TIRTÔNHEI SINTHO 15

Jerusalem Inkhômpui

1Mi ṭhenkah Judai rama rithokin Antiokeiah an zuang a, “Mosia Dân angkan ser nin tan non chu saninring ni thei no tin u,” itin iamtuhei an inrisei a.#Gal.5:2; 2:12; Lev.12:3. 2Paula neh Barnaba khan kha thu-ah khan anni khah an rikhalpui ok a; an rikal khap sikin Paula neh Barnaba neh an lâia mi ṭhenkah, kha thubuai chungchângah khan Jerusalema tirtônhei neh upahei hang rimupui rangin an ithlûk tâk a. 3Khanchu, koindang mihei khan an ithla a, anni khan Jentailhein Pathian tianga an rilet thu khah isîr thiaiin Foiniki ram neh Samari ram an rifang suak a, kha thu khan iamtuhei ân lôm tak tak a.

4Jerusalem an tlungin chu koindang mihei, tirtônhei neh upahei khan an lei lôm a; Pathianin anmani manga sin ai thohei murdi khah an iril a. 5Khannisela, Farisai pôla mi, iamtu ṭhenkah an iding a, “Jentailhei khah ser an tan ngêt rang a nit a, Mosia Dân khom izôm ngêt rangin iti pêk rang a nit,” an ti a.

6Kha thu ngaitua rangah khan tirtônhei neh upahei khah an ribûm tâk a. 7Isôt takkah an isîrinrituk nungin Petera a ding a, an ziangah, “Suapuihei, Jentailhein Pathian thu an riat a, an iam theina ranga Thurchi Ṭha isîrpêk rangin nin lâia rithokin tian ata Pathianin a ner thlangzia khah nin riat a.#TS.10:1-43. 8Mi tin ngaituana retu Pathian khan eimani a ne ipêk angkah ngirin an ziangah Rithla Rithiang ipen, Jentailhei khom a îham a nit iti ân lang a.#TS.10:44; 2:4. 9Eimani neh anmani ithlei mak a, an iam sikin an sualhei â zâ tâk a. 10Kha sikah khan, ei chibulhei neh eini ipêl zoi khâi ino puak khah atûnah hin iamtuhei chungah ikhop pêk itumin îtho rang im Pathian nin irnak hi?#Mat.11:30; 23:4. 11Anmani angkah ngirin eini khom Pumapa Jisua lungkhamna sika saninring inih rangin ei iiam a nit,” a ti a.

12Barnaba neh Paula khan anmani manga Jentailhei lâia sinrikhêl neh thilrikhêlhei Pathianin ai sin thu an isîr kârkah chu mipuihei khah an dâirek a.

13An isîr zoiin chu Jakoba khomin â sîr sa a, “Suapuihei, ki ṭong ringai ta u, 14Simona khan Pathianin Jentailhei rivoia ama riming ripuh ranga anni lâia mi a lâk suak phut thu â sîr tâk a. 15Kha thu neh zânthlahei thu hih a irtok thap a nit:

16“‘Kha rizoiah khan kîr nôk ki ta,

Davida rêngram inding nôk ki ti.

A siatna munhei siam inṭha nôk ki ta,

Inding thar nôk ki ti.#Amos.9:11-12; Jer.12:15.

17Khanchu, mi danghei khomin Pumapa zong an ta,

Jentail ker ming riputhei murdi neh.

18Khuansiang ata hi thu inreh ngaitu,

Pumapa khan a ti,’

ai ti angkah khan.

19“Khasikin, amahih ki ngaidân chu a nit: Jentailhei lâia Pathian tianga hong rilethei hi chu inbuai nông eila. 20Kha nêkan chu mirmil biakna thil rithiangino ata rikiang rang hei, ridisia bâng a, sa thitôt neh sa thisen fah loi rangin lekha thonin ti pêk eila, kî ti a nit.#Fes.34:15-17; Lev.18:6-23; 17:10-16. 21Mosia Dân chu tian ata kho tinah an inpuang a, inkhôm inheiah sabatnî fengin an tep ngai,” a ti a.#TS.13:15.

Jentail iamtuhei zianga inkhômpui lekhathon

22Khanchu, tirtônhei, upahei neh koindang mi murdi khan, an lâia mi rithlang suak a, Paula neh Barnaba lôma Antiokeia tir zel a ṭhatin an riat a. Juda, Barsaba an iti neh Sila an rithlang a, anni khah suapuihei lâia ruaitu ualhei an nit. 23Hingka hin lekhathon an riziak a, an inchôi a:

“Keimani, tirtônhei neh upahei neh nin suapuihei hin, Jentail iamtu Antiokeia omhei, Suria rama omhei, neh Kilikia rama omhei kha chibai nangni kin bûk. 24Kin lâia mi ṭhenkah nin zianga hongin thu zuang isîrin nangni an inbuai a, lungzîng nangni an sak iti kin riat a; khanniseh, anni khah thu peh mang ung e. 25Khasikin, kin ribûm a, lunginrual takkan mi rithlanga nin zianga zuang itir rangin kin îthlûk a nit. Ei rual lungthlung tak Barnaba neh Paula, 26ei Pumapa Jisua Krista sinthonaa an ringna phalhei lômah hin zuang sela kin iti a nit. 27Khaangkan, Juda neh Sila kin zuk itir a nit; anni khomin hi thu kin irziak hih mêl rimu ngêiin nangni sîr pêk an ti. 28Rithla Rithiang neh keimanin hi thu poimo takhei ban hih chu puakrik dang siam iloi rangin ṭha kin iti a nit:#Mat.23:4. 29Mirmil biakna thil fah no rei; sa thisen neh sa thitôt fah no rei; ridisia ata rikiang rei. Hi thilhei hih tho tlak loi rangin nin ridîn theiin chu nin ta rangin ṭha ok a ti.#15:29 Mss ṭhenkatah, ‘Nangmani chunga isin nin inuam ino chu mi chungah sin no rei,’ iti a kop. Chibai,” itin an riziak a.

30Khanchu, an mi tirhei khah an infe tâk a, Antiokei an tlung a, mipui an koi bûm a, lekhathon khah an pêk a. 31An tep zoiin chu kha ithorna thu sikah khan lômnan an sip tâk a. 32Juda neh Sila chu zânthla khom an nit sa a, iamtuhei khah thu itam takkan an ithor a, an indet a. 33Khante, sûn isôt zankah an châm zoiin chu a zuang itirtuhei zianga thlangam takka kîr nôk rangin iamtuhei khan an infe tâk a. 34Sila chu iom mai rang a tum tâk a. 35Paula neh Barnaba kha chu Antiokeiah khan mi dang itam takkahei neh an la châm mai a, Pumapa thu an isîr a, an inrisei ngai a.

Paula neh Barnaba an inṭhen

36Zoro sôt ianka nungah chu Paula khan Barnaba ziangah, “Tho, fe nôk ei ta, kho tina Pumapa thu ei isîrna murdia ei suapui iomhei khah pan ei ta, ingkan im an om tâk lei mu rei,” a ti a. 37Barnaba khan Johan Marka khah an zianga ṭhui rang a nuam a. #TS.12:12; 13:3; Kol.4:10. 38Khanniseh, Paula khan chu, Pamfulia ram tenan a kîrpêk a, an sinthonaah a fepui sa mai khâi no sikah khan ani khah iṭhui nôk chi a nitin reh mak a. 39Khanchu, an ringo tâk sikin anni khom khah an inṭhen tâk a. Barnaba khan Johan Marka khah a ṭhui a, Kupra tuihual tiang rikuangin an fe tâk a. 40Paula khan chu Sila arthlang a, iamtuhein Pumapa lungkhamna kutah an inkol zoiin chu an inzin suak tâk a. 41Suria ram neh Kilikia ram khah an rifang suak a, koindang mihei khah an indet thiai mai a.

Currently Selected:

TIRTÔNHEI SINTHO 15: BIATBSI

Highlight

Copy