ADUNHEL 17

Thesalonika Long Kime-Alamthe Kapahar

1La-parake Pol po aro Silas po, Amphipolis aro Apoloniya arong aga damsi Thesalonika yok hlengo; lalong Jihudi hel isi Arnam ahem kido; 2Pol po abi-pun badisi, anali adung damsi, lalong kithom kisang-arni analiyok lo-kangthir para acho alamthe paklango, aro pharlisi than phleno, 3“Khristo duk chosi kithi asitem para kibur nange kido,” aro pulo, “Labang Jisu alamsi ne nali ngo pahardo, anangsi labang Khristo.” 4La-amun anali sitem angkhan ke neng rungo, aro angkhan kimeng Grik arleng ako-ong aman kido arloso krolsi, Pol po aro Silas po pen chilokngo. 5Manta Jihudi hel mek kachiso aneng eno, aro angkhan kangho arleng pangrumo, aro rongpe long ahul pawango. La-amun Jason po ahem pam-theng damo, aro analiyok ason melpe angot kipon hrilo. 6Manta analiyok hlonghlesi, Jason po aro angkhan kikrol abangyok rongpe phu-phang hel ango wung pono aro hangsi pulo, “Labang arleng pirthepe dungsi paso hlokngo, lahel holek ta wang hlengo; 7aro analiyok Jason po ahem don badi pado do, aro Jisu amen pen prek ihut recho do pusi, anali abangten Sijar po kithan alam pangho man.” 8Labang alam arjusi, rat hel aro rongpe phu-phang helta anang ihik-bihik chiplang detno. 9La-amunsi Jason po aro alok hel yokta nohok pisi jamin eno, aro analiyok hlolo.

Pol po Pen Silaspo Beriya Long Kidam

10La-aphel kikrol kortehel parjangsi, anuwesi Pol po aro Silas po yok Beriya rongpe yok tol detno. Anali lalong hlengsi, Jihudi Arnam ahemyok damo. 11Thesalonika arlenghel yok ke lalong arleng hel anang kime kido; piyok pu tene anali neng chipisi lamthe ensi, la ma kalek, mehel kithek ayok arnita lo-kangthir alam kachirwal. 12Lasi anali sitem ako-ong arleng, aro Grik hel asitem ako-ong aman kido arloso hel aro apenso krolo. 13Manta Beriya longta Pol po parasi Arnam alam pahardo, pusi Thesalonika long kido Jihudi hel than unsi lalong yok wangsi, rat helyok arwul salo aro thirthe phosi otelo. 14La amun kikrol kortehel parjang si Pol poyok langpepe akungyok tol penpano; manta Silas po pen Timothi poke Beriya longsi dolo. 15Aro Pol poyok kithondun arleng hel anangyok Athensyok thon duno; laparake Silas po aro Timothi poyok “ki-un ateng parjangsi, nedung kiwangyok thanot” pusi Pol po para kithan alam hlongsi lahel Athensyok dam dapmo.

Athens Long Kidam

16La-aphel Pol po Athens along analiyok inghongne kido amun, rongpe long agoya pleng thipsi kido theksi, anang ajiu long ihik-bihik chiplango. 17Lasi anang Arnam ahem kido Jihudi hel aro arnam kimeng arleng hel pen, aro hathi long kachiphochak arleng hel pen arnita lam chingjelo. 18Lalong Ipikuriyan aro Istoik adhorom agiyan kithek-at angkhan pen lam chirung chibatno. Aro inghone bak ke pulo, “Anang penebak kipu yok rondo?” Angkhan ke pulo, “Kachiron badike, anang bang alongri arnam alam kapahar arleng; piyok putene anang Jisu aro kiburphak alamsi kipahar.” 19Lasi anali anangyok nepsi Areyopaga kipu ason mel alongyok wansi pulo, “Nang kipahar pon akimi kapachirlipo pot te, bangpo hali than une ma? 20Piyok pu tene nang penebak ki-un-eh alam hali-no wang parjudo; tene lamehel acho alam potne, kitheknge anengman.” 21Labang Athens long ahuwit arleng aro wang-kido bang alongri arleng helta sal akijol apor prek asal tikike si, penebak akimi alam chithansi lale onesi apor padam man. 22Lalong Pol po Areyopaga ason amel asitem arjapsi labang alam pulo, “Ei Ethens arleng hel, ne naliyok ahuwit alamta arnam-arni kimeng nali thekdo. 23Piyok pu tene nali jipe ardomman, labang hel ne kilangwor amun, “Amen hlonghle Arnam yok” pusi kiwi isi athuli thek hlongo. La-apot nali inghoyok thekthe yongta ardom man, bangpo ne naliyok thanbang. 24Pirthe aro lalong kido majit abihini kasansepo ke Arnam, anang athak aro pirthimipe Hemphu apot, arleng arideng kikem arnam ahem longke dode. 25Aro anang pene-bak kidorde anat, munusi arideng al-pahlong si kidota ta kalek; piyok pu tene anangsi ahuwit yok ajiu, asithe, aro kido-kangwe abihini pajirman. 26Aro ahuwit yok pirthepe long kapado aphan, anang ihut parasi munusi ahuwit ajat arleng hel paplangsi, anali kido owe aro anali kangning longri ahol pachipmo, 27Lake anali Arnam bisar bisarsi, dakne awak si pahlongman; layongta anang ili para akaholo dode. 28Piyok putene ‘Ili anang longsido, hrengdo, klemdo, dojong do.’ Aro nali lo kiwi arleng hel pudo, ‘Piyok putene ili ta anang agijing.’ 29La-apot ili Arnam agijing apot, Arnam amahangpo munusi kachimangkai aro abudhi pensi ser, rupa, aro arlong agoya badi puke ili chiron nangne. 30Arnam labang kithekthe owepo chihilo; manta minonke ahuwit arlengyok neng kachipharlep yok thando. 31Piyok pu tene ladi adin anang bithang karwaltang arleng ihut parasi pirthepe adhorom bisar oteye, ladi adin khanang si pachipsi bilo; aro anangyok kithihel asitem para pabursi, ahuwit ango krolpen nange aporman pilo. 32Anali Pol po angho para kithihel kibur alam arjusi, angkhanke anangyok chongnekngo; manta angkhan ke pulo, “Labang alam nang para iphong karju phaknge anengdo.” 33Ladisi Pol po anali sitem para olesi damo. 34Layongta anali angkhanke anangyok chilok dunsi krolo. Anali asitem Areyopaga ason amel abang-phu Dionisiyas po, aro Damaris amen ihut arloso, aro anali pen angkhan arlengta kido.

Currently Selected:

ADUNHEL 17: AMRI-BSI

Highlight

Copy