BEGGAR 33

Jakub Esunvn Kvvrwqnam

1Hoo Jakub mwwg vnyiqkam piorabl hoo kaanum, hoo kaato, Esu la mwwg nyi lwwpiv hoodul doonum. Ho mwv Liya gvla Rakel hoo paqn vnyig ko tulungam dvpar-dvpar gob mvnum. 2‍Hoo mwv paqn tulungam la bulug ko tulungam otuqb pvvnum, ho Liyanvn mwnwg ko lvgab, Rakel la Josapnvn mwlwg vtwr-anya ho pvvnum. 3‍Mwv atv bulug otuqb wnum, mwwg vbw ogumho mwv hvvc maatab, kedho kvn go pvxwl xumnum.

4‍Hvbmabde Esu xarnv mwam kvvrwql hoo mwam cegab tvl mwwg lwwpo ho nywdaq tvl hoo mwam moopupnum, hoo bulv xabnum. 5‍Hoo hwdlo Esu mwwg vnyiqkv nywrabl kaanum hoo nyem mam la ko tulungam kaapanum, mwv benum, “Noq lvgab haanbo soq nyi tulu si hiyv?” Jakub benum, “Noqg nyerangam Pwnbog anya mwwpal jinam ko tulungv.” 6‍Ho paqn tulungv la hoo bulug ko tulungv haanum hoo dumpo pvxwl xumnum. 7‍Liya la mwnwg ko tulungv ogumb hvvnwqnum hoo dumpo pvxwl xumnum. Hoo vtwr-anya ho Josap la Rakel ogumb hvvnwqnum, hoo bulv dumpo pvxwl xumnum. 8‍Esu benum, “Otuq alo ngam wrwqbo dvpar tulu vv hoggab no kanamnum?” Jakub birwqnum, “Ngoqg atwg kaagaho ngam mwwswl kaapa kudwb roolwqnum.” 9‍Hvbmabde Esu benum, “Ngoqg bor, ngo naleqgo doodwn; no hoggv doogdvn ham noq atgab pvvto.” 10‍Jakub benum, “Ma, hvb bemab, noqg kaagaho ngo mwwswl kvvlwq dvb nyip nyiloqkam ngoqg alaq soqg aky jinam sam loorwqto. Hoggab noqg nyuqm mam kaanam si hvbnyiloqkam ngo Pwnbo nyuqm mam kaapkun hvb nyidwn, hoo no ngam loorwq paku. 11‍Anya mwwpa gvdwl noqgab baqa jinam aky sam loorwqto, hoggab Pwnbov ngam anya jaqb svka paku, hoo ngo naleqgo doodo.” Hoqgab mwv mwam xaateqnum, hoo mwv ham naanum.

12‍Ho Esu benum, “Ngulv atwg lamtab nyiody sam boon kuj, hoo ngo noqg otuqb wco deen.” 13‍Hvbmabde Jakub mwam benum, “Ngoqg atv no cengs do ko tulungv wnyi kuma, hoo gwwi twwdu bo tuun-mee tulu ham ngo hengabl hoocuml wg yindo. Bulam aal lookin ho ruqtaq kvlaql wg baloqkam tuun-mee mwlwngv sitayi. 14‍Ngoqg at noqg nyera otuqb no wco yaato, hoo ngo nyinyiaqb wgtayin, ngoqg atwg dook Seirho hvvc maady deedib, ngoqg otuqb wnbo tuun-mee ngvla ko tulungv hog hwdgo nyebiab wtayin hwdgo ngo nyebiab bulam bool wgtayin.”

15‍Ho Esu benum, “Ngoqg lvgab wnbo nyiilu tuugin nam apaq jipe nvp.” Hvbmabde mwv benum, “Bulam apaq maajaqkam alv? Ngoqg at ngam mwwswl kvvlwq twqbo lo hv alv.” 16‍Ho Esu hoq aalho mwwg lamtab Seirwb wkur kunum. 17‍Hvbmabde Jakub Sukkot nyookub nyiody wnum, hoo mwwg atgab mwv nam mvknum hoo tuun-mee tulu gab taabo pojnum. Hoqgab nyook hoqg eminam Sukkot hvl goqnum.

18‍Hoo Jakub anya jaqb Sekem bopamho hvvc kunum, mwwg Paddan-aram lamta hoqgv hooduko ho, Kanaan gvdaho doonum, hoo mwv bopam agaho svmcw mvl doonum. 19‍Hoo Sekem abwg, Hamorg ko tuup tulu hoqgv mwv twngk lwwgwb rvnam gvdaho mwwg tombungam mwv rwwp kunum. 20‍Hoqho mwv yugw ak diirab banv mvtwl hoo ham EL-Elohe-Israel hvl goqnum.

Currently Selected:

BEGGAR 33: NISS

Highlight

Copy