ADUNHEL 15

Jerusalem long Ason Amel Kangning

1Angkhan arleng Judiya para Antiyok yok wangsi kikrol dun abang yok labadi thano, “Mosipo kanong kihlong badike nali sunnot otete lengke nali jok un-eh ye.” 2Pol po pen Barnabas po anali pen chiprongo, lasi Pol po pen Barnabas po aro Antiyok long angkhan abang ke Jerusalem damsi adun abang yok kilang pon akisar hel pen labang alampo kachirwal dam aphan chipachipmo. 3Lasi kachikruk abang analiyok duwar ibeng thon duno aro anali Phoyenikiya pen Samariya alongri aga kidam amun Bang-ajat hel pot badi Arnam yok angthin chipharlep mo, labang alam anali than pono aro labang alam hel ahuwit kikrol dun abang anang arong dolo. 4Anali Jerusalem yok kiwang amun kachikruk abang pen adun hel aro akisar hel analiyok chingdeno aro anali pen Arnam katiki asal hel anali yok than detno. 5Manta Pharisi aga kikrol dun abang angkhan arjapsi pulo, “Bang-ajat abangke sunnot ote pen hlonge aro Mosi po kanong meng hlonge.” 6Lasi labang alampo kachirwal yok adun hel pen akisar hel athawolsi chingrumo. 7Jokha apor lam kachirwal aphel Pitor po arjapsi pulo, “Ei korte hel, Arnam Bang-ajat abang ne angho para kime-alamthe arjusi krolman, lasi angkhan adin angot, Arnam nali sitem para neyok arwal tango, bangpo nali than unsido. 8Aro angthin kihlong det Arnam jibadi iliyok, badisi anali yokta Jiuli-Kangthir pisi hakhi pilo; 9anang krolpensi angthin chipangthirsi, ilipen anali sitem prek ke parjapje yongot; 10lasi ili sar-larhel aro ilita kirung un-eh abi-pun jongali abhar chihi dun un iyongot, lamehel minon adun hel aphang batsi, piyok te Arnam yok honjat langdo? 11Manta jibadi, ilita labadi Hemphu Jisu kajinso parasi kijok pahlongo pusi ili kroldo. 12Aro Barnabas po pen Pol po Bang-ajat hel asitem Arnam para la-an asombhik asin aro angtar hel tikisi kipaklang, mehel ahuwit kithan aphel ahuwit arleng doklipsi onelo. 13Anali kithan tang aphel, Jems po than dakngo; “Ei kortehel, nelam one! 14Arnam abithang amen anat Bang-ajat arleng asitem para isi arongbong kaparjap alam Simon po thano, 15turki hel alamthe pen chikeng do, lo-kangthir long kiwi do, 16‘Owepo kicheng para kithan-un labang asal kapachok Hemphu pudo, 17kidochok arleng hel, lake Bang-ajat arleng nemen pen amen-anang chitha-ang man, lahel ahuwit Hemphu yok bisarman, la-anatsi, 18ne wang phaksi, Dabhit po chinghodet si kido ahempo kemphak nge; aro labang kachingho hel kemphak si, labang poyok parjaknge.’ 19Lasi ne chiron-chibemsi, Bang-ajat arleng asitem ingosi Arnam yok chipharlep do, anali yok kamprek aphang pekpe; 20manta agoya long kachirdom kisim para, kangho kidoner, angphun bersitsi kamari apei aro awi kimung, lamehel para chitereksi kidoyok winang. 21Piyok pu tene aporong para arong tenta Mosi po kanong kapahar abang do, aro kisang-arni ten kachirdom ahem ten long bangpomar chiporheman.”

Bang-Ajat Kikrol Abangyok Kiwi Alo

22La-amun kangthir-adunhel aro akisar hel kachikruk dungsi, anali sitem para Judas, anang yok Barsabas po puta puman, aro Silaspo, korte hel asitem labang-hini arlengyok arwalsi, Pol po pen Barnabas poyok Antiyokyok kitol akime thekngo. 23Anali ri-deng ipak lo labadi wisi tolo: “Antiyok, Siriya lapen Silikiya kido Bang-ajat kortehel yok adun, akisar, aro korte helyok kardom pido. 24Hali than the yongta angkhan arleng hali sitem para damsi, lamthe hel ahul pawangsi nali thin ihik-bihik ingholdo pusi hali arju hlongo. 25Lasi hali isi alamthe pahitsi, ili Hemphu Jisu Khristo amen aphan kachirbu ili nengdok Pol po pen Barnabas po yok, 26anali pen angkhan arleng arwalsi, nali dungyok kitol akime thekngo. 27Lasi Judas po pen Silas poyok nali dung toldo; anali angho penta hali kiwi mat-mat alamhel nali than dame. 28Nali agoya long kardom abhog, awi, angphun kiber apei kicho, aro kidoner labang hel para chiterekne donot; labang katiki asal aparke, nali phuthak kamprek aphang papi hlonghle yok, Jiuli-Kangthir aro halita akime thekngo. 29Labang hel para nali bithang chitereksi do tene, nali phansi meye. Nali long bor-eh pado nang. Kardomo.” 30La-amun anali chipadisi, Antiyok yok wango, aro kikrol arongbong abang chipangrum detsi analiyok lopo pilo; 31anali lo po chiporhesi anang neng kirung alamthe hel arjusi neng arong dolo. 32Judas po pen Silas po abithangta turki kido apot, anali ta jokha alamthe chithansi korte hel yok nengrungsi kikrol pachipmo. 33Ladi si angkhan arni kido aphel, analiyok kitol abang adungyok chirulsi kidamyok, korte helpara nengsamsi chipadilo. 34Manta Silas poke lalong kidoyok chipachip mo. 35Manta Pol po pen Barnabas po angkhan arlengpen lamthe paklangsi, Hemphu Alamthe paharsi Antiyok long dolo.

Pol po Pen Barnabas po Kachibhak

36Angkhan adin aphel Pol po Barnabas po yok pulo, “Jibak arong long ili Hemphu Alamthe kipahar, labang rongpe hel dam phaknang, aro kortehel adung chipochak damsi, anali pot badi do, labang kilangyok damsonang dou.” 37Mark kipuman Johon po ayok Barnabas po ke anangpen kachipon anang kido, 38manta inghosi Pamphiliya long analiyok tikango, aro anali pen Arnam asalyok olele yongot, labang arlengyok ki-enpon yok, Pol po akime thekthe yongot. 39Lalong labadi ahul wangsi, analidak ihut para ihutyok chitikang prupmo; aro Barnabas po ke Mark po yok ensi jahajpen Saipras langlom ayok damo. 40Manta Pol poke Silas po yok arwalsi, kortehel parasi Hemphu kajinso long chipeksi, lalong para anali olelo. 41Siriya pen Silikiya alongri aga damsi kachikruk helyok anang pangtang ponsi damo.

Currently Selected:

ADUNHEL 15: AMRI-BSI

Highlight

Copy