LUKA 1
1
Theofila ziangah
1Ei lâia thil zuang itlung, a tîr ata mita mutuhei neh thusîrtuhein an ne îril angkah khan mi tam takkan riziak an tum tâk a. 2Khasikin, Theofil maritiom tak, a bula rithokin tinrêng ifel takkan keimah ngêiin ki sui a,#TS.1:1; 1 Joh.1:1; Heb.2:3. 3ridot thlâmkan ni ta rangin riziak inlang kî ti a nit. 4Tiana thurchi nang an lei înriseihei khah â dik tak a nit iti ni riat theina rangin.
Baptistu Johana suak thu
5Judai ramah Heroda ân lal lâiah khan Abija lôma mi thiampu Zakaria a om a, a nupui khah Arona richia mi Elizabeti a nit.#1 Rich.24:10; 2 Rich.31:2. 6An ruaika khan Pathian mitmuah mi fel an nit a, sêlna boia Pumapa thupêkhei neh Dân murdi zôm mi an nit a. 7Khannisela, Elizabeti kha a ching sikin nai nei mak a, an ruaika khan an ûnlian ok tâk a.
8Khante, sûnkah chu an pôl sintho ngai balamin Zakaria khan Pathian maah thiampu sin a tho a.
9Thiampuhei tho ngai dân angkan Tempil sunga lûtin, Pumapa mâichâma namhoi ihâltu rang thlasâna an ien chu a chungah a tlâk a.#Fes.30:7-11.
10Namhoi a hâl lâiah khan mipuihei chu an rêngkan tualah an lei ṭongṭai a.
11Namhoi hâlna mâichâm changtianga dingin Pumapa vântirtôn khah a ziangah a zuang inlâr a. 12Zakaria khan a mun chu rilônthingin a ṭi tak tak a. 13Khannisela, vântirtôn khan, “Zakari, ṭi no roh, ni ṭongṭaina khah Pathianin a riat a. Ni nupui Elizabeti khan naiipa nang nei pêk a ta, arming Johana nî sak rang a nit. 14A zuang suak sikin nangmah neh mi tam takka lungril ilômin râifân a ti. 15Pumapa mitmun milian nîng a ta, uain neh zu rêng rêng in no nia. A suak nî ata Rithla Rithiangin sip a ti.#Rit.6:3; Lk.7:33; Mal.4:5,6. 16Israel richihei lâia mi itam takkah Pumapa an Pathian tiang hong ṭhui nôk a ti. 17Zânthla Elija angkan irât neh ihâi takkan Pumapa matonah fêng a ti. Pahei neh naihei inrimun nôk a ta, helâkloihei chu lungril ifel riputhei angkan inripuh nôk a ta, Pumapa ta rangin mihei chu inrifo diam a ti,” a ti a.
18Vântirtôn ziangah Zakaria khan, “Amakhah ingkan im ki riat infel thei rang? Kei lak itar ki nit tâk a, ki nupui lak khom â ûnlian ok tak a nit a,” a ti a.
19Vântirtôn khan, “Keimah hi Pathian makunga ding ngai Gabriela ki nit a, nangmah nang isôn rang neh hi thurchi lômiom nang iril rang piala zuk itir ki nit.#Dan.8:16; 9:21. 20Ringai roh, hi thu a zoro taka zuang itlung ngêt rang nang ki îril hih ni iam no sikin a zuang tlung tak tak mâkah chu ṭong thei loiin dâirek ni ti,” a ti a.
21Mipuihei khan tualah an lei ngâk a, Tempil sungah a om sôt rai sikin an ringai arkhêl a. 22A hong suak tenan chu an ziangah îte isîr thei khâi mak a, Tempil sungah inlârna ai mu a nit iti an riat tâk a; kutrisin bangin thu â sîr a, ai ṭong thei viat khâi ino a nit. 23Tempila a sintho zoro bituk a hekin chu a inah a fe tâk a.
24Zoro sôt inote nungah chu a nupui Elizabeti khan nai a vong tâk a, thla ringaka sung chu tual suak mak a. 25“Nung insîrah ker ming isia sut rangin Pumapan a ne isan a nit hi,” a ti a. #Riph.30:23; Isa.4:1-27; Mat.1:18.
Jisua suak rang thu rillôkna
26Elizabeti nai vong, a thla ruknaah khan chu Pathianin vântirtôn Gabriela kha Galili rama Nazaret khuaah a tir a. 27Rêng Davida richia mi Josefa nupui hual nungâk rithiang Mari ziangah thu a zuang chôi a. 28Mari ziangah insungah a lût a, “Chibai, ditsakbîknu, Pumapa ni ziangah a om, ṭhat nang ai vur tak tak a nit,” a ti a.
29Kha vântirtôn thu zuang ithlun khan Mari lungril ân buai a, im a nitzia tâk itin a ngaitua a. 30Khante, vântirtôn khan, “Mari, ṭi no roh, Pathian ditsakna nî dong a nit. 31Ringai roh, nai vong ni ta, nai ipa nei ni ta, arming Jisua sak ni ti.#Lk.2:21; Mat.1:21. 32Ani chu mi roinpui nîng a ta, Chungnungtak Pathian Naipa tîng an ti. Pumapa Pathianin a chibul Davida rêngṭhungmunah inṭhung a ti.#2 Sam.7:12,13,16; Isa.9:7; Dan.2:44. 33Jakoba richihei chungah kumkhuakan inlal a ta, a rêng ramin mong nî nei no nih,” a ti a.
34Khante, Mari khan vântirtôn ziangah, “Amakhah ingkam a nit thei ranga? Pasal la nei ino nungâk ithlîng kî nit khate,” a ti a.
35Vântirtôn khan a sâm a, “Rithla Rithiang kha ni chungah zuang a ta, Pathian ritha ni chungah om a ti. Khasikin, naite zuang isuak rang khom mi rithiang, Pathian Naipa an iti rang a nit. 36Khante, ringai roh, nen zirpuinu Elizabeti, â ching an iti ngai khomin a tar nungin naiipa a vong a, atûna thla hih a thla rukna a nit tâk. 37Pathian rangin chu îte thei ino zel omak e,” a ti a.#Riph.18:14.
38Khanchu, Mari khan, “Pumapa somnu ki nit a, ni thu angkah takin ki chungah tlung riseh,” a ti a. Khanungchu, vântirtôn khan a mâk tâk a.
Marin Elizabeti â thlo
39Kha rizoi kaneh chu Mari khah arsiam a, Judai ram thingtlâng khua khatkah ipanin a fe tâk a. 40Zakaria inah a lût a, Elizabeti kha chibai a bûk a. 41Elizabetin Mari chibai bûkna rôl khah a riat kaneh a phûnga naite kha a châng a, Elizabeti kha Rithla Rithiangin a sip tâk a. 42Khanchu, rôl iring takkan â khêk a, “Nang chu nupang lâia hamṭha tak ni nit a, ni nai vong rang khom mi hamṭha a nit.#Lk.11:27,28. 43Ingka tliam ai nit tâk ki Pumapa nu teh ki ziangah nî hong tâk hi? 44Ni chibai bûkna rôl ki riat kaneh lôm sikin ki sunga naite khom ai châng a nit. 45Ni zianga Pumapan thu a ithlun khah ni chungah tlung ngêt a ti ni iam sikin mi hamṭha ni nit,” a ti a.
Mari inpâkna la
46Khanchu Marin,
“Ki ringnan Pumapa a chôiinrisâng a,#1 Sam.2:1-10.
47Ker thla khom ne saninringtu Pathian chungah ai lôm tak tak a nit.
48Â somnu tlômzia hih a riat mai a,
Atûn ata chu suanpâr tin tinin mi hamṭha ne tîng an ti.#1 Sam.1:11.
49Sinthothei Pathian khan ki chungah thil roinpui tak a tho tâk a,
Arming khom arthiang a nit.
50Rualithar ata rual thoithar nôk idênin,
Ama ṭituhei ta rangin chu a lungkhamna dâi ngai mak.
51A bân tharât an chungah a dâng a,
Lungrila lârripâkhei chu â chekindar ngai.
52An rêngṭhungmun ata rêng roinpuihei kha a kâi isim a,
Ringaiintlôm mihei kha a chôiinrisâng tâk a.
53Voniṭâmhei chu thil iṭha murdin â fân khop a,
Richonghei chu kut korongin ân rot tâk a.
54Ei chibulhei zianga a ṭonginkung angkah khan,
 som Israelhei isan rangin a zuang tâk a.
55Abrahama neh archihei lung ân khamna kha,
Kumkhuakan ai riat mai a nit hih,” a ti a.#Riph.17:7; Mik.7:20.
56Mari khah Elizabeti ziangah thla thumkah a châm a; khanchu, a in tiang a fe nôk tâk a.
Baptistu Johana suak thu
57Elizabeti nai nei zoro a hong tlung tâk a, naiipa a nei a. 58A bungahei neh a suapuihei khan Pumapan lung ân khamzia an riat a, an lômpui tak tak a.
59Khante, a sûn iriatnin chu naite sertan rangin an hong a, a pa riming riputin Zakaria ngir isak rang an tum a.#Lev.12:3; Riph.17:12. 60Khannisela, a nu khan, “Ni thei no nih, arming chu Johana isak rang a nit,” a ti a.
61Annihei khan, “Nin suapuihei lâiah khom hi riming riput hih tute la om ngai mak,” an ti a. 62Khanungchu, a pa khah naite riming im a sak nuam itin kut risinin an ridon a.
63Zakaria khan riziakna lekhaphêk a nî a, “Arming chu Johana a nit,” itin arziak a. An rêngkan an ringai arkhêl tak tak a. 64Tukvakkan Zakaria khah a hong ṭong thei a, Pathian ân pâk zel tâk a. 65An bungtualbômhei murdi khan an ṭi a, kha thurchi khah Judai tlângram mun tinah ân thang tâk a. 66Â ria murdi khan, “Hi naite hih ingka takin im a la hong iom rang na!” an ti a. Pumapa ompuina ritha khah a chungah a om mai a.
Zakaria rillôkna
67Johana pa Zakaria kha Rithla Rithiangin a sip a, Pathian thucha â sîr a:
68“Pumapa, Israel Pathian chu inpâkin om riseh,
A mihei isan rangin a zuang a, ân zôk tâk a.
69Â som Davida richia rithokin ei rang saninringtu roinpui a ne pêk tâk a.
70Khuansiang ata a zânthlahei zianga a înkung angkah khan,
71Ei irâlhei neh ne nelhei ata nen zôktu rang kha.
72Ei chibulhei zianga a lungkham inlang rang ai ti,
A thuthlung rithiang khah ai riat mai a nit.
73Ei chibul Abrahama ziangah ṭonginkung idet a nei a,
Ei irâlhei ata ne saninzôk a,
74Ṭi loia a sin ei tho a,
75Ei damsunga a mitmuah rithiang neh ifela ei om theina rangin.
76A nit, Tôite, nang chu Chungnungtaka zânthla nang tîng an ta,
Pumapa lampui isiam rangin a matonah fêng ni ta; #Mal.3:1.
77A mihei chu an sualhei izâa omin a saninring iti thu iril ni ti.
78Ei Pathian chu khorngaina sip, mi lunginkham thei a nit a;
Khasikin, saninringna inî chu ei chungah a ne îsua pêk rang a nit.#Mal.4:2.
79Thina dâilîm izînga ṭhunghei murdi rivân ata elinvâr a,
Thlangamna lampuia ei kehei nen phêt rangin,” a ti a.#Isa.9:2; Mat.4:16.
80Khante, naite khah taksa neh rithla tiang a thuar tîr tîr a, Israel mipuihei lâiah a hong ilang mâkah chu ramchârah ai om mai a nit.#Lk.2:40,52.
Currently Selected:
LUKA 1: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
