TIRTÔNHEI SINTHO 13
13
Barnaba neh Saula an rithlang a, an tir suak
1Khante, Antiokeia koindang mihei lâiah khan zânthlahei neh minriseituhei an om a; khahei khah: Barnaba hei, Simeona (Hângah an iti) hei, Lukia (Kurini mi) hei, Manaena #13:1 Galili lal Herod Antipas mal ṭha itih thei a nit. Hângah hi ‘Nigera’ khom an ti ngai. (Rêng Heroda urêng angkana ai en) hei, neh Saula hei an nit. 2Bu ngeia Pumapa chubai an ûn lâiin Rithla Rithiangin an ziangah, “Barnaba neh Saula hih anmani ken kungna bi tak isin rangin nen ran pêk rei,” a ti a.
3Khaangkan, bu an ngei a, an ṭongṭai a, an chungah kut an ringat a, an infe tâk a.#TS.4:14; 1 Tim.4:14; 5:22.
Kupra tuihuala tirtônhei thu sîr
4Khangkan, Rithla Rithiang itir suakin an fe a, Selukai khua an tlung a, khantaka rithokin Kupra tuihualah rikuangin an fe a. 5Khante, Salamis khua an tlungin chu Judahei inkhôm inheiah Pathian thu an isîr a. Johan Marka khom anmani ṭangpui rangin an ṭhui sa a.
6Khante, tuihual khah a rêngkan, Pafos khua dênin an rifang suak a. Dôithiam, zânthla riti, Juda khatkah arming Bar-Jisua an tong a. 7Kha mi khah Ram-optu vâr tak Sergia Paula zianga om a nit. Kha Ram-optu khan Pathian thu ringai a nuam sikin Barnaba neh Saula khah a ziangah a koi a. 8Nikhomsela, dôipu Eluma (amakhah Grik ṭonga arming a nit) khan Ram-optu khah iamna thu inzôm ino a tum a, anni khah a lei sêl a. 9Khanchu, Saula, Paula khom an iti ngai khah Rithla Rithiangin a sip a, dôipu khah a en ngit a, a ziangah, 10“Nangmah Diabola naipa, ṭhatna tinrêng irâlpa, milak tinrêngin ni sip a, zorotin Pathian thutak hih thuno inchang nî tum ngai a nit.#Hos.14:9. 11Ringai roh, atûn Pumapa kut ni chungah ai ṭum rang a nit; ni mit del a ta, sûn khovâr mu tom no tin e,” a ti a. Khanchu, sûm neh izîngin amah â bô zel tâk a, a ruai rang mi zongin arvâk diai tâk a. 12Khante, Ram-optu khan kha thil itlung khah a mun chu a iam tâk a; Pumapa thu an înrisei khah arkhêl a ti tak tak a.
Pisidia rama Antiokeia Barnaba neh Paula thusîr
13Khante, Paula neh a champuihei khah Pafos khuaa rithokin rikuangin an fe a, Pamfulia rama Perga khua an tlung a; amakhan Johan Marka khan anni khah a mâk a, Jerusalemah a kîr nôk tâk a. 14Pergaa rithokin Pisidia rama Antiokei khuaah an fe a; khante, sabatnin chu inkhôm inah an lût a, an iṭhung a. 15Khante, Dân lekhabu neh zânthla lekhabu tep zoiin chu inkhôm in ulianhei khan an ziangah mi an tir a, “Suapuihei, rithorna thu nin inei a omin chu mipuihei zianga sîr rangin nangni kin inuam a nit,” an va ti a.#TS.15:21. 16Khanchu, Paula khah â ding a, a kutin a zâp a, thusîr a phut tâk a: “Ki Israel champuihei neh Jentail Pathian iṭituhei, ringai rei, 17Hi Israelhei Pathian hin ei chibulhei khah a lei rithlang a, an khualmi changna Aigupta ramah an om sungin nam roinpui takin a siam a, kha rama rithokah khan a sinthotheina roinpui tak imangin a ṭhui isua a.#Fes.1:7; 12:51. 18Kum sômilika sung ramchârah lungidiar takkan a ṭhui a.#13:18 ‘Lung idil ngêi ngêi kan’ itih thei khom a nit. #Rit.14:34; Dn nik.1:31. 19Khante, Kanan rama nam sarikah ân rimang nungah khan an ram khah a mihei ân lua tâk a.#Dn nik.7:1; Jos.14:2. 20Khahei murdi khah kum rizalikah sômringaka sung ai lût a nit.
“Kha nungah khan roirêltuhei a pêk ngai a, zânthla Samuela dênah khan.#Roi.2:16; 1 Sam.2:20. 21Kha nungah khan Rêng an nî a, Pathianin Benjamina richia mi, Kisa naipa Saula khah kum sômilika sunga an rêng rangin a pêk a.#1 Sam.8:5; 10:21,24. 22Ani khah a heng nungah khan Pathianin Davida khah rêngin a siam tâk a. Pathianin hingkan â sîr a, ‘Ke lung ido tak, Jesaia naipa Davida ki mu tâk, ani khan ki lungdo murdi sin a ti,’ a ti a.#1 Sam.13:14; 16:12; Lap.89:20. 23Pathianin a lei înkung angkah takin, kha mi richihei lâia rithokah khan Israel mihei Saninringtu Jisua a zuang pêk tâk a. #2 Sam.7:12. 24Jisuan sin a phut maah khan Johanan, an sualhei rileta baptisma chang rang an nit thu Israel mi murdi a sîr pêk ngai a.#Mk.1:4; Lk.3:3. 25Khante, Johana khan a sintum a len zoi rang lâiah khan mipuihei ziangah, ‘Nangmanin tûm nin ne isôn? Ani khah keimah hih ni mang e. Nikhomsela, ringai ta u, ke nungah zuang a ti, kei chu a pheikok ikhek pêk rang iluan ritluk mang e,’ a ti a. #Joh.1:20,27; Mat.3:11; Mk.1:7; Lk.3:3.
26“Ki chipui, Abrahama richihei neh nangmani Jentail, Pathian iṭituhei, kha saninringna thu khah ei rêngka ziangah a zuang itlung tâk a nit. 27Jerusalema omhei neh an ruaituhei khan Saninringtu a nit an riat no sik neh sabatnî tina an itep ngai zânthlahei ṭong khah a omzia an riat no sikin Jisua khah thiamno an inchang a, zânthlahei ṭong khah an îthlun inrikip tâk a nit.#TS.15:21. 28Thina rang inrup a chungah îte an mu no khomin ithat rangin Pilata an ngên a.#Mat.27:22,23; Mk.15:13,14; Lk.23:21-23. 29A chungthu Pathian Thubûn a irziak murdi an len zoiin chu kros ata an iṭhum a, ithlânah an inzâl tâk a. #Mat.27:57-61; Mk.15:42-47; Lk.23:50-56; Joh.19:38-42. 30Nikhomsela, Pathianin ani khah thina rithokin a kâiithoi nôk tâk a. 31Galili rama rithoka Jerusalema amah neh munka hang ife sahei ziangah khan sûn itamka sung ân lar ngai a; kha mihei khah atûnah hin Israel mihei zianga ama riatpuituhei an nit.#TS.1:3. 32-33Ei chibulhei zianga Pathianin ṭong a lei înkung khah eimani an richihei ta rangin atûnah hin Jisua kâiithoiin ai len tâk nit iti Thurchi Ṭha nangni inreh rangin kin izuang a nit. Lapui â niknaah:
“‘Nang chu ki Naipa ni nit;
Vuanah hin nang kî nei tâk a nit,’
iti riziak angkah khan.#Lap.2:7.
34Khante, a ruak khom ramna mun ithlânah mon loia thina rithokin a kâiithoi rang thu hingkan â sîr:
‘Davida zianga ki ṭonginkung rithiang,
Inkhêl inoh rang ṭhatvurna khah nang pêng ki ti,’
iti angkah khan.#Isa.55:3.
35Khasikin, mun dangah khom,
‘Ni mi rithiang chu ithlâna ram rangin phal no tin,’
a ti sa a.#Lap.16:10.
36Davida khan a dam sungin Pathian lungdoa sin a tho zoiin chu a in tâk a, a chibulhei kôlah an phûm a, a takpum khah ithlânah ai ram tâk a nit.#1 Rêng.2:10; TS.2:29. 37Pathianin thina rithoka ai kâiithoitu kha chu ram mak e. 38Khante, ki Israel chipuihei, amahih nin riat rangin kin nuam, Jisua sika sual izâna thu nin ziangah isîrin ai om a nit. Mosia dâna thiam nin chang thei nona murdiah khan, 39Jisua iamtu murdi chu thiam inchang an nit tâk.#Rom.14:4. 40Khasikin, ridîn rei, khanonchu, zânthlahei lekhabua riziak khah nin chungah a tlung duai lôiin:
41‘Musittuhei, en ta u, arkhêl ti unla, rimang rei;
Nin dam sungin vuansûna ki sin tho hih,
Mîn nangni rilfia pêk khom seh iam tlak no tin u,’
iti khah,” a ti a.#Hab.1:5 (LXX).
42Khante, Paula neh Barnaba khah inkhôm in ata an suakin chu sabatnî nôkah kha thu khah hong isîr nôk rangin mipuihei khan an fial a. 43Inkhôm an ṭîn riai nungah khan, Judahei itam takkah neh Juda saphunhei itam takkan Paula neh Barnaba khah an zui a; anni khan an lei isôn a, Pathian lungkhamnaa om mai rangin an lei ithor a.
44Sabatnî nôkah chu a kho pumpui iti dôrin Pathian thu ringai rangin an hong ribûm a. 45Judahei khan mipuihei an mun chu an inar tak tak a; Paula thu sîr khah an sêlikal a, natinsat takkan an isîr inpôi a. 46Nikhomsela, Paula neh Barnaba khan ihâi takkan an isîr a, “Pathian thu hih nin ziangah isîr masa rang pial a nit; khannisela, nin nôl a, kumtluang ringna dong inrupin nin ribe khâi no nungin chu, nangmani nangni man Jentailhei tiang ngat tâng kin ti.#TS.18:6. 47Khangkana tho rangin Pumapan thu a ne ipêk a nit:
‘Jentailhei vâr inih rangin nang ken kung,
Rammuala mi murdi saninringna rangin’
iti riziak angkah khan,” an ti a. #Isa.42:6; 49:6.
48Jentailhei khan kha thu khah an riatin chu an lôm a, Pumapa chu an chôiinrisâng tâk a; kumtluang ringna dong ranga rithlanghei murdi khan chu an iam tâk a.
49Pumapa thu khah kha ramhual mun tinah ân dar tâk a. 50Khannisela, Judahei khan khosunga ulianhei neh Pathian isôn ngai mi Jentail nupang marit iomhei khah an ithor a; Paula neh Barnaba khah an nuam an lo a, an ram ata an ûmisua tâk a. 51Tirtônhei khan anni chunga an ilung hoino inlangnan an kephaa vâivut khah an ithing iṭhul a, Ikoniom khua an pan tâk a.#Mat.10:14; Mk.6:11; Lk.9:5; 10:11.
52Antiokeia iamtuhei chu Rithla Rithiangin an sip a, an lôm tak tak a.
Currently Selected:
TIRTÔNHEI SINTHO 13: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
