mwwnam mam cengma tvl anyo go hog ak nyibnyiloqkam hoq nyera akam vi yooma go xipwql mvmdvb nyitayin. Hiyvn vigo jinum, mwwg galo vigo naadwb nyitayin, hiyvn lvvt yaag jinum, mwwg galo lvvt yab kodwb nyitayin.

Jisu Luupwb Nyig bov

(Mt 10:34-36)

49“Ngo swcw sam wm rwlwq taab haanum, hoo hoqham mwx-mvaql pargab kunyiloqkam alyindo! 50Ngo baptijum lvgab baptijum ak naadwb doodwn, hoo sam nyima deedib ngo hog hwdgo vs-axaqb nyil mvl dootayin! 51Ngo swcw sam swrsomalongam jitab haaikun hvl nulv mwwd yv? Ngo nulam bedwn, swrsomalongam maslak hvbmabde mvpin mvra taab. 52Hoqgab sija galoqkv nam gonwg nyi ang-ngwg imiqkv, oum gonv vnyi gonwg ceebiob hoo vnyi gonv oum gonwg ceebiob nyimin sutayin. 53Ko tuupwg ceebiob abv, abwg ceebiob ko tuupv, ko nyem ceebiob annv, annwg ceebiob ko nyemv, aiyv nyeexwngv ceebiob, hoo nyeexwngv aiywg ceebiob nyitayin.”

Moodam Cengmanam

(Mt 16:2-3)

54Hoqgv Jisu nyi tulungam benum, “Doonyi haaga daiyab doomwq ata go hwrca dvb kaapa twqda kalam nulv bedwn, nyodongv hota do hoo kokwngam hoq hvbkalam soq si nyidwn. 55Hoqgv svko daiyab dooiyv nvn yidwb henglaq yukam nulv bedwn, ‘ogtayin hvl’ kokwngam hvbkalam nyidwn. 56Kaak-takdvb nyinbo tulu, nulv swcw nyodog la doonyi poolwg nyuqtuq-mooram bekin dvb cenglaqtvl hoggub nyitwl nulv soq apog mood sam bekin dvb cengnyi maadwn?

Noqg Ceebio Nyi lvgab Pvvb Pato

(Mt 5:25-26)

57“Hoo hoggab yu nulv atv at gab albo bonam nyidwb mwwma dvn? 58Hiyv nyi akgon nam yolu bvrwq bel saab dookub sortab bool wg baloqkam mwwg lvgab lamta ho wjo ywwtwl mwv nam saab agaho sipai alaqb gvqlwqtvl nam pvtwq lwqma daab nam sornbo lvgab twiyw pvvbam padwb hindib nyika to. 59Ngo nulam bedwn nulam paqgabl naiya taiyin tvqcw gonkam nulv jima deedib hoggub nyilakam hoq hoqgv nulv lengkram.”

Currently Selected:

LUK 12: NISS

Highlight

Copy