TIRTÔNHEI SINTHO 12

Jakoba thi thu neh Petera tâng thu

1Khante, kha zoroah khan, rêng Herodan koindanga mi ṭhenkahei a nuam ilo a phut tâk a. 2Jakoba, Johana inzirpuipa khah khandaiin a sât that a. 3Amakhan Judahei ân lôm iti a riatin Petera khom khah iman a tum nôk tâk a. (Kha zoro khah Bairiam Kût zoro a nit.) 4Petera khah a man a, tâng inah a khum a, sipai lôm ilikah, mi ilikah chita rithlâkin ân ngâk a. Kalkan Kût ṭuma mipui makunga isuaa, irêl ai tum a nit.#Fes.12:1-17. 5Khasikin, Petera khah tâng inah a khum ngit a; nikhomsela, ama ta rangin koindanghei khan ṭhatnemringai takkan Pathian ziangah an ṭongṭai pêk a.#Jak.5:16.

Tâng in ata Petera a suak

6Herodan ṭhui isua a, irêl rang a tum nî zânah khan Petera khah â bân kiangruaika rênbun ibunin sipai inika kârah a zâl a. A danghei khan inkot bula dingin an ngâk ṭian a. 7Khante, tukvakkan Pumapa vântirtôn khatkah a zuang iding a, tâng in sung khah a vâr pum tâk a. Vântirtôn khan Petera dârah â soi inhar a, “Irang takkan thoi roh,” a ti a. Khanchu, voikan rênbunhei khom khah Petera bân ata a ṭul tâk a. 8Vântirtôn khan a ziangah, “Ni kongkhit inrichel inla, ni pheilôn ribun roh,” a ti a. Peteran khangkah khan a tho a. Khanchu, vântirtôn khan a ziangah, “Ni chungzakua ihâk inla, ne zui roh,” a ti nôk a. 9Petera khan a zui suak tâk a; khanniseh, vântirtôn sintho khah a tak a nit iti reh mak a, inlârna ai mu manih ai sôn a nit. 10Khante, a ngâktu â khatna neh â nikna khah an khêl a, khopui tianga suakna rang thîr dâikot khah an va tlung a. Dâikot khah a khâtin a lei ri-ong a, an suak a, lamilian khatkatah an lôn lâiin tukvakkan vântirtôn khan Petera khah a mâk tâk a.

11Khanchu, Petera khah a har vang tâk a, “Pumapan a vântirtôn a zuk tir a. Heroda kut ata neh Judahei phiarrûkna murdia rithokin a ne înzôk a nit iti atûnah hin ki riat infel tâk,” a ti a.

12Thil omzia a riat infel zoiin chu Johan Marka nu Mari inah a fe a; amakhan mi itam takkah an ribûm a, an lei ṭongṭai a.#TS.12:25; 15:37. 13Petera khan thapuk inkhâr â kik a, nungâk khatkah, Rodi khah inkhâr iong rangin a va fe a. 14Petera rôl a riatin chu a lôm tak tak a, inkhâr iong loiin â tlân kîr nôk a, “Petera, inkot bulah son â ding,” itin a va ril a. 15Nikhomsela, anni khan a ziangah, “Ni învêt tâk a nit hi,” an ti a. Ani khan, “A dik titak kêng?” a ti ngit a. Khanchu, anni khan, “Ama vêngtu Vântirtôn nîng a ti,” itin an sâm a.

16Nikhomsela, Peteran inkhâr khah â kik mai a. Nungah chu an va ong a, ani khah an mu a, arkhêl an ti tak tak a. 17Khanchu, ani khan an dâirekna rangin a kut a zâp a; Pumapan tâng ina rithoka a kêlisua tlia khah â ril tâk a. Khante, “Hi thu hih Jakoba neh iamtu danghei va ril rei,” a ti a. Khanungchu, a suak a, mun dangah a fe tâk a.

18Zîng a hong nitin chu vêngtu sipaihei khah, “Petera im ai pan tâk?” itin an buai tak tak tâk a. 19Heroda khomin ân zong a; khanniseh, mu mak a. Â ngâktuhei khah a sualsân a, anni khah ithat rangin thu a pêk tâk a.

Khante, kha rizoiin chu Heroda khah Judai ram a mâk a, Kaisari khuaah khan a châm mai tâk a.

Heroda thi thu

20Khante, Heroda khah Tura neh Sidon mihei chungah a ning a thik ok a. Anni khan inrual takkan ama sôn rangin an hong a, rêng milian Blasta khah an palâkin an siam a. Khanungchu, Heroda ziangah an fe a, an ram khan Heroda rama rithoka fâknêk ai mu ngai a nit sikin ringeina siampui rangin an ngên a. #1 Rêng.5:25; Ezek.27:17; 28:2; Dan.5:20.

21Khante, a nikhua inkungah khan Heroda khah ilal puan isilin rêngṭhungmunah â ṭhung a, mipuihei ziangah thu â sîr a. 22“Miriam rôl ni mak e, pathian rôl kêng ai nit,” itin mipuihei khah an ikhêk a. 23Ani khan Pathian ziangah roinpuina a pêk no sikin Pumapa vântirtônin voikarengin kut a tlâk a, rûlkûtin a fâk a, a thi tâk a.

24Kha lâiah khan Pathian thu kha ân dar mai a, iamtu khom an pung mai a.

25Barnaba neh Saulan an sinthona an zoiin chu Jerusalema rithokin #12:25 Mss ṭhenkatah, ‘Jerusalemah an kîr nôk,’ iti a nit. an kîr nôk tâk a, Johan Marka khah an ziangah an ṭhui sa a.

Currently Selected:

TIRTÔNHEI SINTHO 12: BIATBSI

Highlight

Copy