ADUNHEL 16

Timothi po, Pol po Aro Silas po Pen Kidun

1Lapara ke Pol po Darbe pen Lestra yok hlengo; aro lalong langot, kikrol ihut Jihudi arloso pe asopo, anangpa ke Grik arleng kido, ladi Timothi amen ihut adun kido. 2Anang Lestra pen Aikoniyam rongpe kortehel asitem amen-anang kachitha-ang kido. 3Pol po Timothi po yok ki-en pon anangsi, labang ahol kido Jihudi aphan anangyok sunnot otelo; piyok pu tene anang apo poke Grik pusi ahuwit Jihudi chithan-un detsi kido. 4La-aphel anali rongpe hel along artingsi, Jerusalem long kido adun hel aro akisarhel kachipachip alamthe kithan hel kamainot yok analiyok thano. 5La-amun kachikruk hel kikrol chipangtang si, arni ten alekha ongsi damo.

Troyas Arong Long Pol po Kachimangka

6La-aphel anali Phergiya aro Galatiya ahol agak kidam; la amunsi Asia alongri long lamthe kapaharpo Jiuli-Kangthir para padam hlonghle yongot apot, 7anali Musiya alongri adung hlengsi, Bithiniya alongriyok kidam ka-ole; manta Jisu Ajiuli ke analiyok padam hlonghle yongot. 8La-amun anali Musiya tikangsi, Troyas rongpe yok damo. Lalong Pol po isi apharlo hlongo; 9ihut Mesidoniya arleng arjap dingsi anangyok chingduksi pulo, “Mesidoniya alongri yok wang arpatsi, haliyok wang rapmot!” 10Anang labang apharlo hlongsi, Arnam labang alongri arleng hel angot kime-alamthe kapaharyok haliyok taram do, labadi hali khanang abhu hlongo, aro lajongsi Mesidoniya long kidam ayok awak chilango. 11La-aphel Troyas para langpe long jahaj pen damsi Samotras yok, aro la-aphel arni Haneyapolis rongpe yok damo. 12Lalong para hali Philipi rongpe yok damo; labang Philipi rongpe ke ango Mesidoniya alongri kaphochak cheng angbong rongpe kido, aro Roman hel kangning pam kido; labang rongpe long hali bekso arniyok dolo. 13Kisang-arni rongpe owapo para damsi, langjon akung Jihudi hel pingkit athem domene pusi chironsi, lalong damsi, iningsi, lalong kachingrum arloso hel angot lamthe paharo. 14Lalong Thoyatira rongpe long hapek arohon kachibhak ape kijor Lidiya amen Arnam yok kimeng ihut arlosope lamthe onesi kido; Pol po kapahar alamthe kamainotyok Hemphu anang neng ingpulo. 15La parake anang aro hem ahuwit arleng baptist chiplangsi, haliyok chingduksi pulo, “Nali kachiron ateng ne Hemphu yok krol hlongdo, pu tene nali nehemyok wangne donot; ladisi anang hem ayok padam elo.

Pol po Pen Silas poyok Philipilong Akrol Kithal

16La-aphel labang pingkit athem hali kidamjong amunsi, bhiliki alam thansi kapado ahemphu poyok nohok ako-ong alap kihlong ladi dhin-dhini ajiu hapsi kido turupe ihut hali ngo wang hlengo. 17Anang Pol po aro hali phel phel wangdun si, hang-hangsi pulo, “Labang arlenghel Kithechot Arnam amurkiya chiplangsi, nali ngot kijok aduwar wang paklang do.” 18Anang jokha adin ayok ladi kithan jong apot, Pol po neng hik-hak-lak hlongsi anang si-ikpo yok pulo, “Jisu Khristo amen pen nangyok thando, anang para nang wang olenot.” La amunsi si-ikpo labang kitam detsi olesi damo. 19La-amun anang ahemphu hel lahel nohok kiwang anghor kangwe theksi, Pol po aro Silas po yok nepsi, hathi aphu-phang hel adung wungsi pono; 20la-aphel bisarpo ango analiyok ponsi pulo, “Hali Roman arleng jipe abi-pun, alam meng nange lale mainot hlonghle, 21anali Jihudi arleng chiplangsi labang mar paklango, aro hali rongpe long pasohlokdo.” 22Latang si rat hel analiyok kangho hlongsi; aro bisarpo, anali pe hel ingsek detsi tokok pen kisapyok thano. 23Analiyok ongnai kipam aphel, anali yok akrol long pathalsi kahangar thipyok jeilar poyok thano. 24Labang kithan alam hlongsi, analiyok akrol arlo ponsi, anali keng thengpe kardip pakorklaksi bilo. 25Manta ajo-jarlo Pol po aro Silas po Arnam angot pingkitsi lun kilun; aro akrol kido helta anali kilun hel onesi kido. 26La apor photsi chiklik akithe wango; akrol ahem abhiti chihujuk detno, aro la-amun photsi owahel chingpu phleno, aro akrol kido arleng hel kibam hirkuli chiphloksi jang detno. 27La-amun jeilar po ahari hlongo, aro akrol owa hel kachingpu phlen theksi, akrol arleng hel kat detno pusi anang chirono, aro nokjir ensi abithang kachimari yok anengo. 28Manta Pol po hang chersi pulo, “Nang bithang chijorek; piyok pu tene hali holeksi do.” 29Jeilarpo me-thengtom hangsi hem arloyok wango, aro klemphlak phlaksi Pol po aro Silaspo angot chirdomo. 30Laparake anang analiyok mokolyok wansi arjulo, “Ei sar hel, kijok ayok ne pot te tiki nange?” 31Aro anali pulo, “Hemphu Jisu yok krolnot, tanghesi nangpen nang hem dungsi chipajok une.” 32Laparake anali anangyok aro anang hem kido abangyok anali Hemphu alam thano. 33Aro la-arni anuwe aporsi analiyok ponsi, kisap amek hel champilo; aro la-amunsi anang mat-mat, aro anang hem ahuwit ta baptist chiplang penpano. 34La-aphel anang analiyok anang ahemyok ponsi anali ngot cho-jun abihini pisi, hem abang pen Arnamyok krolo apotsi anang arong ongo. 35La aphel adap tha-ango, parake bisarpo hel paton ayok tolsi papulo, “Lamehel arleng helyok tikangot.” 36Lasi jeilarpo Pol po yok a-odi hel parjusi pulo, “Nali kiphlok yok bisarpo hel wang than dundo; lasi nali minon olene nengsamne damot.” 37Manta Pol po analiyok pulo, “Romiya arleng ke hali ta, haliyok ado abisar wesi rongbong ango pamsi, akrol along thalsi, minonke hali tikangjol le ma? Ladi ke kalek; anali abithang wangsi hali papon nang.” 38La-amun paton hel, bisarpo helyok mehel than damo aro anali Roman arleng pusi, labang arjusi chipherelo; 39analiyok wang chingduksi, rongpe para kapadam tolyok chingdukngo. 40La-amun anali akrol para olesi, Lidiya pe ahem lut damo; aro akorte helyok theksi, analiyok anang arong rungsi, lalong para damo.

Currently Selected:

ADUNHEL 16: AMRI-BSI

Highlight

Copy