MATHAIA 2

Khosak tianga mi vârhei

1Rêng Heroda inlal lâiin Judai rama Bethlehemah Jisua a zuang suak a. A suak zoi kaneh chu ârsi thu risei ngai mi vârhei khosak tianga rithokin Jerusalemah an hong a.#Lk.2:4-7. 2“Takâm Judahei rêng rang naite zuang isuak kha? Khosak tiang a ârsi #2:2 ‘A ârsi lang lâi kin mu a’ iti thei a nit. kin mu a, amah chubai iûn rangin kin ihong a nit,” an ti a.#Jer.23:5; Zak.9:9; Rit.24:17.

3Kha thu khah Rêng Herodan a riatin chu â lung ân zîng a, Jerusalema mi murdi khom an ilung a zîng a. 4Khanchu, thiampu lalhei neh Dân inriseituhei murdi a koi bûm a, an ziangah, “Takâm Mesia ai suak rang?” itin ardon a.

5Khante, anni khan a ziangah, “Judai rama Bethlehemah. Zânthlan hingka hin a lei riziak:

6“‘Nangmah Judai rama Bethlehem,

Judai ram khopuihei lâiah â chîntak ni tlak mak che;

Ni sunga rithokin ruaitu a lai suak rang a nit,

Ki mi Israelhei iruai rangtu khah,’ iti hi,” itin an sâm a.

7Khanchu, Herodan mi vârhei khah a koi a, ârsi lang zoro khah inrûkkan ardon infel a. 8Khanungchu, hi ṭong hih iben anni khah Bethlehemah ân fe a, “Fe unla, naite khah iṭha takkan zong suak unla, kei khomin ife a, amah chubai ki ûn theina rangin nin mu kaneh chu ne hong iril nôk rei,” a ti a.

9-10Khangkan, an fe tâk a, lampuiah chu khosak tianga ârsi an imu ngir khah an mu nôk tâk a. Ârsi khah an mun chu an râi a fân a, an lôm tak tak a. Ârsi khah naite omna chung ridîn a tlung mâkah chu an matonah a fe mai a. 11Insungah an va lût a, a nu Mari zianga naite khah an mu a, rikhûk idilin chubai an ûn tâk a. Khanchu, an thilpêk hong chôi: rângkachak hei, bero hei neh Mura hei khah a ziangah an pêk tâk a. 12Khante, Heroda ziang tiang kîr nôk khâi loi rangin an rimangah Pathianin â ril sikin lampui dangah an ram tiang an fe nôk tâk a.

Aigupta ramah lâizâm an tho

13Khante, anni khah an fe zoi nungah khan Pumapa vântirtôn khatkah Josefa ziangah rimangin ân lâr a, a ziangah, “Herodan naite hi ithat rangin ai zong rang a nit; khasikin, thoi inla, naite neh a nu ṭhui inla, Aigupta ramah ropui roh. Hong ikîr ranga nang ke ril mâkah chu amakhan om mai roh,” a ti a. 14Khanchu, Josefa khah a thoi a, naite neh a nu khah a ṭhui a, kha zân zelah khan Aigupta ramah an fe tâk a. 15Heroda thi mâkah chu amakhan an om mai tâk a. Pumapan Zânthla bâia, “Ki Naipa chu Aigupta ram ata ki koi isua a,” itia a lei îsîr khah a hong tlung idikna rangin amakhah a hong iom a nit.#Fes.4:22; Hos.11:1.

Naitehei that thu

16Khante, Herodan khosak tianga mi vârhei khan an lêm iti a riat kaneh chu a ning a thik tak tak tâk a. Mi vârhei zianga rithoka ârsi lang zoro ai riat dungizuiin Bethlehem neh a kôlvêla naiipa kum inikah ten nuai tianga rêng rêng chu ithat vang rangin thu a pêk tâk a. 17Zânthla Jeremian a lei îsîr:

18“Rama khuah khêk irî an riat a,

Lung iseh takka ṭap irî khah;

Rakilin a naihei a ṭâ a,

An om khâi no sikin â lungringam thei khâi mak e,”

iti khah a hong itlung tâk a nit. #Jer.31:15.

Aigupta ram ata an hong kîr nôk thu

19Khante, Heroda khah a thi tenan chu Pumapa vântirtôn khatkah Aigupta ramah khan Josefa ziangah rimangin ân lâr a, 20a ziangah, “Thoi inla, naite neh a nu ṭhui inla, Israel ramah kîr nôk ta roh, naite that itumhei khah an thi tâk,” a ti a. 21Khanchu, Josefa khah a thoi a, naite neh a nu kha a ṭhuia Israel ramah a fe nôk tâk a. 22Khannisela, Arkelausa khah a pa Heroda thûlin Judai ramah rêng a chang iti Josefan a riatin chu khantaka fe khah a ṭi a. Khante, armangah irilin a om nôk a, Galili ram tiang a fe tâk a. 23Khua khatkah, Nazaret an iti-ah khan a va om tâk a. Zânthlan, “Ani khah Nazaret mi tîng an ti,” itia a lei îsîr khah a hong itlung tâk a nit.#Isa.11:1; Mk.1:24; Lk.2:39; Joh.1:45.

Currently Selected:

MATHAIA 2: BIATBSI

Highlight

Copy