BEGGAR 32
32
Jakub Esunvn Bosnam
1Jakub mwwg lamtab wknum, hoo Pwnbog gumtw tulungv mwam wrwqnum. 2Hoo hwdlo Jakub bulam kaapa yin mwv benum, “Soq si Pwnbog svmcw go.” Ho mwv nyook hoq eminam Mahanaim hvl goqnum.
3Hoo Idom gvdag, Seir nyookho doonbo mwwg vbw Esu dookub Jakub mwwg otuqb hvvky tulungam kanam coonum, 4bulam hingky jaqb tomswrl bilwqnum, “Soq sib ngoqg at Esunvn nulv betayin: Soq sib noqg nyera Jakub beden, ‘Ngo Laban lvgab nyoodo nyiib nyinv sija godab doomin gvdwn. 5Ngo svv hvvbv, svdam tulungv, sviya-sibinv, nyerangv, hoo paqnv doog dukun. Ho ngo noqg kaagaho mwwsw dvb kaapa kudwb, ngoqg atam ngo agam bilwq gviyin hvl beta.
6Hoo pui baqnbo hvvky tulungv Jakub dookub hookur kunv begamv, “Ngulv noqg vbw Esu dookho haanum, hoo mwv nam kvvrwqtab hoodu de, hoo nyiingv lwwpy gob mwwg lvgab yvba deen.” 7Ho Jakub vcjaqb bosnum hoo mwwdwqnum. Mwwg lvgab doonbo nyiilungam, hoo sviya-sibin tulungam hoo svv tulungam hoo svjin tulungam svmcw vnyi gob mwv mvpinum, 8mwwgamv, “Esu svmcw akwn ham nyob paiyaq baloqkam, ho akwn hv keleqdvb nyila tayin.”
9Hoo Jakub benum, “Ngoqg ab Abraham gv Pwnboa hoo ngoqg ab Aisakwg Pwnboa, ho ngam hvl benbo At Swa, ‘Noqg atwg gvda bvla noqg imiq nyi tulug dookub wkur tuku, ho ngo nam alboam nyij tan,’ 10Ngo nyiloqkam noqg tumab aby dvb hog mwlw bon nyijnum taqp maasu hoo noqg nyerangam noqg dengkynam mam kaakin dvb singp maasu, hoggab ngo soq Jordon sam ngoqg beqnyia aro lvgab rabnum, hvbmabde sija ngo svmcw vnyi go doog dukun. 11Anya mwwpa gvdwl ngam ngoqg vbw Esug alaq hoqgv naalin tvb, hoggab mwam ngo bosdo, mwv ngam la ann tulungam la ko hury tulungam haal mvkam nvvs yv. 12Hvbmabde no benum, ‘Ngo jvqtw jaqb nam alboam nyitayin hvnum, hoo noqg hosiqkam sa-svlog xuqx hvb mvtayin, hiyvkam ham xila maadwn.’”
13Ho mwv hoq aiho ho doonum, hoo hoggv mwwg lvgab doonum ham naalayil mwwg vbw Esunvn aky jinum, 14sibin bin lwwnyi go hoo bimpv camnyi go, sviya nyemv lwwnyi go hoo yaap tvmwrv camnyi go, 15gwwi twwdu bo svjin joobaq cammum go, hvvn campy go hoo hvvb doryw go, svdam damn camnyi go hoo svdam damp doryw go jinum. 16Soq tulu sam mwwg nyera tulug alaqho gvqlwqnum, vx-cwram nyera ak-kwb rool wg mvnum, hoo mwwg nyerangam mwv benum, “Ngoqg otuq soq tulu sam rool wgto hoo aado-aado dvb tom-tomwb rool wgto.” 17Mwv otuq ak ham tomswrl bilwqnum, “Hwdlo ngoqg vbw Esu nam kaapal hoo nam soq sib tox yinyi loqkam, ‘No hiyvg nyiingv? No hogloqb wdeen? Hoo noqg soq bool wgnam tulu si hiyv gv?’ 18ho no hvl betayin, ‘Soq tulu si noqg nyera Jakub gv. Soq tulu sam ngoqg at Esunvn akib jilwqnamv. Hoo mwv ngulug kokw vv hoodu dvn.’” 19Hoqhvb kalam mwv tomnyi deen ham la tommum deen ham hoo dvpar-dvparam rool wgbo mwlwngam aiyin lvkin dvb tomswrl bilwqnum, “Hwdlo nulv Esunvn kaapa yin benam akin ham betayin, 20hoo nulv betayin, ‘Noqg nyera Jakub, ngulug kokw vv hoodu dvn.’” Hoggab mwv mwwnum, “Ngoqg otuqb tuun-mee wmnam tuluhv ngo mwam jinyioq tayin, hoo kokwngam ngo mwwg nyuqm mam kaapa tayin. Ho mwv ngam loorwq kamyi nvpv.” 21Ho mwwg otuqb aky jidynam tulungam wwm coonum, hoo mwv atv ai yubg svmcw ho doonyunum.
Jakub Pwnbo lvgab Gwbw Tubnum
22Hoq ai yubkin ho mwv gorab layil hoo mwwg nywxw vnyiam, paqn nyi vnyiam hoo mwwg camleq akin ko tulungam boolayil, hoo Jabbok pobug iss bocar koob rabknum. 23Mwv bulam boolayil hoo mwwg doognam hog mwlwngam bulam pobungam rapeq mvdkub kanam kunum. 24Hoo Jakub vp-cwkwb dookurl doonyunum. Hoo nyi ak mwam ar huto maady deedib gwbw tubnum. 25Hwdlo nyi akv Jakubnvn gwbw tubya nyoma yin mwv Jakubg xvrnyiq pwpam tubdaqnum, hoo mwv mwam gwbw tumin sui yikho Jakubg xvrnyiq pwpam tubtwrnum. 26Ho mwv benum, “Ngam wwm tukub, hoggab huto yuku.” Hvbmabde Jakub benum, “No ngam lvqc cima deedib nam ngo wram.” 27Hoo mwv mwam benum, “Noqg eminv hoggv?” Hoo mwv benum, “Jakub.” 28Ho mwv benum, “Noqg eminam Jakub hvl goqk ram, hvbmabde Israel, hoggab no Pwnbog lvg bvla nyi tulug lvgab gwbw tubl hoo tubya paku.” 29Ho Jakub mwam toxnum, “Anya mwwpa gvdwl noqg eminam ngam betam tvb.” Hvbmabde mwv benum, “Hoggub no ngoqg eminam tox dvn?” Hoo mwam mwv lvqc ciknum. 30Ho Jakub hoq nyookwg eminam Peniel hvl beknv, begamv, “Ngo Pwnbo nyuqm mam kaatv tukun, hvbsujaqkam ngam sig hoqgv ywwlin pakun.” 31Mwwg xvrnyiq pwpam tubtwr ko-gab mwv lvja jaal Penuel hoqgv, lingdu yukho doonyiv caada lwlw kunum. 32Hoqgab soolo namgub Israel nyiilungv axar xarpog xvrnyiq pwpam dvma dvn, hoggab mwv Jakubg axar xarpog xvrnyiq pwpam tubdaql tubtwrnum.
Currently Selected:
BEGGAR 32: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
