BEGGAR 31
31
Jakub Laban hoqgv Kelinam
1Sija Jakub Labanwg ko tuup tulug benam mam tapanum, begamv, “Jakub ngulug abwg hog mwlwngam naapa ku, hoo ngulug abwg hoqgv mwv soq hog mwlwngam naalayil nyet swwpa ku.” 2Hoo Laban mwam otuqg mwwswnam hvb xik-paqk maanum, Jakub kaapa kunum. 3Ho At Sw Jakubnvn benum, “Noqg ab gvla noqg imiq nyi tulug dookub wkur tuku, hoo ngo nam dooba tayin.”
4Ho Jakub nyi kanam tvl Rakel nvla Liyanvn mwwg sviya kaal yvk nyoro ho goqa mvnum 5hoo bulam benum, “Ngo kaapa do nulug ab ngam otuqho hoggub mwwswnum hvb sija xik-paqk ma. Hvbmabde ngoqg abwg Pwnbov ngam doobanum. 6Nulug abam ngoqg ator torl bon nyijkunam mam nulv cengdo, 7hvbsujaqkam nulug abv ngam vm mvvpa ku hoo lwwyw go ngoqg nyijongam kwly likub-lexeqnum. Hvbmabde Pwnbov ngam un-tar mvg mvdwb mwam ator jima. 8Mwv hvl benum, ‘Potaq-pomaq bov noqg nyijob nyitayin,’ ho sviya pvtw mwlwngv potaq-pomaqbo ko bwwnum; hoo mwv hvl benum, ‘Yaboq-yasoq bov noqg nyijob nyitayin,’ ho sviya pvtw mwlwngv yaboq-yasoqbo ko bwwnum. 9Hoqgab Pwnbov noqg abwg sviya pvtwngam naapaq paku hoo bulam ngam jipa ku. 10Sviya-sibin tulungv meemin suiyik moodho ngoqg vnyiqkam ngo piorabnum hoo yuma ak maal kaanum sibin meemin sunbo tuluhv yaboq-yasoq, potaq-pomaql hoo poory-pooganum. 11Ho Pwnbog gumtwngv ngam yuma ho benum, ‘Jakub hvl goqnum,’ hoo ngo benum, ‘Ngo si doodwn!’ 12Hoo mwv benum, “Noqg vnyiqkv piorab gvdwl hoo kaato, sviya pvtwngam meenbo sibin mwlwhv yaboq-yasoq dvn, potaq-pomaq dvn hoo poory-pooga dvn, hoggab nam Labanwg hog mwlw nyidunam mam ngo kaapa paku. 13Ngo Betelwg Pwnbov, hogloq ho no wlw swwrw ak diil pwr jil hoo ngam dingrnum. Sija gorabto, soq gvda soqgv leng dukul hoo noqg imiq nyi tulug dook gvdab wkur tuku.’” 14Ho Rakel la Liya bunyiv birwql hoo mwam benum, “Ngulug abwg nam alo ngulv hog otu maalo gumn naas go doon nvi yv? 15Mwv ngulam nyoodo nyi gob bek-nyik maan mvi yv? Hoggab mwv ngulam puqpaq paku, hoo mwv jvqtw jaqb ngulug twngkam dvxin paku. 16Pwnbov ngulug ab hoqgv hog mwlw gumn naapaq kunamhv ngul gvku hoo ngulug ko tulungv. Ho sija, Pwnbov hoggv xeq nam bepa kun, ham nyito.”
17Ho Jakub gorab kunv mwwg ko tuup tulungam hoo mwwg nywxw tulungam svjin tulug aoho doom kunum. 18Mwv mwwg tuun-mee mwlwngam rool wgnum, ho mwv hoq nyookho door-wj naaknam mam hoo mwwg gumn-ranam, ho Paddan-aramho mwwg tuun-meengam gumn soknam mwlwngam baqla yukul mwwg ab Aisak dook Kanaan gvdab wdwb nyiknum. 19Laban mwwg sviya vm reqtab wro yukho, hoo Rakel mwnwg abwg nam hoqg xumnam murty tulungam dvconum. 20Hoo Jakub Aramean Labannvn mwwg keleq tanam mam betam maab mwv vm mvvpaqnum. 21Mwwg hog mwlw doog kunam mam mwv baqla yukul wknv Iupratas pobungam rabknum, hoo mwv Gilead diisw nyook daiyab wdul dooknum.
22Hwdlo aal loum yikho Labannvn Jakub kenkubak hvl betamnum, 23mwwg nyi tulungam mwwg lvgab naalayil hoo aal kvn gob mwam mwv ruqmin gvnum hoo mwam Gilead diisw gvdaho ruqtin taknum. 24Hvbmabde Pwnbov Aramean Labannvn ai yumaho mwam benum, “Mwwgabto Jakubnvn al ge ho kor ge hog akkam agam goomabv.”
25Hoo Laban Jakubnvn ruqtin kunum. Jakub diisw gvdaho mwwg tombungam rwwtwl doonum, hoo Laban la mwwg nyi tulungv Gilead diisw gvdaho bulv kam bulug tombungam rwwtwl doonum. 26Hoo Laban Jakubnvn benum, “Hoggv no ngam nyipa kun, no ngam vm mvvpaq peel hoo ngoqg nyem ko tulungam nyob palayil nyumwb boonam hvb bool wg pakun? 27Hoggub no kvsil ngam vm mvvpaq peel, ngam betam maab keleqnam, no ngam betam nyiloqkam ngo nam dumdum-taal hoo rwwxw-gungga mvl bemin lvgab kanaml wm banpv 28Hoo hoggub no ngam ngoqg ko tuup tulungam moopupl hoo ngoqg nyem ko tulungam alwb wnku hvl bilwq mvmanum? No paca loodab nyipa ku. 29Nam ngo hog bvkam mvla dvb atorv doodwn. Hvbmabde noqg abwg Pwnbov ngam soi yumaho begamv, ‘Mwwgabto Jakubnvn al ge ho kor ge hog akkam agam goomabv hvnum.’ 30Hoo noqg abwg nammam vigo mwung ko-gab no wpa ku-wpa ku, hvbmabde no hog nyitwl ngoqg nammwg xumnam murty tulungam dvconum?” 31Jakub Labannvn birwqnum, “Ho ngo mwwgamv no noqg nyem ko tulungam ngoqg hoqgv xutinl naareq tai mwwnum, hoggab ngo bosnum. 32Noqg xumnam murtiv hiyv lvgab dootayin hv swwl dooram. Noqg nyi tulug kaagaho ngoqg doognam soqgv, noqgv dood nyiloqkam ham naalin to.” Rakel hoq pwnbo tulu ham dvcol wgnam mam Jakub cengmanum.
33Ho Laban Jakubg tombu urab haanum hoo Liyag tombu urab haanum hoo paqn vnyig tombu urab haanum, hvbmabde mwv bulam kaapa maanum. Hoo mwv Liyag tombu hoqgv lenglayil hoo Rakelg tombu urab haanum. 34Rakel nammwg xumnam murty tulungam naanum hoo hoq tulu ham svjinwg dootamnan uraho aptvl dootamnum. Laban tombungam miiyiq-meexeqnum, hvbmabde bulam meepa maanum. 35Hoo mwn mwnwg abam benum, “Ngoqg ata no haaxaq maabv ngo noqg agaho daqrab nyoma, ngo namc doodu dvn.” Ho mwv meegaqnum hvbmabde nam xumnam murty tulungam meepa maanum.
36Ho Jakub Labannvn hang lengnum. Jakub Labannvn benum, “Hoggv ngo nyixiaq pa? Hoggv ngo nyic nyitwl, no ngam dwq-dwq jaqb ruqmin gvnum? 37No ngoqg hog mwlw doognam mam meeg nukba; hoggv noqg nam hog dupum-dvrab go no kaapa pa? Hoq tulu ham noqg nyi tulu gvla ngoqg nyi tulug aga so naalinto, ho bulv ngunyig pengko so pvvb mwbwq tayin. 38Vnyw camnyi go ngo noqg lvgab doonum. Noqg sviyangam la noqg sibin bin tulungv dorkin gokam jaqpaq maanum, hoo noqg yaap tvmwr tulungam ngo dorg kam dvka maanum. 39Hoggv dwr-peengv dvnum ham ngo noqg dookub baqa maanum. Hoq tulu kwlib ngo nam jinum. Hoggab ngoqg alaq so doon boam, aalam jaqkam ho aiyam jaqkam dvco kunam mam no pw-hwwl kwly naanum. 40Aalam oggv xaanyiaq dvb hoo aiyam swkwrv cwwnyiaq dvb, hoo ngoqg yuma karmab doonum. 41Ho vnyw camnyi gob ngo noqg namho doonum. Noqg nyem ko vnyi gab ngo vnyw camleq nywpy gob nam bon nyijnum, hoo vnyw nywx go noqg tuun-meengam kaanum, hoo no ngoqg nyijongam lwwyw go kwly likub-lexeqnum. 42Ngoqg abwg Pwnbov, Abraham gv Pwnbov hoo Aisaknvn bosnam ngoqg lvgab dooma nyiloqkam jvqtw jaqb soq mood so no ngam alaq asarb kanaml wpaq mvpkun pv. Pwnbov ngoqg hentwr henam mam hoo ngoqg alaqg bon nyinam mam kaapanum hoo soi nam yolu ruqnum.”
43Ho Laban Jakubnvn birwqnum, “Nyem ko tulu si ngoqg nyem kov su, ko hury tulu si ngoqg ko huriv su, tuun-mee tulu si ngoqg gv su, hoo noqg kaanam hog mwlw si ngoqg gv su. Hvbmabde soolo ngoqg nyem ko tulu sam ho bulug ko bwwnam ko huriam ngo hoggv mvtayin? 44Kujo sija haato, ngulv pvvb birnam ak no la ngo mvbam tuj. Hoqham noqg la ngoqg pengko so hvvky akwb doomto.” 45Ho Jakub wlw pwg naalayil hoo ham swwrw akwb diidaqnum. 46Hoo Jakub mwwg imiq nyi tulungam benum, “Wlw loq nookum to.” Hoo bulv nookumnv ham lwwpum pumcal apnum, hoo bulv lwwpum ho dvs-twws dvknum. 47Laban ham Jegar-sahaduta hvl goqnum, hvbmabde Jakub ham Galeed hvl goqnum. 48Laban benum, “Soolo galoqkv so lwwpum si noqg la ngoqg pengko so hvvky akwb dootayin.” Hoqgab mwv ham Galeed hvl eminum, 49hoo Mijpa gab mwv benum, “Hwdlo ngulv akwn-akwn kaapa mins kuma yin, At Sw noqg la ngoqg pengko lo rvkil doogdvn. 50No ngoqg ko nyem mam mvnyi-mviya baloqkam, ho ngoqg nyem koam nywxw naaxin baloqkam, ngulug lvgab hiyv kam dook maajaqkam, kaato, Pwnbov noqg la ngoqg pengko lo hvvkib kaatayin.”
51Ho Laban Jakubnvn benum, “Kaato, soq wlw swwrw lwwpum sam ngo noqgab la ngoqgab diip pakun. 52Soq lwwpum si hvvky akwb dootayin hoo wlw swwrw si hvvky akwb nyitayin, ho soq lwwpum soqgv ngo noqg dookub wbo kuram, hoo soq wlw swwrw la lwwpum soqgv no kam ngam mengta-puqtab wbo nyoram. 53Abraham gv Pwnbov, hoo Nahorg Pwnbov, bulug abwg Pwnbov ngunyig pengko so hvvky doomto.” Ho Jakub mwwg ab Aisaknvn bos banv dingr kunum, 54hoo Jakub diisw gvdaho pwr jil aky keenum hoo mwwg nyi tulungam wtw dvtwk hvl goqnum. Bulv wtwngam dvkul hoq aiho diisw gvdaho doonum.
55Ar komc Laban gorab kunv mwwg ko hosiq ko hury tulungam la mwwg nyem ko tulungam moopupnum hoo bulam lvqc cinum. Ho Laban hoqgv mwwg nammwb wkurl wknum.
Currently Selected:
BEGGAR 31: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
