TIRTÔNHEI SINTHO 3

Kebâi kutdo indam thu

1Nikhuakah chu kholoi fasukrup, #3:1. Hi zoro hih kholoi dâr ithumkah vêl a nit. ṭongṭai ngai zoroah khan Petera neh Johana khah Tempilah an fe a. 2Khante, ipa khatkah, a suak ata kebâi hi an hong rizôn a. Tempila fehei zianga kut lei ido rangin Tempil kotbâi, “Kot Enhoi,” an iti bulah khan nîn tin an inzâl ngai a.#TS.14:8. 3Kha mi khan Petera neh Johana Tempila lût rang khah a mu a, a kut a lei do a. 4Anni khan ani khah an en ngit a, Petera khan a ziangah, “Keimani ne hang en ta,” a ti a. 5Khanchu, ani khan an zianga îtika dong ranga tûngin a hang en a. 6Khannisela, Petera khan, “Tangka neh rângkachak îte nei mang e; nikhomsela, ki neisun nang pêng ki ti, Nazaret Jisua Krista rimingin ken lôn ta roh,” a ti a. 7Khanungchu, a kut changtiang â tûk a, a kâiithoi tâk a. Voikarengin a kehei neh a keârtui ruhei khah a hong rât zel tâk a. 8Khanchu, ani khah artôp a, a ken â ding a, ilôn a phut zel tâk a. Kea lôna ritôp pumin neh Pathian inpâk thiai pumin Tempilah khan anmani lômin a lût sa tâk a. 9Mipui murdi khan kea ai lôn tâk neh Pathian a înpâk khah an mu a; 10Tempil kotbâi, Kot Enhoi bula kut idoa ṭhung ngai khah a nit iti an riat a, a chunga thil itlung khah arkhêl an ti tak tak a, an ilung a zîng khap a.

Tempila Petera thu sîr

11Khante, ani khan Petera neh Johana khah a la tûk mai lâiin, mipuihei kha Solomona Thapuk an iti-ah khan an ziangah an hong itlân zit a, arkhêl an ti tak tak a. 12Peteran amakhah a mun mipuihei ziangah khan, “Nangni Israelhei o, ithôm amahih arkhêl nin itia nin ne ien ngit hi? Hi mi hih keimani sinthotheina manih, kin ṭhat bîk sik manih sika kin înlôn nin isôn mani? 13Abrahama Pathian, Isaka Pathian, Jakoba Pathian, ei chibulhei Pathian khan â Som Jisua khah ai chôiinrisâng tâk a nit hi. Ani khah nin inman a, Pilatan isua a tum khomin a makungah nin lei inôl a nit.#Fes.3:6,15; Isa.52:13. 14Ani khah mi rithiang neh mi fel tak a nit a; nikhomsela, nin nel a, mi thattu khah nangni sua pêk rangin nin ngên tâk a.#Mat.27:15-23; Mk.15:6-14; Lk.23:13-23; Joh.19:12-15. 15Ringna petu khah nin that a; nikhomsela, Pathianin ani khah thina rithokin a kâiithoi nôk tâk a; keimani hih kha thu repuituhei kin nit. 16Arming sinthotheina khah hi kebâipa damna pe a nit. Nin imu neh nin iriat hih arming iamna sika isin a nit; nin rêngka nin imu angkan Jisua iam sika a hong idam vang tâk a nit hi.#1 Tim.1:13.

17“Atûnah hin suapuihei, nangmani neh nin ulianhei khomin Jisua chunga nin itho khah nin inmôl sika a nit iti ki riat.#1 Tim.1:13. 18Pathianin zânthla murdi bâia Krista tuang rang thu a lei înpuang kha hingka hin a îthlun tâk a nit. 19Khasikin, nin sualhei rilet unla, Pathian tiang ngat nôk ta rei; khanchu, nin sualhei nangni zâ a ti. 20Khangkan, Pumapa ziang ata hartharna zoro la zuang tlung a ta, nin ta ranga a inkung Mesia, Jisua kha zuk tir a ti. 21Nikhomsela, tinrêng siaminthar zoro a tlung mâkah chu rivânah la om a ti; siamtharna thu chu Pathianin a zânthla rithianghei bâia tianlâia a lei înpuang thlâm tâk a nit. 22Mosia ngêiin, ‘Pumapa, nin Pathianin keimah a ne itir angkah hin nin suapuihei lâia mi, zânthla khatkah nangni zuk tir pêk a ti; nin zianga a îsîr murdi nin zôm rang a nit.#Dn nik.18:15-18 (LXX); TS.7:37. 23Mi tukhom kha zânthla thu zôm ino kangân chu Pathian mihei lâia ta ûmisuan that inrimang rang a nit,’ ai ti kha.#Lev.23:29; Dn nik.18:19. 24Samuela neh â nunga zânthla murdihei khan atûnlâi thurchi hih an lei îsîr inpuang ngai chu a nit. 25Pathianin a zânthlahei imanga ṭong a lei înkung khah nangmani ta rang a nit a, nin chibulhei zianga thuthlung khom khah nin idong tâk a nit. Pathianin Abrahama ziangah, ‘Nangma richiheiah khan rammuala mi murdi ṭhatvurna dong an ti,’ a lei iti khah.#Riph.22:18; Gal.3:8. 26Khasikin, Pathianin â Som khah ân kung a, nin sualhei nung nangni insonga ṭhat nangni vur rangin nin ziangah a zuang itir bak a nit hih,” a ti a.

Currently Selected:

TIRTÔNHEI SINTHO 3: BIATBSI

Highlight

Copy