TIRTÔNHEI SINTHO 2

Rithla Rithiang a zuang tlung

1Khante, Pentikos nî a hong tlungin chu iamtuhei khah an rêngkan mun khatkatah an ribûm a.#Lev.23:15-21; Dn nik.16:9-11. 2Voikazelin rivâna rithokin thlipui irî angkan irî a zuang tlung zut a, an iṭhungna in khah â rî khan a sip zit tâk a.#TS.4:31. 3Khanchu, meichok, ilei i-ang zek an khâta risem indar an mu a, an chungah a zuang fûk chit a.#Mat.3:11. 4An rêngkan Rithla Rithiangin an sip zit tâk a, Rithlân ân ṭong lam angkah takin ṭong danghein an ṭong tâk a.

5Rivân nuaia nam dang dang lâia om, Pathian ingaisak mi Judahei khah Jerusalemah an châm a. 6Kha irî khah an riatin chu mi itam takkah ringai rikhêlin an hong ribûm a, an thu sîr khah mi tinin mahni ṭong sengin an lei riat thei a. 7Rikhêl an ti tak tak a, “En ta u, hi thu sîrtu murdi hih Galili rama mihei ni mak im a? 8Ingkan im ei rêngkan mahni suakpui ṭong angkah chita an thu sîr ei iriat thei hi? 9Ṭhenkah Parthai nam, Medai nam, Elamatai nam ei nit a; ṭhenkah Mesopotamia rama om, Judai rama om, Kapadokia rama om, Ponto rama om, Asia rama om, 10Frugia rama om, Pamfulia rama om, Aigupta rama om, Kurini khua kôlvêla Libua rama om ei nit a; ṭhenkah Rom.khuaa rithoka hong, 11Judahei neh Juda saphunhei ei nit a; ṭhenkah Kret tuihuala mi neh Arab rama mi ei nit a; nikhomsela, Pathian sintho roinpuihei an îsîr mahni ṭong chitin ei iriat hi,” an ti a. 12An rêngkan an ilung a zîng a, arkhêl an ti tak tak a, “Amahih im ai nit tâk,” an ti a.

13Khannisela, mi ṭhenkan chu iamtuhei khah an nuiso a, “Uain ithar inrui an nit hih,” an ti a.

Pentikos nî-a Petera thusîr

14Khanungchu, Petera khah Sômleikhatkahei neh an iding a, mipuihei ziangah khan rôl iring takkan thu â sîr a, “Nangni Judai rama mihei neh Jerusalema om murdihei o, amahih im ai nit nangni lei iril rong, ki ṭong hi lei ringai rei. 15Hihei hih nin iam lam angkan inrui mak e, ṭuanvaitlâk #2:15 Hi zoro hih zîng dâr ikuakkah vêl a nit a, zîng ṭongṭai zoro, bu an nêk ma a nit. kêng a lai nit chak. 16Hi thil hih zânthla Joela lei îsîr khah a nit:

17“Pathianin, ‘Sûn nungkhônheiah chu hingka hin ki lai tho rang a nit:

Mi tin chungah ker Thla vur ki ta,

Nin naipahei, nin nainuhein ki thu inpuang an ta;

Nin tlangvâlhein inlârnahei mûng an ta,

Nin patarhein rimanghein phan an ti.

18A nit, kha nikhuaheiah khan chu ki suakpahei,

Ki suaknuhei chungah khom,

Ker Thla vur ki ta, ki thu isîr an ti.

19Chungtiang rivânah thilrikhêlhei neh,

Nuaitiang rinêngah risinhei inmûng ki ta,

Thisen hei, mei hei, meikhû hei om a ti.

20Inî inzîng nîng a ta,

Ithla thisen angkan sen pum a ti;

Pumapa Nikhuan thang neh roinpuitak a zuang tlung ma ngêiah khan.

21Khanchu, tukhom Pumapa riming rilam murdi chu,

Inringin om an ti,’ a ti, ai ti kha.#Joel.2:28-32.

22“Nangni Israel mihei o, hi thu hih lei ringai rei: nangmani rengin nin iriat angkan Pathianin Nazaret Jisua mangin nin lâiah sinrikhêlhei neh thilrikhêlhei isinin a mi inkung a nitzia ifel takkan a înlang tâk kha. 23Ani khah Pathian lei tum lam neh lei rêl thlâm lam angkan nin ziangah ipe a nit a. Nangmanin mi sualhei kut imangin krosah nin hêmde a, nin that tâk a.#Mat.27:25; Mk.15:24; Lk.23:33; Joh.19:18. 24Nikhomsela, ani khah thina man thal thei rual a nit no sikin Pathianin thina rithahei ata kha inzôkin, a kâiithoi tâk a. #Mat.28:5,6; Mk.16:6; Mk.16:6; Lk.24:5. 25Khante, Davida khomin a chungchâng hingka hin a lei isîr a:

“‘Ki makungah Pumapa ki mu mai a,

Ke changtiang a om a, itên nen nîng thei no nih. #Lap.16:9-11.

26Khasikin, ki lungril lômnan a sip a,

Ke lei khom a lôm a,

Ki taksa famthei khom hih tûngnan a irngam a nit.

27Mithi khuaah ker thla marak no tin a,

Ni Mi Rithianga ruak khom ithlâna mon rang phal no tin e.

28Nangman ringna lampuihei ni nen mu a,

Ni mêl imun lômnan sip ki ti,’ itin.

29“Suapuihei o, richibul Rêng Davida thurchi hih ihâi takkan ki îsîr rang a nit; ani khah a thi tâk a, iphûm a nit a, a thlân khom vuani tenah hin ei kôl zelah a lai om mai a nit. 30Ani khah zânthla a nit a, a ṭhâlbea inzir lâia tukhôk manih a rêngṭhungmun ilua rangin Pathianin rêng la phun pêk rangin a înkung a nit iti a riat a.#Lap.89:3,4; 132:11; 2 Sam.7:12,13. 31Sûn matona Pathianin sin a tho rang kha Davidan a lei mu thlâm a; khasikin, Krista thoinôk rang thu hingkan a lei isîr a:

“‘Ani khah mithi khuaah imarakin omak a,

A ruak khom ithlânah mon mak e,’ ai ti a nit.#Lap.16:10.

32Kha Jisua ngêi khah Pathianin a kâiithoi nôk tâk a, kha thu riatpuituhei khah kin rêngkah hin kin nit. 33Pathian kut changtiang chôiinrisângin a om tâk a, Pa ziang ata Rithla Rithiang inkung khah a dong a; atûna nin imu neh nin iriat hih a thilpêk a zuk ivur chu a nit hih. 34Davida khah rivânah hang lui mak e; amah ngêiin,

“‘Pumapa khan ki Pumapa ziangah,

Ke changtiang iṭhung mai roh,

35Ne râlhei ni kepha sianan ki siam mâkah chu,’

ai ti a nit khah.#Lap.110:1; Mat.22:14; 1 Kor.15:25; Efes.1:20; Heb.1:13.

36“Khaangkan, kha Jisua nin ihêmde ngêi khah, Pathianin Pumapa neh Krista inin a siam tâk iti Israel mi tinin reh chit riseh,” a ti a.

37Khanchu, kha thu khah mipuihein an riatin chu an lungril isun angkan an hong om tâk a, Petera neh tirtôn danghei ziangah khan, “Suapuihei, im kin tho rang tâk?” an ti a.

38Peteran an ziangah, “Rilet unlan, nin sualhei izâ nin nit theina rangin Jisua Krista rimingin #2:38 ‘Riming ripuh rangin,’ itih thei a nit. baptis chang khai rei; khanchu, Pathian thilpêk Rithla Rithiang hih dong nin ti. 39Pathian ṭonginkung khah nangmani ta rang a nit a, nin naihei ta rang khom a nit a, ram ilah taka mi murdi rang neh, Pumapa ei Pathianin a zianga ai koihei murdi ta rang a nit,” a ti a.#Isa.57:19; Joel.2:32.

40Peteran thu dang itam takkah isîrin, anni chu â thor a, “Atûnlâi rualithar pualoihei chunga kuttum zuang itlung ranga rithokah hin zôk rei,” a ti a.#Dn nik.32:5; Fil.2:15.

41Mi itam takkan Petera thu sîr khah an iam a, baptis an chang a, kha nî-ah khan mi sângithumkah vêlin an ribôk tâk a. 42Khante, ṭhatnemringai takka tirtônhei zianga thu riseia ripôlkhômin, ibai ikhoi neh ṭongṭaiin an om ngai a.

Iamtuhei ring dân

43Tirtônhei khan sinrikhêl neh thilrikhêl itam takkah an sin a, mi tinin marit an tho tak tak a. 44Iamtuhei murdi chu ripôlkhôm maiin an om ngai a, an neinun tinrêng an itlâng riai a.#TS.4:32-35. 45A neihei khan an richonhei neh an neinunhei murdi an zuar a, an inkhôk lam angkah chitin an rêngka ziangah khan an sem ngai a. 46Nîn tin Tempilah lunginrual takkan an inkhôm ngai a, an insungheiah khom râiifân tak neh lung itluk takkan khalai an rikhîl ngai a. 47Pathian an inpâk a, mi murdi ditsakna an dong a. Khante, Pumapa khan ai saninring murdihei khah nîn tin an lômah a bôk pêk mai a.#TS.4:4; 5:14; 11:21; 14:1.

Currently Selected:

TIRTÔNHEI SINTHO 2: BIATBSI

Highlight

Copy