LUK 13

Noluke Paablokke Míílat Sulangkuka Demamílo Siyé

1Dekepe idodelo, ayokone dakla, Galil amikídí lokke Shédíme aman bila kumsu dungem, Pilatke bulum petla kumko jongko delo buluke iyyiem soyél sulík namem Jisume pokanto. 2Jisu bí poyansuto, “Buluke sikepe anngéé sukolok si Galil ami kídísi abíd takam Galil ami kídíem paab geyane emla nolu míídunía? 3Ngo nolum podung, demang! Nolu míílat suku mamílo, nolu takamkom nyokyé. 4Demangkom Silomlo duuna ekum gaange bénkanam midum íying kolang píínyide Jirusalemlo duuna abíd takam empemílo deemayane emla nolu míídonía? 5Nolum ngo podung, demang! Idakkom nolu míílat sumadem, nolu takamkom nyokyé.”

Ayé Éémana Tapang Anekolo Luyiisuname

6Delokrongem sim bí luyiisunam agom sim poto, “Amikone tapang aneko bíkke aríklo katuai, delo ayédem kaape emla gíto, idokom atíyang paamang. 7Depe iname, bí arík kaabomna amidem pokai, ‘Tagum kokai ngo sim tapang ane sim ayé éémadí emla kaape gítí bomto idola atíyang paamang. Sim beepak toka! Emmumpe si kédengem dungee bomdung.’ 8Amide poyansuto, ‘Saare, dítag konko sim mekí potoka delo ngo sim konggoola haar bikípe. 9Delo dítagkon delo si ayé éébiyémílo ainame! Éébi mamílo, beepak langka!’ ”

Ínggírna Mimekonem Jisuke Sabbath Longelo Ipíkuname

10Sabbath longelo Jisu bí kumkeng ekumkolo ngiitom poyilbola dungai, 11delo mime aneko tagying kolang dítag píínyi kokai deemana aide dobét kolok tunggírla duuto. Bí tunggírla geejon kényimape ito. 12Jisu bí mimedem kaala tomnín supala bím poto, “Mime, nokke deemangem mepak bitoku.” 13Delokrongem bí agí alage bíkkíng leetanto, delo menang asak geejon langkula Shédíme yidgeto.

14Sabbath longelo Jisuke ipíkunamem kangkipe kaala, kumkeng ekum ruutumde ami kídíem poto, “Agér idíe longkéko kadung. Sabbath longelo imape delo longe kídí delo aala ipí pename.”

15Ruutum bí poto, “Nolu aromana kídía! Nolu mipile Sabbath longelo agíke gooruem demangkom gaduem guallok taalenla írbín bíntí manía? 16Demílo sim mime sim, Soitane dítag íying kolang píínyi kokai yééla menam Abrahamke ome sim yééna lokke taalen kuma yénía?” 17Bí dem poname, bím akna kídíe míngkirunge ito, idokom ami kídíe bíkke irisinyo inam takamem airupe mííto.

Petu Amílo Luyiisuname

(Mt 13:31-32; Mk 4:30-32)

18Delokrongem Jisu bí íngkíto, “Shédíke amode kape kísa idun? Ingkoloi ngo sim luyii supene? 19Si amie agí baganlo kuunam tulang amí kísadung. Si siirepla minekai delo pettange sokke aaglo asup suplíkla ikai.”

Siiyélo Luyiisuname

(Mt 13:33)

20Lekoda bí tatkíto, “Ingkoloi ngo Shédíke amongem luyii supene? 21De siiyé kísadung; mimekone aala bortonkolo bíísét dope monam ennoklo soyél sulíkla, duamang tetengem pokomla menam kísadung.”

Tapétna Lamgéye

(Mt 7:13-14,21-23)

22Delokrongem Jisu bí taon taonlo delokke doolung doolunglo gígoola. bíkke Jirusalem danpe endagem luyilgooto. 23Ayokone bím tatkíto, “Ruutume, turku pena ami kídíde anyongo kua?”

Bí bulum poto, 24“Tapétna eyabdelok aape emla rallangka, kapeila ngo nolum podung, deddína amie aape emla ralkíyé idokom depe ilamayé. 25Ekum atode leko gerepla eyabem sittum rodem, nolu luyulo dakla pigala delokke ‘Saare ngolum eyabem siyyabi’ emla rogula itíyé. Idakkom bí poyansuyé, ‘Ngo nolum kénmang delokke ingkolok nolu aadudí ngo kénmang.’ 26Delo nolu poyé, ‘Ngolu nom dobo tííbosuto, delokke no ngolum ngoluke bedu bedalo luyil poyiltuai.’ 27Idokom bí poyansuyé, ‘Ngo nolum kénmang delokke ingkolok nolu aadudí kénmang. Ngokke lokke gítolangku, nolu atímana agér inakídí nolu!’ 28Nolu Abraham, Isaak, Jakob melang Shédíke amolo kaaluna miri kídí takamem duudope kaasuyém, delo nolu kapla rííla, iipange koteksula iyé idokom nolu agíem yoppak kosuyé. 29Ami kídíe sanggo loklang delokke sokko danlok aadumsula Shédíke amolo doman aran dobosuyé. 30Arope luyém kerana kídíe méélam yéku, delokke méélamna kídíe kerayéku.”

Jisuke Jirusalemem Ankíname

(Mt 23:37-39)

31Depe iduem Pharisi kídíeke ayoko Jisukíng aala bím poto, “Sim among sim mepakla regokonlo gígéétoku, Herod bí nom petpe idung.”

32Bí poyansuto, “Dem mensurung dem gíla potoka, ‘Ngo uyu kídíem monpak yéku delokke ami kídíem silo nyampo ipíyéku, delokke longum nanalo ngokke píípekolo pííyé.’ 33Depe epe idakkom, ngo silo, nyampo delokke réé gíperung aiyé, kapeila berokpe kaaluna mirie sékokom Jirusalem luyulo silímang.

34“Jirusalem, Jirusalem, nolu kaaluna miri kídíem delokke nolukíng melíknam kídíem petna nolum, rongne agí labbílo roguem gubbomnam akampe, edítko noluke ome-uem gubbodope emla ankí kítídune, ilate nolu tatmang! 35Kaasutola, noluke ekumem arape nolum melíkdung. Ngo nolum podung, ‘Ruutumke amínlok aanade gérne,’#Miri 118:26 emla nolu emkumang tetengem nolu ngom kaapang kumayé.”

Currently Selected:

LUK 13: adiBSI

Highlight

Copy