TIRTÔNHEI SINTHO 14

Ikonioma Paula neh Barnaba thusîr

1Khangkah ngirah khan Ikoniomah khom, Paula neh Barnaba khah Judahei inkhôm inah an lût a, thu an isîr a. Juda neh Jentail itam takkan an iam tâk a. 2Khannisela, a iam nuam ino Judahei khan Jentailhei an ithor a, iamtuhei khah an inmumâk tâk a. 3Tirtônhei khan ihâi takka Pumapa thu sîrin kha khuaah khan isôt takkah an châm a. A lungkhamna thu tirtônhein an îsîr khah namindetna rangin Pumapan anmani mangin sinrikhêl neh thilrikhêl itam takkah a sin a. 4Khosunga mipuihei khah lôm inikan an inṭhen tâk a, ṭhenkan Judahei an thlop a, ṭhenkan tirtônhei an thlop a.

5Khanungchu, Jentailhei neh Judahei neh an ruaituhei khan, denginthei bit a, lunga dêng that an tum tâk a. 6Tirtônhein kha thu khah an riatin chu Lukaoni rama Lustra khuaah neh Derbe khuaah neh a kôl vêla ramheiah an rot tâk a. 7Khahei khomah khan Thurchi Ṭha an isîr mai a.

Paula neh Barnaba Lustra khuaah

8Khante, Lustra khuaah khan kebâi khatkah, a suaka rithoka lôn thei tlak ino, â ṭhung ṭian hi a om a.#TS.3:2; 9:33. 9Kha mi khan Paula thu sîr khah arngai a. Paulan a en ngit a, damna rangin iamna a nei iti a mun chu, 10rôl iring takkan, “Ni ken iding roh,” a ti a. Ani khah artôp a, a lôn zel tâk a. 11Mipuihein Paula sintho khah an mun chu Lukaoni ṭongin an ikhêk a, “Pathianhei khah miriam angkan ei ziangah an zuang iṭum tâk a nit hi,” an ti a.#TS.28:6. 12Barnaba khah Zeusa an ti a, Paula khah thu sîr ual ngai a nit sikin Harmesa#14:12 Zeusa hi Grik mihei pathian inchungtak a nit, Hermesa hi a tirtôn a nit. an ti a.

13Khante, an pathian Zeusa Tempil khah kho putiang a om a, khantaka thiampu khan serâtchalhei neh pârruihei kho dâikotah a hong chôi a; mipuihei neh khan tirtônhei zianga ribôlna lan an tum tâk a.

14Kha itho rang an înlung khah Barnaba neh Paulan an riatin chu, an puan an ipotthlêr a, mipui lâiah khan an itlân a, an ikhêk a, 15“Hi thil hih îrang im nin itho? Keini khom nangmani angkana miriam ngir kêng kin init. Hi thil chanlamboi hih ima a, rinêng neh rivân, tuikhanglian neh a sunga om murdi siamtu Pathian Iring tiang nin ngat theina rangin Jisua Thurchi Ṭha nangni kin îthlun kêng ai nit.#Fes.20:11; Lap.146:8; Isa.37:16; Jer.32:17. 16Pathian khan tianah chu mi tin mahni lampui chit iro a phal ngai a. 17Khannisela, amah chu a om ngêt a nit iti thil iṭha thon ân lang mai ngai a: rivân ata rua nangni ân sûr pêk a, a zoro takkan nin chimuhei nangni ân râ pêk a, ifah rang nangni a pêk a, nin lungrilah lômna nangni ai pêk ngai a nit,” an ti a. 18Kha thu khah isîrin mipuihei kha an zianga ribôlna lan loi rangin an khap thei ṭôk tâk a.

19Nikhomsela, Pisidia rama Antiokei neh Ikonioma rithokin Judahei ṭhenkah an hong a, mipuihei khah an tiang an ithlêm inê a; Paula khah lungin an dêng a, â thi tâk isônin khua ata an kâi suak a.#2 Kor.11:25; 2 Tim.3:11. 20Khannisela, iamtuhei khah a kôlah an hong iding lâiin ani khah a thoi a, khuaah khan a lût nôk tâk a. Atûkah chu Barnaba neh Derbeah an fe tâk a.

Suria rama Antiokeiah an kîr nôk

21Derbeah khan Thurchi Ṭha an isîr a, mi itam takkah kôilômin an siam nungin Lustraah an kîr nôk a, Ikoniomah hei, Pisidia rama Antiokeiah hei an inzin thiai mai a. 22“Intak itam takka tuangin Pathian ramah ei ilût rang a nit,” iti inriseiin iamtuhei khah an indet a, iamnaah khan iom mai rangin an ithor a. 23Koindang tinah upahei an phun thiai a, bu ngeiin an ṭongṭai a, an iiam Pumapa kutah an inkol mai a. #TS.6:5,6; 13:3.

24Pisidia ram khah an rifang zoiin chu Pamfulia ram an hong tlung a. 25Pergaah thu an isîr a; khanungchu, Attalia khuah an fe a, 26khantaka rithokin chu rikuangin Antiokeiah an fe nôk tâk a. Hi khua hih an lei isin tâk isin ranga iamtuhein Pathian lungkhamnaa ibânga, an inzin phutna mun khah a nit.

27Antiokei an tlungin chu koindanghei an koi bûm a, Pathianin anmani manga sin ai thohei murdi neh Jentailhei ta ranga iamna lampui â ong pêkziahei khah an iril a. #1 Kor.16:9; Thup.3:7. 28Iamtuhei ziangah khan isôt takkah an châm tâk a.

Currently Selected:

TIRTÔNHEI SINTHO 14: BIATBSI

Highlight

Copy